Publications

Во оваа брошура, прирачникот за гласачите “Што е локална самоуправа и како ја избираме” е претворан во формат лесен за читање, со цел да биде достапен за лицата со потешкотии во учењето и пошироката публика. Брошурата, подготвена од Државната изборна комисија (ДИК) на Република Северна Македонија и Мисијата на ОБСЕ во Скопје, има за цел да го зголеми знаењето на гласачите за локалната самоуправа, телата што се избираат на локалните избори и специфичностите на локалните избори. Прирачникот дава кратки и едноставни информации за улогата и надлежностите на градоначалниците и општинските совети во изборниот процес.

Прирачникот, подготвен од Државната изборна комисија (ДИК) и Мисијата на ОБСЕ во Скопје, има за цел да го зголеми знаењето на гласачите за локалната самоуправа, органите што се избираат на локалните избори и специфичностите за локалните избори. Прирачникот дава кратки и едноставни информации за улогата и надлежностите на градоначалниците и општинските совети во Северна Македонија, правото да бидат избрани, изборните модели што се користат за избор на градоначалник и општински совет, изборната кампања и финансирањето на локални избори. Дополнително, дава преглед на основните принципи на демократското владеење и можностите за учество на граѓаните во процесот на донесување одлуки на локално ниво.

Брошурата за млади гласачи ја претставува содржината на Прирачникот за млади гласачи, подготвена од Државната изборна комисија (ДИК) на Република Северна Македонија и Мисијата на ОБСЕ во Скопје, во лесен формат за читање. Истиот има за цел да ги презентира информациите поврзани со политичкото и изборното учество на младите во земјата, зошто изборите и гласањето се важни за младите жени и мажи, значењето на инклузивните избори и упатствата за процесот на гласање во формат достапен за лицата со потешкотии во учењето.

Прирачникот, подготвен од Државната изборна комисија (ДИК) и Мисијата на ОБСЕ во Скопје, има за цел да го поттикне политичкото и изборното учество на младите во земјата. Исто така ги објаснува моделите и телата за младинско политичко учество; зошто изборите и гласањето се важни за младите жени и мажи и значењето на инклузивните избори. Публикацијата, исто така, дава инструкции чекор-по-чекор за процесот на гласање. Прирачникот првично беше објавен во 2020 година. Ова е второ издание изменето во согласност со најновите измени на Изборниот законик.

Прирачникот за локални младински совети, подготвен во тесно партнерство со Агенцијата за млади и спорт, е практична и вредна алатка и за општинските службеници и за младите во врска со нивниот ангажман во локалните младински совети. Има за цел да го поттикне локалното учество на младите во овие тела во согласност со Законот за младинско учество и младински политики. Прирачникот содржи практични чекори како да се воспостави локален младински совет, улоги и одговорности и за општинските службеници и за членовите на младинскиот совет и за процесот на примопредавање помеѓу раководството во заминување и новото раководство. Подготвен е на македонски јазик и преведен на англиски, албански, турски, српски и ромски јазик.

Овој документ, подготвен од Мисијата на ОБСЕ во Скопје, е прв обид да се дискутираат врските помеѓу корупцијата и родовата нееднаквост, поврзани со ситуацијата во Северна Македонија. Трудот се однесува на националниот контекст и меѓународните / ОБСЕ заложби во областа на демократско управување и спречување на корупција, родово специфичните форми на корупцијата, корелацијата помеѓу застапеноста на жените во политичкиот живот и нивоата на корупција. Овој документ за дискусија претставува пионерски чекор за отворање дебата, издигнување на оваа тема на повисоко ниво на внимание кај креаторите на политиката, граѓанското општество и пошироката јавност кон признавање, документирање и институционализирање на родовите форми на корупција во националното законодавство и, на крајот, да придонесе за намалување на влијанието на корупцијата врз жените.

Прирачникот е наменет за промоција и имплементација на принципите на демократско управување во рамките на општинските совети во Северна Македонија. Тој е наменет да промовира концепти на инклузивност, ефикасност, транспарентност и отвореност во работењето на советите на општините.

Целта на публикацијата е да ја објасни примената на Заедничката рамка за проценка (ЦАФ) како европски инструмент за управување со квалитетот за јавниот сектор во земјата. Публикацијата нуди практични информации за структурата на моделот ЦАФ, придобивките од неговата примена и процесот на спроведување. Илјадници организации во многу земји го применуваат ЦАФ моделот и се докажа дека тој дава резултати, придонесувајќи за модерна, ефикасна и професионална јавна администрација.

Првата Младинска стратегија на општина Кичево 2017-2022 беше развиена од Младинскиот совет на Кичево со поддршка на Мисијата на ОБСЕ во Скопје. Стратегијата, која беше едногласно усвоена од страна на Кичевскиот општински совет на 23 ноември 2016 година, е документ за застапување кој има цел да ја утврди стратешката определба на општина Кичево и Младинскиот совет за промоција на младинските прашања.

Оваа публикација е дел од проектните активности во рамки на соработката на Државната комисија за спречување на корупцијата и Мисијата на ОБСЕ во Скопје во 2013 и 2014 година. Во неа се објавени вкупно пет квалитативни анализи според методологијата Национален систем на интегритет на Транспаренси Интернешнл и три истражувања на јавното мислење спроведени од агенцијата Рејтинг за перцепцијата на граѓаните за постоење на корупција во избрани сектори од Државната програма за превенција и репресија на корупцијата и на судирот на интереси 2011-2015.