Skip navigation

0Meta Navigation

× Close search

Navigation

Kreu Misioni në Kosovë Çfarë bëjmë
Misioni i OSBE-së në Kosovë

Çfarë bëjmë

Si misioni më i madh i organizatës, Misioni i OSBE-së në Kosovë është veçanërisht i angazhuar në mbrojtjen e të drejtave të komuniteteve; mbrojtjen e trashëgimisë kulturore dhe fetare; monitorimin e gjyqësorit; integrimin e perspektivës gjinore; lirisë dhe zhvillimit të medias; promovimin e mekanizmave kundër diskriminimit; përmirësimin e pjesëmarrjes së të rinjve në jetën politike dhe publike; luftimin e terrorizmit dhe kërcënimeve kibernetike; ofrimin e trajnimeve të avancuara për policinë dhe mbështetjen për strategjitë kyçe të policisë dhe sigurisë; si dhe mbështetjen për zbatimin e marrëveshjeve nga dialogu ndërmjet Prishtinës dhe Beogradit, ndërmjetësuar nga Bashkimi Evropian. Misioni monitoron punën e institucioneve dhe ndihmon në forcimin e legjislacionit dhe politikave që mbulojnë mbrojtjen e të drejtave të njeriut dhe të komuniteteve; kundër diskriminimit; lirinë e shprehjes; barazinë gjinore; dhe luftën kundër krimit të organizuar.
Luftimi i terrorizmit
Misioni i OSBE-së ofron mbështetje për institucionet e Kosovës në hartimin, zbatimin dhe përditësimin e strategjisë dhe planit të veprimit për parandalimin dhe luftimin e terrorizmit. Zhvillon aktivitete për të mbështetur përpjekjet e policisë kundër terrorizmit dhe ekstremizmit të dhunshëm dhe radikalizmit, si dhe për të forcuar rolin e shoqërisë civile, grave, të rinjve dhe prijësve fetarë.
Zgjedhjet
Misioni i OSBE-së ofron këshilla teknike, mbështetje dhe ekspertizë për trupat që merren me menaxhimin e zgjedhjeve. Bashkëpunon dhe mbështet Komisionin Qendror të Zgjedhjeve dhe Panelin Zgjedhor për Ankesa dhe Parashtresa për të forcuar kapacitetet e tyre në përputhje me standardet dhe praktikat e mira ndërkombëtare. Për më tepër, Misioni i ofron asistencë, ekspertizë dhe mbështetje edhe Kuvendit të Kosovës gjatë realizimit të procesit të reformës ligjore zgjedhore.
Barazia gjinore
Fuqizimi i grave, barazia gjinore dhe të drejtat e grave janë në thelb të të gjitha aktiviteteve të Misionit të OSBE-së. Misioni fokusohet në mbështetjen e miratimit dhe zbatimit të kornizave dhe politikave ligjore jo-diskriminuese. Vëmendje e veçantë i kushtohet pjesëmarrjes së grave në jetën publike, politike dhe buxhetimit të përgjegjshëm gjinor për të siguruar që interesat e grave dhe burrave merren parasysh në mënyrë të barabartë në të gjitha politikat publike.
Qeverisja e mirë
Misioni i OSBE-së mbështet institucionet në të gjitha nivelet e qeverisjes në përmirësim të efektshmërisë dhe efikasitetit të tyre në përputhje me standardet dhe praktikat më të mira ndërkombëtare, duke u fokusuar veçanërisht në rritjen e kapaciteteve të tyre për bashkëpunim dhe koordinim ndërinstitucional, zhvillim të mekanizmave të mbikëqyrjes dhe sigurim të gjithëpërfshirjes në proceset e përgjithshme të vendimmarrjes.
Të drejtat e njeriut dhe komunitetet
Misioni i OSBE-së punon për të avancuar të drejtat e njeriut dhe të komuniteteve përmes monitorimit, mbrojtjes dhe promovimit të tyre. Misioni mbështet institucionet e Kosovës në përputhje me legjislacionin dhe instrumentet ligjore ndërkombëtare, bën shqyrtimin e legjislacionit e të politikave, si dhe mbështet zhvillimin e politikave dhe legjislacionit të ri kur është e nevojshme. Misioni monitoron dhe raporton për punën e institucioneve ekzekutive, gjyqësore, ligjvënëse dhe të zbatimit të ligjit në lidhje me respektimin e të drejtave të njeriut dhe të komuniteteve, me fokus të veçantë në të drejtat pronësore dhe banesore të komuniteteve jo-shumicë, personave të zhvendosur dhe grave.
Liria dhe zhvillimi i medias
Misioni i OSBE-së punon ngushtë me institucionet kyçe të medias, përfshirë Këshillin e Mediave të Shkruara të Kosovës, Komisionin e Pavarur për Media dhe Radio Televizionin e Kosovës, për t'i mbështetur që të bëhen institucione efektive dhe plotësisht funksionale përmes monitorimit, raportimit dhe nismave avokuese. Bashkë me asociacionet e gazetarëve dhe institucionet e sektorit të sigurisë, monitoron dhe koordinon sigurinë e gazetarëve dhe kërkon të krijojë kushte më të mira pune për punonjësit e medias. Misioni shqyrton dhe i jep rekomandime Kuvendit për çdo legjislacion të ri apo të rishikuar lidhur me median.
Policia dhe siguria publike
Misioni i OSBE-së punon me Ministrinë e Punëve të Brendshme, Policinë e Kosovës dhe agjencitë e tjera të sigurisë publike për të ndihmuar në ngritjen e efektshmërisë së tyre në luftimin dhe parandalimin e të gjitha formave të kërcënimeve dhe krijimin e një mjedisi të sigurt dhe të rregullt për të gjitha komunitetet që jetojnë në Kosovë.
Sundimi i ligjit
Në mbështetje të pavarësisë, paanshmërisë dhe llogaridhënies së sistemit të drejtësisë, Misioni monitoron dhe raporton mbi punën e gjyqësorit përmes një programi gjithëpërfshirës të monitorimit të sektorit të gjykimeve dhe drejtësisë. Programi vlerëson nëse sistemi i drejtësisë funksionon në përputhje me standardet ndërkombëtare të të drejtave të njeriut dhe sundimit të ligjit. Angazhohet në aktivitete të përmirësimit të performancës së sektorit të drejtësisë dhe në mbështetje të institucioneve jo-gjyqësore në mbrojtje të të drejtave të njeriut.
Toleranca dhe jo-diskriminimi
Misioni i OSBE-së punon me prijës fetarë, të rin dhe zyrtarë të shkollave për të promovuar tolerancën, dialogun ndërkomunitar dhe ndërfetar dhe pranimin e diversitetit në Kosovë. Misioni këshillon institucionet se si të përmirësojnë dhe zbatojnë legjislacionin dhe politikat kundër diskriminimit që promovojnë marrëdhëniet ndërmjet komuniteteve.
Rinia
Misioni i OSBE-së promovon në mënyrë aktive qasjen gjithëpërfshirëse për të dëgjuar zërat e të rinjve dhe për të kontribuar në një kornizë të favorshme ligjore dhe administrative për rininë. Në veçanti, mbështet pjesëmarrjen dhe kontributin e tyre në proceset e politikave dhe vendimmarrjes, të cilat synojnë të trajtojnë problemet me të cilat përballen në jetën e përditshme. Theks i veçantë i kushtohet pjesëmarrjes së grave të reja, të rinjve që u përkasin komuniteteve jo-shumicë, nga zona rurale dhe të thella, si dhe të rinjve që u përkasin grupeve të cenueshme, si të rinjtë me aftësi të kufizuara dhe viktima të dhunës me bazë gjinore.