Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Prezenca e OSBE-së dhe Universiteti i Tiranës mbështesin kërkimin shkencor për krimin, shoqërinë, të drejtën penale dhe reformën në drejtësi
Publishing date: 10 qershor 2024
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Rinia, Sundimi i ligjit
Fakulteti i Drejtësisë i Universitetit të Tiranës, në bashkëpunim me Prezencën e OSBE-së dhe Universitetin e Pavias organizuan konferencën shkencore ndërkombëtare “Krimi, shoqëria, e drejta penale dhe reforma në drejtësi”, më 10 qershor 2024. Rreth 60 pjesëmarrësit diskutuan gjerësisht për prirjet aktuale të krimit dhe përgjigjen e drejtësisë penale ndaj krimit, përmes parandalimit, kundërvënies, ndërgjegjësimit dhe rehabilitimit të autorëve. Pjesëmarrësit përfshinin studentë të Masterit në Kriminologji që kanë bërë kërkime shkencore, studentë të tjerë të këtij programi, staf akademik të fakulteteve të Drejtësisë dhe të Shkencave Sociale, studiues të njohur, gjykatës, prokurorë dhe kandidatë të doktoraturës. “Konferenca ka si qëllimin e saj kryesor përfshirjen e kërkuesve të rinj për të qenë pjesë e aktiviteteve shkencore cilësore. Ngritja e Qendrës Kërkimore të Kriminologjisë do të rrisë trajnimin e kërkuesve të rinj dhe do të ketë mundësi për të përfituar fonde në projekte studimi”, tha rektori i Universitetit të Tiranës, Artan Hoxha. Dekania e Fakultetit të Drejtësisë, Dorina Hoxha, tha se përparësi e veprimtarive shkencore të qendrës do të jetë studimi i shkaqeve dhe i parandalimit të kriminalitetit, në të gjitha dimensionet e tij. “Programi Master në Kriminologji ka potencialin për të sjellë risi në Shqipëri, duke u larguar nga qasja klasike ndaj krimit, mbështetur te hetimi e ndëshkimi dhe duke i zhvendosur fokusin dhe përpjekjet te një qasje më gjithëpërfshirëse. Shpresojmë se një numër gjithnjë e më i madh profesionistësh të zbatimit të ligjit në Shqipëri do të përmirësojnë aftësitë e tyre dhe do të përdorin të dhënat empirike për ta trajtuar krimin me efikasitet n një perspektivë moderne e shkencore”, tha Mauro Puzzo, drejtues i Departamentit të Prezencës së OSBE-së për Shtetin e së Drejtës dhe të Drejtat e Njeriut. Në konferencë, folën edhe drejtori i Çështjeve Ndërkombëtare të Narkotikëve dhe Zbatimit të Ligjit në ambasadën amerikane në Shqipëri, John Kastning si edhe akademikë të Universitetit të Pavias dhe të Institutit të Kriminologjisë të Universitetit të Kembrixhit. Konferenca u organizua si pjesë e projektit të Prezencës së OSBE-së “Ngritja e një Programi Master në Kriminologji”, i cili mbështetet financiarisht nga Byroja e Shteteve të Bashkuara për Çështje Ndërkombëtare të Narkotikëve dhe Zbatimit të Ligjit dhe zbatohet në bashkëpunim të ngushtë me Fakultetin e Drejtësisë të Universitetit të Tiranës dhe me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme. Masteri në Kriminologji, i pari i këtij lloji në Shqipëri, është një program shumëdisiplinor, i orientuar drejt kërkimit. Ai ofron një kurrikulë gjithëpërfshirëse e të integruar, që mundëson karrierën në fusha të ndryshme të sistemit të drejtësisë. Programi u mundëson studentëve të eksplorojnë ndërlidhjet mes krimit, drejtësisë dhe shoqërisë, në kontekst krahasues, si edhe promovimin e drejtësisë restauruese për viktimat dhe përgjigjet me në qendër viktimat. Përmes programit master, Prezenca synon të përmirësojë kapacitetet kërkuese të profesionistëve, akademikëve dhe politikëbërësve në Shqipëri në identifikimin e shkaqeve rrënjësore të krimit. Një nga arritjet e projektit është ngritja e Qendrës Kërkimore të Kriminologjisë, në Fakultetin e Drejtësisë. Nëpërmjet Qendrës, kërkimi shkencor do t'i nënshtrohet kontrollit të cilësisë dhe përputhshmërisë me kornizën ligjore, për të ofruar analiza të sakta mbi shkaqet rrënjësore, modelet, nxitësit e krimit dhe parandalimin e krimit. Kërkimi në kriminologji qëndron në qendër të teorisë së kriminologjisë, ndikon në zhvillimin e politikave sociale, publike dhe të sigurisë, si edhe informon praktikën e drejtësisë penale.
Njësitë e qenve të policisë nga Ballkani Perëndimor shfaqin aftësitë në zbulimin e narkotikëve dhe armëve të zjarrit, në veprimtarinë rajonale organizuar nga Prezenca e OSBE-së në Shqipëri
Publishing date: 7 qershor 2024
Content type: News
Where we are: Prezenca e OSBE-së në Shqipëri
What we do: Kontrolli i armëve, Policimi, Reforma dhe bashkëpunimi ushtarak
Për herë të parë në Shqipëri, Prezenca e OSBE-së, në bashkëpunim të ngushtë me Ministrinë e Brendshme dhe Policinë e Shtetit organizoi një demonstrim rajonal të njësive të qenve të policisë (K9) në zbulimin e narkotikëve dhe armëve të zjarrit. Veprimtaria u zhvillua në parkun “Rinia”, më 7 qershor 2024 dhe ishte e hapur për publikun. Veprimtaria rajonale mblodhi njësitë e qenve të policisë nga Tirana, Sarajeva, Podgorica, Shkupi dhe Prishtina, të cilat realizuan demonstrime në disiplina të ndryshme si bindja, zbulimi i narkotikëve dhe i armëve të zjarrit. Përgjatë dy ditëve përpara demonstrimit, ekipet nga Ballkani Perëndimor realizuan një stërvitje të përbashkët në mjediset e Institutit të Përgatitjes së Qenve të Policisë së Shtetit. “Duke pasur parasysh sfidat e ngjashme me të cilat përballen vendet e rajonit, kjo veprimtari shërben si platformë për të gjitha juridiksionet e Ballkanit Perëndimor, për ekspertët dhe për komunitetin e donatorëve për të shkëmbyer njohuritë dhe aftësitë e njësive të qenve të policisë, duke përfituar njëkohësisht prej projekteve ndihmuese të OSBE-së. Ne besojmë fuqimisht se këto ndërhyrje do të zgjerojnë kapacitetet e qenve të policisë për zbulimin e armëve të vogla e të lehta”, tha Kryetari i Prezencës, ambasadori Michel Tarran, në hapje të veprimtarisë. Ministri i Brendshëm, Taulant Balla, tha se, në 300 ditët e fundit, Policia e Shtetit ka zhvilluar një operacion të rëndësishëm kundër fenomenit të armëmbajtjes pa leje dhe ka sekuestruar 415 armë zjarri, si edhe një numër shumë më të madh armësh të ftohta. “Kjo na dëshmon se kemi një shpërndarje dhe prezencë të madhe të armëve të vogla dhe të lehta te qytetarët dhe, prandaj, është koha të bashkojmë të gjitha forcat kundër këtij fenomeni, i cili na sjell gjithmonë ngjarje kriminale me pasoja. Kemi një dialog të shkëlqyer me OSBE-në, e cila është e fokusuar në rritjen e kapaciteteve për të kontrolluar dhe zvogëluar rrezikun e përhapjes dhe keqpërdorimit të armëve të vogla e të lehta, të cilat përbëjnë një kërcënim serioz për sigurinë publike dhe stabilitetin”, tha Balla. Demonstrimi rajonal ishte ndër veprimtaritë e shumta të projektit “Asistencë për autoritetet e Republikës së Shqipërisë për uljen e rrezikut të përhapjes së armëve dhe keqpërdorimit të armëve të vogla dhe të lehta (AVL)”, i cili zbatohet nga Prezenca e OSBE-së, me fonde të Bashkimit Evropian, Gjermanisë dhe Francës. Veprimtaria u organizua edhe me mbështetjen e Njësisë së Forumit të OSBE-së për Bashkëpunim në Fushën e Sigurisë dhe në bashkërendim me projektet e OSBE-së për AVL-të në Ballkanin Perëndimor. Edhe në të shkuarën, projekti i OSBE-së për armët e vogla e të lehta ka qenë pararendës për organizimin e tryezave rajonale të punës për njësitë e qenve të policisë.
Turizëm me ndërgjegje: Grupet shqiptare të interesit mblidhen për të diskutuar kujdesin e duhur për të drejtat e njeriut në këtë industri
Publishing date: 7 qershor 2024
Content type: News
Where we are: Prezenca e OSBE-së në Shqipëri, Office of the Special Representative and Co-ordinator for Combating Trafficking in Human Beings
What we do: Combating trafficking in human beings
OSBE-ja ka marrë një qëndrim proaktiv në adresimin e abuzimeve të të drejtave të njeriut brenda zinxhirëve të furnizimit, duke u fokusuar veçanërisht në parandalimin dhe luftimin e trafikimit të qenieve njerëzore dhe shfrytëzimit të punës në sektorin e turizmit.
OSBE-ja zhvillon brezin e ardhshëm të instruktorëve për dokumentet e udhëtimit në Tiranë
Publishing date: 7 qershor 2024
Content type: News
Where we are: Prezenca e OSBE-së në Shqipëri, OSCE Secretariat
What we do: Menaxhimi i kufijve
Nga data 3 deri më 7 qershor 2024, Departamenti i Kërcënimeve Tejkombëtare i OSBE-së (TNTD), në bashkëpunim të ngus htë me Prezencën e OSBE-së në Shqipëri, organizoi kursin përgatitor për instruktorët në dallimin e dokumenteve të falsifikuara dhe të mashtruesve në pikat e kalimit kufitar, në Tiranë, Shqipëri. Në kurs morën pjesë pesë oficerë, dy gra dhe tre burra, nga Policia e Shtetit dhe ajo Kufitare.
Prezenca e OSBE-së, Komisioni Qendror i Zgjedhjeve organizojnë tryezë teknike për rritjen e rolit të organeve ligjzbatuese kundër shitblerjes së votës dhe shkeljeve të tjera zgjedhore në Shqipëri
Publishing date: 6 qershor 2024
Content type: News
Where we are: Prezenca e OSBE-së në Shqipëri
What we do: Zgjedhjet, Sundimi i ligjit
Në funksion të zgjedhjeve parlamentare të vitit 2025 në Shqipëri, Prezenca e OSBE-së dhe Komisioni Qendror i Zgjedhjeve (KQZ) organizuan, më 6 qershor 2024, një tryezë teknike për rritjen e rolit të organeve ligjzbatuese kundër shitblerjes së votës dhe shkeljeve të tjera zgjedhore. Tryeza shërbeu si një platformë për përfaqësuesit dhe ekspertët e agjencive e zbatimit të ligjit, institucioneve të tjera shtetërore dhe publike, shoqërisë civile, medias dhe organizatave ndërkombëtare për të diskutuar rreth përmirësimeve të mundshme të procedurave të hetimit dhe zbatimin e tyre në kohë, duke nxitur raportimin e qytetarëve dhe rritjen e bashkërendimit ndërmjet organet ligjzbatuese dhe institucionet përkatëse. “Me afrimin e zgjedhjeve parlamentare të 2025-s, tani është koha e duhur për të marrë në konsideratë rekomandimet e OSBE/ODIHR-it dhe adresuar këto çështje, për të rritur performancën e institucioneve shtetërore në trajtimin e shitblerjes së votës dhe shkeljeve të tjera zgjedhore”, tha ambasadori Michel Tarran, Kryetar i Prezencës së OSBE-së, në hapje të takimit. “Prezenca mirëpret çdo nismë që i jep përparësi luftës kundër krimeve zgjedhore, përpara zgjedhjeve të ardhshme parlamentare. Ne jemi të gatshëm të ofrojmë mbështetje sipas nevojës”, shtoi ai. Komisioneri Shtetëror i Zgjedhjeve, Ilirjan Celibashi, tha: “Jemi në momentin që të kuptojmë se si mund t’i përmirësojmë çështjet e integritetit zgjedhor, duke adresuar problematikat që e cenojnë këtë integritet në mënyrën më të mirë të mundshme. KQZ-ja ka rolin e vet, por ka shumë për t’u bërë dhe nga institucionet e tjera”. Diskutimet në tryezë u përqendruan te gjetjet e raporteve të vëzhgimit të zgjedhjeve të OSBE/ODIHR-it dhe rekomandimet e tyre për rritjen e integritetit dhe drejtësisë në zgjedhjet e ardhshme. Pjesëmarrësit analizuan efektivitetin e praktikave në trajtimin e shkeljeve zgjedhore në dy zgjedhjet e fundit, pas ndryshimeve ligjore të miratuara me konsensus të vitit 2020, duke identifikuar masat e suksesshme dhe fushat për përmirësim. Ata theksuan, gjithashtu, domosdoshmërinë e dialogut dhe të bashkëpunimit të vazhdueshëm midis të gjithë aktorëve për të siguruar një proces zgjedhor transparent dhe të besueshëm, si edhe rëndësinë e rritjes së ndërgjegjësimit të publikut për pasojat e shitblerjes së votës dhe shkeljeve të tjera zgjedhore. Tryeza përfundoi duke vënë në dukje arritjet dhe sfidat në lidhje me përpjekjet institucionale për të adresuar shkeljet zgjedhore, të cilat kërkojnë zbatimin në kohë të rekomandimeve të diskutuara dhe punën e përbashkët drejt një sistemi zgjedhor më transparent dhe të drejtë në Shqipëri.
Të rinj nga Evropa Juglindore hartojnë rekomandime politikash për parandalimin e krimit të organizuar dhe të korrupsionit, në Forumin Rinor të organizuar nga OSBE-ja
Publishing date: 24 maj 2024
Content type: News
Where we are: Prezenca e OSBE-së në Shqipëri, Office of the Co-ordinator of OSCE Economic and Environmental Activities, Transnational Threats Department
What we do: Veprimtaritë ekonomike, Rinia
Nga 21 deri më 24 maj 2024, Sekretariati i OSBE-së, në bashkëpunim me Prezencën e OSBE-së në Shqipëri, mbajti Forumin e Dialogut Rinor të Evropës Juglindore për Parandalimin e Krimit të të Rinjve në Durrës, Shqipëri. Forumi mblodhi rreth 20 të rinj nga Shqipëria, Bosnjë-Hercegovina, Mali i Zi, Maqedonia e Veriut dhe Serbia me qëllim rritjen e besimit te të rinjtë në rajon.
OSBE-ja dhuron mjete kundër zjarrit për zonat e mbrojtura në Shqipëri
Publishing date: 3 maj 2024
Content type: News
Where we are: Prezenca e OSBE-së në Shqipëri
Kryetarja në Detyrë e Prezencës së OSBE-së në Shqipëri, Clarisse Pasztory, u dorëzoi administratave rajonale të zonave të mbrojtura të Kukësit dhe Dibrës mjete kundër zjarrit në natyrë, gjatë një ceremonie që u zhvillua në Peshkopi, më 3 maj 2024. “Ruajtja e zonave të mbrojtura, si ajo Korab-Koritnik, është një synim dhe angazhim i përbashkët. Ka shumë që ia vlen të mbrojmë këtu: mjedisin, njerëzit që jetojnë këtu dhe njerëzit që vijnë për të vizituar e për t’u rigjallëruar,” tha Pasztory. Në veprimtari, morën pjesë edhe zëvendësministri i Brendshëm Besfort Lamallari, Drejtori i Përgjithshëm i Agjencisë Kombëtare Mbrojtur Daniel Pirushi, autoritetet vendore dhe zyrtarë nga Zyra e Koordinatorit të OSBE-së për Veprimtaritë Ekonomike dhe Mjedisore (OCEEA). Pajisjet- të blera në kuadër të projektit pilot të OSBE-së “Zonat e mbrojtura rezistente ndaj zjarrit: malet e Sharrit dhe zona e masivit të Korabit”- përbëhen nga një sistem zjarrfikës i motorizuar, ventilator ajri me energji elektrike, pompa shpine, mjete shumëfunksionale, fshesa zjarri, pishtar dore-flakëlëshues dhe kostume kundër zjarrit për 20 zjarrfikës. Projekti synon të përmirësojë menaxhimin e zjarrit në natyrë dhe përfshirjen e komunitetit në përpjekjet për parandalimin e zjarrit. Projekti mbështeti zhvillimin e një studimi paraprak për adresimin e sfidave të përbashkëta të sigurisë të lidhura me klimën, i cili identifikoi zjarret si një nga rreziqet e sigurisë. Duke u bazuar te ky studim, projekti mbështeti hartimin e një strategjie të përbashkët bashkëpunimi për ndryshimet klimatike dhe sigurinë në malet e Sharrit dhe në zonën e masivit të Korabit, si edhe planin e zbatimit të saj. Projekti pilot zbatohet në kuadër të projektit të OSBE-së me fonde jashtëbuxhetore “Forcimi i përgjigjeve ndaj rreziqeve të sigurisë nga ndryshimet klimatike në Evropën Juglindore, Evropën Lindore, Kaukazin e Jugut dhe Azinë Qendrore”.