Skip navigation

0Meta Navigation

× Close search

Navigation

Kreu Misioni në Kosovë Çfarë bëjmë
Misioni i OSBE-së në Kosovë

Çfarë bëjmë

Si një ndër pranitë më të mëdha të OSBE-së në terren, Misioni në Kosovë ndërmerr një spektër të gjerë aktivitetesh, që nga përkrahja e funksionimit të institucioneve demokratike dhe pjesëmarrjes qytetare në vendimmarrje, e deri tek promovimi i të drejtave të njeriut dhe sundimit të ligjit. Në veçanti angazhohet për mbrojtjen e të drejtave të komuniteteve; mbrojtjen e trashëgimisë kulturore dhe fetare; monitorimin e gjyqësorit; integrimin gjinor; liritë dhe zhvillimin e mediave; promovimin e mekanizmave kundër diskriminimit; përmirësimin e pjesëmarrjes së të rinjve në jetën publike dhe politike; luftimin e terrorizmit dhe kërcënimeve kibernetike; trajnimin e avancuar të policisë dhe përkrahjen në strategji kyçe policore; si dhe përkrahjen e zbatimit të marrëveshjeve që rrjedhin nga dialogu i mundësuar nga Bashkimi Evropian ndërmjet Prishtinës dhe Beogradit. Misioni monitoron punën e institucioneve dhe ndihmon në përforcimin e legjislacionit dhe politikave që mbulojnë mbrojtjen e të drejtave të njeriut dhe komuniteteve; kundër-diskriminimin; lirinë e shprehjes; barazinë gjinore; dhe luftën kundër krimit të organizuar.
Luftimi i terrorizmit
Misioni ofron mbështetje për institucionet e Kosovës në implementim dhe përditësim të strategjive e planeve të veprimit kundër terrorizmimt dhe parandalimit të ekstremizmit të dhunshëm që shpie në terrorizëm.
Siguria kibernetike/TIK
Misioni punon me institucionet për rritjen e sigurisë kibernetike në Kosovë.
Zgjedhjet
Misioni ndihmon trupat e menaxhimit të zgjedhjeve, Komisionin Qendror Zgjedhor dhe Panelin Zgjedhor për Ankesa dhe Parashtresa, por edhe Sekretariatet e tyre, duke ofruar këshilla teknike dhe ekspertizë për rishikimin e legjislacionit zgjedhor dhe në menaxhimin e proceseve zgjedhore, në mënyrë që ato të përmbushin standardet ndërkombëtare.
Barazia gjinore
Misioni promovon fuqizimin e grave, barazinë gjinore dhe të drejtat e gruas duke mbështetur zhvillimin dhe zbatimin e kornizave ligjore e politikave jo-diskriminuese. Theks i veçantë i kushtohet pjesëmarrjes së grave në vendimmarrjen publike dhe buxhetimin e përgjegjshëm gjinor, duke u siguruar që interesat e grave dhe ato të burrave të merren parasysh në mënyrë të barabartë.
Qeverisja e mirë
Misioni përkrah organet qendrore e lokale ligjvënëse në përmirësimin e rolit të tyre mbikëqyrës ndaj ekzekutivit dhe ofron këshilla mbi mënyrat e rritjes së transparencës, komunikimit dhe pjesëmarrjes publike, në pajtim me parimet e qeverisjes së mirë.
Të drejtat e njeriut
Puna e Misionit për të drejtat e njeriut dhe të komuniteteve përfshin shqyrtimin dhe analizën e ligjeve e politikave; monitorimin e punës së ekzekutivit, gjyqësorit, legjislativit dhe institucioneve të zbatimit të ligjit në lidhje me respektimin të të drejtave të njeriut, dhe ofrimin e këshillave.
Liria dhe zhvillimi i medias
Misioni bashkëpunon ngushtë me institucionet kryesore të mediave, duke përfshirë Këshillin e Mediave të Shkruara të Kosovës, Komisionin e Pavarur për Media dhe Radio Televizionin e Kosovës, për t’i ndihmuar atyre që të bëhen institucione efektive dhe plotësisht funksionale, përmes monitorimit, raportimit e iniciativave të avokimit.
Policimi
Misioni punon me Ministrinë e Punëve të Brendshme, Policinë e Kosovës dhe agjencitë tjera të sigurisë publike për të ndihmuar efektshmërinë e përgjithshme në luftimin dhe parandalimin e të gjitha formave të kërcënimeve transnacionale dhe në krijimin e një mjedisi të sigurt për të gjitha komunitetet që jetojnë në Kosovë.
Sundimi i ligjit
Për të ndihmuar në sigurimin e pavarësisë, paanshmërisë dhe llogaridhënies së sistemit të drejtësisë, Misioni rregullisht monitoron dhe raporton mbi punën e gjyqësorit, prokurorisë dhe avokatëve dhe vlerëson nëse ata janë duke vepruar në pajtim me standardet ndërkombëtare të të drejtave të njeriut dhe sundimit të ligjit. Angazhohet në aktivitete të përmirësimit të performancës së sektorit të drejtësisë dhe në mbështetje të institucioneve jo-gjyqësore në mbrojtje të të drejtave të njeriut.
Toleranca dhe jo-diskriminimi
Duke punuar me prijës fetarë, të rinj e zyrtarë shkollorë, Misioni promovon tolerancën, dialogun mes komuniteteve e mes feve, si dhe pranimin e diversitetit në Kosovë.
Rinia
Misioni e përqendron përkrahjen e tij tek rritja dhe përmirësimi i pjesëmarrjes dhe kontributit të të rinjve në hartimin e politikave dhe marrjen e vendimeve në jetën publike.