News and press releases

Rreth 50 përfaqësues nga bashkitë, forcat e rendit, sistemi i drejtësisë, shërbimet sociale dhe shoqëria civile nga Kukësi dhe Dragashi u mblodhën në Kukës, më 16 korrik 2025, për të forcuar bashkëpunimin në adresimin e dhunës në familje dhe dhunës me bazë gjinore.

Si pjesë e një fushate për të promovuar karrierën si zbatues të ligjit, nga 26 qershori deri më 2 korrik 2025, Misioni i OSBE-së përkrahu Policinë e Kosovës në organizimin e një sërë takimesh informuese në pesë rajone të Kosovës. Iniciativa kishte në fokus gra dhe burra të rinj, kryesisht nga komunitetet jo-shumicë, me qëllim inkurajimin e aplikimeve të tyre për t'iu bashkuar Policisë së Kosovës. Këto organizime informuese u mbajtën në Gjilan, Mitrovicë, Pejë, Prishtinë, si dhe Prizren, duke sjellë 105 aplikues të mundshëm, përfshirë 70 burra dhe 35 gra, nga të cilët 52 shqiptarë, 19 serbë, 17 boshnjakë, tetë romë, tetë egjiptianë, si dhe një turk i Kosovës. Këto sesione informuese u ofruan kandidatëve udhëzime praktike mbi procesin e aplikimit, kriteret e kualifikimit, si dhe dobitë e karrierës në polici. Sesionet po ashtu theksuan gamën e gjerë të mundësive të zhvillimit dhe avancimit profesional që ofrohen në kuadër të Policisë së Kosovës. Gjatë prezantimeve, oficerë të lartë të policisë theksuan përkushtimin e Policisë së Kosovës ndaj diversitetit dhe përfshirjes, por edhe mikpritjen e aplikuesve nga të gjitha etnitë dhe gjinitë. Sesionet po ashtu riafirmuan përkushtimin e Policisë së Kosovës për të ngritur një institucion të sigurisë publike që është përfaqësues dhe i barabartë, që i shërben të gjitha komuniteteve në mënyrë të barabartë. “Qëllimi ynë është të mbështesim zhvillimin e një organizate policore ndër-komunitare që i shërben dhe mbron të gjitha komunitetet në Kosovë”, tha znj. Maria De Benito Rodriguez, U.D. Drejtore e Departamentit për Rend dhe Siguri Publike në Misionin e OSBE-së në Kosovë. “Përmes këtyre aktiviteteve informuese, ne po krijojmë hapësirë ku të rinjtë nga prapavija të ndryshme mund ta shohin veten në të ardhmen si pjesë e sigurisë publike në Kosovë”, tha ajo. Kolonel Hilmi Pacolli, Drejtor i Personelit dhe Administratës së Policisë së Kosovës, gjithashtu theksoi rëndësinë e fushatës. “Këto aktivitete informuese janë qenësore që të rinjtë nga të gjitha komunitetet të informohen dhe të inkurajohen, si dhe të ndihen të mirëpritur në Policinë e Kosovës. Forca jonë qëndron në diversitetin tonë, ndërsa ne jemi të përkushtuar për të ndërtuar një organizatë policore profesionale që pasqyron shoqërinë të cilës i shërbejmë.” Fushata është pjesë e përpjekjeve më të gjera për të forcuar besimin mes zbatuesve të ligjit dhe publikut, duke siguruar njëkohësisht që gjenerata e ardhshme e oficerëve të Policisë së Kosovës të pasqyrojë diversitetin e plotë të shoqërisë multietnike në Kosovë.

Pas publikimit të Vëllimit I të Udhërrëfyesit (Guidës) të Jurisprudencës së Gjykatës Kushtetuese në shkurt 2024, i cili përfshinte ankimet individuale kushtetuese për periudhën 1998–2023, Gjykata Kushtetuese e Shqipërisë, në bashkëpunim me Prezencën e OSBE‑së në Shqipëri, publikoi më 24 qershor 2025 Vëllimin II të Udhërrëfyesit, i cili përfshin periudhën 1992–2024. Vëllimin II i Udhërrëfyesit paraqet vendimmarrjen dhe jurisprudencën e Gjykatës lidhur me parimet e përgjithshme të të drejtave dhe lirive themelore, vendimmarrjen mbi të drejtat substanciale, si dhe standardet në lidhje me ndarjen e pushteteve dhe organizimin e funksionimin e organeve kushtetuese, sikurse Presidenti i Republikës, Kuvendi, Këshilli i Ministrave, Avokati i Popullit, Kontrolli i Lartë i Shtetit, Gjykatat, Prokuroria dhe organet e vetëqeverisjes vendore. Së bashku, dy vëllimet e Udhërrëfyesit synojnë të kontribuojnë në rritjen e qasjes së publikut në drejtësinë kushtetuese dhe në forcimin e mbrojtjes së të drejtave dhe lirive themelore. Vëllimet do t’i shërbejnë stafit gjyqësor për përmirësimin e kapaciteteve kërkimore e analitike, do të mbështesin standardizimin e vendimeve të Gjykatës dhe do t’u mundësojnë juristëve, profesionistëve të fushës dhe studiuesve që të shqyrtojnë më lehtë jurisprudencën e Gjykatës. Hartimi i dy vëllimeve u mbështet nga Prezenca e OSBE‑së në Shqipëri, në kuadër të projektit “ Forcimi i shtetit të së drejtës dhe promovimi i mbrojtjes së të drejtave të njeriut në Shqipëri përmes mbështetjes për Gjykatën Kushtetuese ”, financuar nga Shtetet e Bashkuara të Amerikës, Italia dhe Greqia. Prezenca e OSBE‑së do të vijojë mbështetjen për Gjykatën Kushtetuese në përpjekjet e saj për rritjen e transparencës, përmirësimin e qasjes dhe efikasitetit, si dhe për forcimin e kapaciteteve institucionale për garantimin e sundimit të ligjit dhe mbrojtjen e të drejtave të njeriut, në përputhje me standardet ndërkombëtare dhe angazhimet e OSBE‑së.

Më 24 qershor 2025, Misioni i OSBE-së në Kosovë i dorëzoi pesë automjete të specializuara njësisë K9 të Policisë së Kosovës për të rritur aftësitë operacionale të ekipeve policore të qenve.

Më 24 qershor, Prezenca e OSBE-së në Shqipëri, në bashkëpunim me Universitetin e Gjirokastrës, prezantoi gjetjet e studimit të fizibilitetit për ngritjen e një Qendre Kërkimore për Zhvillimin Vendor pranë këtij institucioni të arsimit të lartë. Merrnin pjesë në këtë veprimtari staf akademik, përfaqësues të qeverisë, shoqërisë civile, studentë dhe aktorë vendorë për të diskutuar rolin kyç të kërkimit shkencor dhe të dhënave në mbështetje të hartimit të politikave dhe promovimit të zhvillimit vendor të qëndrueshëm. Takimi u hap nga Prof. Dr. Jaho Cana, Rektor i Universitetit të Gjirokastrës; Ambasadori Michel Tarran, Kryetar i Prezencës së OSBE-së në Shqipëri; si dhe përfaqësues nga Bashkia e Gjirokastrës dhe Agjencia për Mbështetjen e Vetëqeverisjes Vendore. Në fjalën e tij, Ambasadori Tarran theksoi rolin vendimtar që luan kërkimi shkencor brenda institucioneve akademike për trajtimin e çështjeve komplekse me të cilat përballen komunitetet vendore. “Organet e qeverisjes vendore janë në vijën e parë të përpjekjeve për përballimin e sfidave si rritja ekonomike, shpopullimi, degradimi i mjedisit dhe ndryshimet klimatike. Një qendër e dedikuar kërkimore mund të sigurojë mjetet, analizat dhe ekspertët e nevojshëm për të mbështetur vendimmarrjen e bazuar në të dhëna shkencore dhe për të forcuar qëndrueshmërinë afatgjatë,” u shpreh ai. Studimi i fizibilitetit, i realizuar nga një ekspert i kontraktuar nga Prezenca e OSBE-së, u përgatit pas konsultimeve gjithëpërfshirëse me stafin akademik, bashkitë dhe aktorët vendorë. Ai identifikon nevojat, mundësitë dhe modelet e mundshme për krijimin e një qendre kërkimore ndërdisiplinore, e cila do të mbështesë hartimin e politikave, zhvillimin ekonomik e social vendor dhe forcimin e fuqizimin e kapaciteteve rajonale. Kjo nismë realizohet në kuadrin e angazhimit të vazhdueshëm të Prezencës së OSBE-së për forcimin e qeverisjes vendore në Shqipëri, përmes futjes së instrumenteve dhe mekanizmave të rinj në bashkëpunim me e organet e qeverisjes vendore, shoqërisë civile, botës akademike dhe sektorit privat, me synim promovimin e rritjes gjithëpërfshirëse dhe të qëndrueshme në mbarë vendin.

Më 23 qershor 2025, duke shënuar një moment të rëndësishëm për procesin ligjbërës në Shqipëri, Kuvendi i Republikës së Shqipërisë përuroi Portalin e e‑Legjislacionit, i konceptuar dhe realizuar në sajë të një projekti të Prezencës së OSBE‑së në Shqipëri, me mbështetjen e Qeverisë zvicerane. Portali, i zhvilluar në përputhje me standardin ndërkombëtar Akoma Ntoso, mundëson kërkimin dhe qasjen online në kohë reale në dokumente legjislative të konsoliduara. Ai përmirëson rrjedhën e punës brenda institucionit, mbështet një proces ligjbërës më efikas e transparent, si dhe siguron një vendimmarrje më të informuar të Kuvendit. Përurimi i portalit përbën gjithashtu një hap përpara drejt kalimit të plotë në sistemin e e‑Legjislacionit brenda vitit 2028. Gjatë ceremonisë së përurimit, ku morën pjesë personalitete dhe përfaqësues të institucioneve të përfshira në procesin ligjbërës, Kryetarja e Kuvendit, Elisa Spiropali, e vlerësoi nismën si një hap thelbësor drejt një procesi legjislativ të njësuar e të standardizuar në nivel kombëtar, ku Kuvendi luan rol drejtues. “Me këtë platformë, ne hapim një kapitull të ri për mënyrën se si hartojmë, diskutojmë dhe miratojmë ligjet. Kemi ndërtuar një mjet për modernizimin dhe digjitalizimin e procesit më të rëndësishëm parlamentar, ligjbërjes, si një kontribut për avancimin e transformimit demokratik të shoqërisë,” u shpreh ajo. “Portali është një përballje e drejtpërdrejtë dhe konkrete me sfidën e shndërrimit sa më të shpejtë të Kuvendit të Shqipërisë në një parlament me standardet e parlamenteve të vendeve anëtare të Bashkimit Europian”. Ajo e falënderoi Prezencën e OSBE‑së për bashkëpunimin e vazhdueshëm me Kuvendin dhe Ambasadën e Zvicrës për mbështetjen dhe kontributin financiar. “Me përqafimin e e-Legjislacionit, Shqipëria i bashkohet një numri vendesh gjithnjë në rritje që i kanë miratuar këto sisteme dhe pozicionohet si një lider rajonal në reformën digjitale legjislative,” u shpreh Ambasadori Michel Tarran, Kryetari i Prezencës së OSBE-së në Shqipëri. “Suksesi afatgjatë i procesit të e‑Legjislacionit varet nga përvetësimi dhe implementimi i tij i plotë nga Kuvendi, si një dëshmi e qartë e qëndrueshmërisë së kësaj reforme dhe integrimit të saj në strukturën institucionale të sistemit legjislativ të Shqipërisë,” shtoi ai. Gjatë eventit u realizua dhe demonstrimi i funksionaliteteve të Portalit, i cili përmban aktualisht mbi 300 ligje të përpunuara sipas formatit Akoma Ntoso. Portali, edhe pse në fazë testimi, mund të aksesohet në adresën: https://e-legjislacioni.parlament.al/, ku përdoruesit mund të hulumtojnë funksionalitetet dhe të kontribuojnë në përmirësimin e tij të mëtejshëm. Zhvillimi i përmbajtjes do të vijojë nën drejtimin e Kuvendit me mbështetjen e Prezencës së OSBE‑së sipas nevojës. Kjo nismë po realizohet në kuadër të projektit “Mbështetje për e-legjislacionin në Shqipëri” (2023–2025), financuar nga Agjencia Zvicerane për Zhvillim dhe Bashkëpunim. Prezenca e OSBE‑së vazhdon ta mbështesë Kuvendin e Shqipërisë në fusha të tilla si ligjbërja, reforma legjislative, ngritja e kapaciteteve, proceset zgjedhore, angazhimi qytetar, barazia gjinore dhe qeverisja e mirë.

Prishtinë, 20 qershor 2025- Misioni i OSBE-së në Kosovë ishte nikoqir i takimit të Komitetit Drejtues të Projektit Rajonal për Monitorimin e Gjykimeve në Luftën kundër Krimit të Organizuar dhe Korrupsionit në Ballkanin Perëndimor në Prishtinë, më 19 qershor 2025.