Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Prezantimi i Strategjisë së Ndërgjegjësimit dhe Komunikimit, Planit të Veprimit dhe Fushatës për Armët e Vogla dhe të Lehta
Publishing date: 6 qershor 2023
Content type: News
Where we are: Prezenca e OSBE-së në Shqipëri
TIRANË, 6 qershor 2023 – Prezenca e OSBE-së në Shqipëri, në bashkëpunim me Programin për Zhvillim të Kombeve të Bashkuara (PZHKB) në Shqipëri, Ministrinë e Brendshme dhe Policinë e Shtetit, prezantuan, sot, Strategjinë e Ndërgjegjësimit dhe Komunikimit, si edhe Planin Kombëtar 2023-2027 për Armët e Vogla dhe të Lehta (AVL). Në kuadrin e strategjisë, në këtë veprimtari u prezantua edhe fushata e parë ndërgjegjësuese për këtë temë. Armët e vogla dhe të lehta vijojnë të paraqesin një kërcënim serioz për sigurinë publike në Shqipëri [1]. Strategjia dhe plani i veprimit synojnë të ulin kërkesën për armë të vogla e të lehta dhe keqpërdorimin e tyre në Shqipëri, përmes një sërë veprimtarish ndërinstitucionale, të bashkërenduara dhe gjithëpërfshirëse. Po ashtu, strategjia thekson rëndësinë e përfshirjes konstruktive dhe të dialogut me publikun. Në hapje të takimit, folën zëvendësministri i Brendshëm Besfort Lamallari, Kryetarja në Detyrë e Prezencës së OSBE-së Clarisse Pasztory, Drejtori i Departamentit për Sigurinë Publike në Policinë e Shtetit Rebani Jaupi dhe Menaxheri i Programit të PZHKB-së në Shqipëri Vladimir Malkaj. Në të morën pjesë përfaqësues të partnerëve ndërkombëtarë për zhvillimin, Qendrës së OSBE-së për Parandalimin e Konfliktit, Pikës së Kontrollit për AVL-të në Evropën Juglindore dhe Lindore (SEESAC), organizatave të shoqërisë civile, Këshillave Vendorë për Sigurinë Publike dhe të medias. Në bashkërendim dhe duke u mbështetur tek arritjet e “Strategjisë për AVL-të, municionet dhe kontrollin e lëndëve shpërthyese”, strategjia synon të ulë kërkesën për AVL dhe keqpërdorimin e tyre në Shqipëri. Prezenca e OSBE-së e hartoi strategjinë nëpërmjet një sërë takimesh këshillimore me aktorë si Ministria e Brendshme, Policia e Shtetit, Komisioni Kombëtar për AVL-të, organizatat e shoqërisë civile, Këshillat Vendorë për Sigurinë Publike, grupet rinore, media, SEESAC dhe PZHKB-së në Shqipëri. Strategjia u zhvillua në bazë të studimeve mbështetur te të dhënat dhe përmban praktikat më të mira rajonale dhe ndërkombëtare të ndërgjegjësimit. Ndërsa PZHKB-ja fillon zbatimin e fushatës së ndërgjegjësimit, Prezenca e OSBE-së do të mbështetet mbi këto përpjekje duke vijuar me zbatimin e fushatave të tjera që përshkruhen në strategji. Strategjia dhe fushata e ndërgjegjësimit janë pjesë përbërëse e projekteve AVL që po zhvillohen nga Prezenca e OSBE-së dhe nga Zyra e PZHKB-së në Shqipëri në partneritet me Ministrinë e Brendshme dhe me Policinë e Shtetit. Projekti që zbatohet nga OSBE-ja financohet nga Bashkimi Evropian, Gjermania dhe Franca. Projekti që zbatohet nga PZHKB-ja mundësohet falë kontributeve financiare të Gjermanisë, Suedisë, Mbretërisë së Bashkuar, Francës, Vendeve të Ulëta dhe Norvegjisë dhe lehtësohet nga Fondi i Partnerëve të Udhërrëfyesit të Kontrollit të AVL-ve në Ballkanin Perëndimor. Po ashtu, projekti mbështetet nga Bashkimi Evropian. [1] Sipas Pikës së Kontrollit për AVL-të në Evropën Juglindore dhe Lindore (SEESAC), në vitin 2022, në Shqipëri, pati 430 incidente nga armët e vogla dhe të lehta, që çuan në 32 humbje jete.
Prezenca e OSBE-së në Shqipëri organizon vizitë kërkimore në universitetet e Oksfordit dhe të Kembrixhit
Publishing date: 5 qershor 2023
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Sundimi i ligjit
Nga 30 maji deri më 2 qershor 2023, Prezenca e OSBE-së në Shqipëri, së bashku me Universitetin e Tiranës dhe Fakultetin e Drejtësisë, organizoi një vizitë kërkimore në dy universitete të shquara në Mbretërinë e Bashkuar e në mbarë botën: në Universitetin e Oksfordit dhe në Universitetin e Kembrixhit. Vizita kishte si qëllim rritjen e kapaciteteve dhe të burimeve të Fakultetit të Drejtësisë në ofrimin dhe menaxhimin e programit të kriminologjisë, si edhe njohjen me praktikat më të mira për ngritjen dhe punën e qendrave kërkimore universitare. Delegacioni nga Shqipëria përbëhej nga Rektori i Universitetit të Tiranës, Prof. Dr. Artan Hoxha, Dekania e Fakultetit të Drejtësisë, Prof. Asoc. Dr. Dorina Hoxha, pedagogë të Fakultetit të Drejtësisë dhe Fakultetit të Shkencave Sociale dhe ekipi i projektit të OSBE-së “Ngritja e një Programi Master në Kriminologji”. Ata u takuan me profesorë dhe drejtues të dy universiteteve, mes të cilëve me Kryetarin e Departamentit të Sociologjisë në Universitetin e Oksfordit, Prof. Federico Varese, Drejtorin e Qendrës së Kriminologjisë të Oksfordit, Prof. Ian Loader dhe Drejtorin e Institutit të Kriminologjisë në Universitetin e Kembrixhit, Prof. Manuel Eisner. Ky shkëmbim do të kontribuojë edhe në ngritjen e Qendrës Kërkimore të Kriminologjisë, në Fakultetin e Drejtësisë në Tiranë, e cila do të mundësojë kapacitetet e qëndrueshme kërkimore në fushën e kriminologjisë, do të ofrojë mbështetje të vijueshme për Programin Master në Kriminologji dhe do të kontribuojë në hartimin e politikave bazuar te të dhënat. “Qendra Kërkimore e Kriminologjisë do të rrisë kërkimin shkencor dhe bashkëpunimin me të gjitha organet ligjzbatuese. Mbështetja e Institutit të Kriminologjisë të Universitetit të Kembrixhit do të na orientojë jo vetëm në metoda të reja të kërkimit shkencor, por edhe do të krijojë një bazë për zhvillimin e projekteve të përbashkëta në fusha të caktuara të kriminalitetit”, tha Dekania Hoxha. “Përfshirja e studentëve më të mirë pranë kësaj qendre është prioritet për të nxitur kërkuesit e rinj në fushën e kriminologjisë”, shtoi ajo. Drejtuesja e Projektit të OSBE-së, Alba Jorganxhi, tha: “Universitetet e Oksfordit dhe Kembrixhit njihen në tërë botën për cilësinë e shkëlqyer në kërkim dhe mësimdhënie. Bashkëpunimi që krijuam do të ndihmojë në mbështetjen e një qasjeje shumëdisiplinore në parandalimin e krimit në Shqipëri, veçanërisht duke zhvilluar lidhjet mes drejtësisë penale dhe asaj sociale. Jemi shumë të kënaqur që mundësojmë këtë shkëmbim dhe jemi gati të mbështesim çdo bashkëpunim të ardhshëm mes universiteteve”. Prezenca e OSBE-së e organizoi vizitën si pjesë e projektit të saj jashtëbuxhetor “Ngritja e një Programi Master në Kriminologji”, i cili mbështetet financiarisht nga Byroja e Shteteve të Bashkuara për Çështje Ndërkombëtare të Narkotikëve dhe Zbatimit të Ligjit dhe zbatohet në bashkëpunim të ngushtë me Fakultetin e Drejtësisë të Universitetit të Tiranës dhe me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme. Programi Master, i nisur në dhjetor 2020, ofron një kurrikulum gjithëpërfshirës e të integruar, që mundëson karrierën në fusha të ndryshme të sistemit të drejtësisë. Përmes programit master, Prezenca synon të përmirësojë kapacitetet kërkuese të profesionistëve, akademikëve dhe politikëbërësve në Shqipëri në identifikimin e shkaqeve rrënjësore të krimit.
Prezenca e OSBE-së mundëson bashkëpunimin mes Universitetit të Tiranës dhe Universitetit “Demokriti” të Trakës
Publishing date: 5 prill 2023
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Sundimi i ligjit
Më 4 prill 2023, Universiteti i Tiranës dhe Universiteti “Demokriti” i Trakës nënshkruan një marrëveshje bashkëpunimi, të mundësuar nga Prezenca e OSBE-së, në mjediset e universitetit grek. Memorandumi i mirëkuptimit synon të rregullojë bashkëpunimin mes dy universiteteve për shkëmbimin e dijeve dhe teknologjisë, përmes programeve dhe kërkimit të aplikuar, veçanërisht në fushën e kriminologjisë. Po ashtu, ai parashikon shkëmbime të stafit akademik dhe teknik, shkëmbimin e studentëve, stazhe dhe specializime, organizimin e vizitave studimore, seminare, konferenca, botime dhe veprimtari të ndryshme shkencore. Rektori i Universitetit të Tiranës, Prof. Dr. Artan Hoxha, i cili nënshkroi marrëveshjen me homologun e tij grek Dr. Fotios Maris, tha: “Vlerësojmë që, së bashku me Prezencën e OSBE-së, si mbështetëse e disa nismave të ndërmarra së fundmi, ky bashkëpunim do të ndikojë më tej në përmirësimin e veprimtarive akademike, në mbështetje të studentëve dhe të personelit të Fakultetit të Drejtësisë të Universitetit të Tiranës. Ky fakultet luan një rol të veçantë, ndër të tjera, në drejtim të ecurisë të reformës në drejtësi dhe në zhvillimin e strategjive dhe veprimtarive në luftën kundër krimit në përgjithësi, krimit të organizuar dhe korrupsionit në veçanti, që ndikohen edhe nga rritja e kapaciteteve nëpërmjet bashkëpunimit ndërkombëtar”. Veprimtaria u organizua si pjesë e projektit “Për ngritjen e një programi master në kriminologji”, i cili mbështetet financiarisht nga Byroja e Shteteve të Bashkuara për Çështje Ndërkombëtare të Narkotikëve dhe Zbatimit të Ligjit. Prezenca e OSBE-së e zbaton këtë projekt në bashkëpunim të ngushtë me Fakultetin e Drejtësisë dhe me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme. Menaxherja e projektit, Alba Jorganxhi, tha: “Prezenca mbështet bashkëpunimin mes Universitetit të Tiranës dhe Universitetit “Demokriti” të Trakës për të rritur kapacitetet kërkimore të profesionistëve shqiptarë të drejtësisë penale, akademikëve dhe politikëbërësve në parandalimin dhe luftën kundër krimit. Bashkëpunimi rajonal në fushën akademike dhe atë të kriminologjisë mundëson arritjen e standardeve më të mira ndërkombëtare të shtetit të së drejtës dhe të të drejtave të njeriut”. Në veprimtari morën pjesë edhe dy zëvendësrektorët e Universitetit “Demokriti” të Trakës, dekanët e fakulteteve të drejtësisë të të dyja universiteteve, si dhe anëtarë të tjerë të stafit akademik. Ajo u pasua nga takime të përbashkëta me profesorë e studentë të Universitetit “Demokriti”. Programi Master në Kriminologji – i krijuar në dhjetor 2020 me nismën dhe mbështetjen e Prezencës së OSBE-së – u mundëson studentëve të eksplorojnë ndërlidhjet mes krimit, drejtësisë dhe shoqërisë, në kontekst krahasues, si edhe promovimin e drejtësisë restauruese për viktimat dhe përgjigjet me në qendër viktimat. Kurrikulumi i tij gjithëpërfshirës dhe i integruar mundëson karrierën në fusha të ndryshme të sistemit të drejtësisë. Përmes programit master, Prezenca synon të përmirësojë kapacitetet kërkuese të profesionistëve, akademikëve dhe politikëbërësve në Shqipëri në identifikimin e shkaqeve rrënjësore të krimit.
Prezenca e OSBE-së dhe Gjykata Kushtetuese shpallin fituesit e konkursit për ankesat kushtetuese individuale
Publishing date: 14 dhjetor 2022
Content type: News
Where we are: Prezenca e OSBE-së në Shqipëri
What we do: Arsimi, Rinia, Sundimi i ligjit
Prezenca e OSBE-së dhe Gjykata Kushtetuese shpallën sot fituesit e konkursit për hartimin ligjor të ankesave kushtetuese individuale. Në konkursin e organizuar nga Prezenca e OSBE-së dhe Gjykata Kushtetuese morën pjesë 27 studentë të drejtësisë nga universitete publike dhe shtetërore nga mbarë Shqipëria. Punimet e tyre u vlerësuan nga një komision i përbërë nga ish-gjyqtarë dhe këshilltarë ligjorë të Gjykatës Kushtetuese. Çmimet për fituesit u dhanë në një ceremoni, ku morën pjesë Kryetari i Prezencës së OSBE-së në Shqipëri, ambasadori Guido De Sanctis, Kryetarja e Gjykatës Kushtetuese Vitore Tusha dhe ish-anëtari i Gjykatës Përparim Kalo. Gjatë këtij viti, Prezenca zhvilloi trajnime për hartimin e ankesave kushtetuese individuale me 200 studentë të universiteteve publike të Tiranës, Vlorës dhe Shkodrës. Projekti u mbështet në kërkesën e Gjykatës Kushtetuese për të bërë të njohur mekanizmin e ankesave kushtetuese individuale dhe për të trajtuar çështjet e cilësisë së dobët apo papranueshmërisë së ankesave. Reforma kushtetuese në drejtësi e vitit 2016, zgjeroi rrethin e subjekteve dhe juridiksionin e Gjykatës Kushtetuese në drejtim të ankimit kushtetues individual, duke mundësuar ankimet e individëve kundër çdo lloj akti të pushtetit publik që shkel të drejtat dhe liritë e tyre themelore të garantuara nga Kushtetuta e Republikës së Shqipërisë.
Prezenca e OSBE-së organizon vizitë studimore për zyrtarët shqiptarë në sistemin 41-bis të Italisë
Publishing date: 13 dhjetor 2022
Content type: News
Where we are: Prezenca e OSBE-së në Shqipëri
Nga 5 deri më 9 dhjetor 2022, Prezenca e OSBE-së në Shqipëri organizoi një vizitë studimore për zyrtarë shqiptarë në Regjimin e Posaçëm 41-bis në Itali. Vizita ishte e para e këtij lloji, që pason zbatimin e Regjimit të Posaçëm në Shqipëri në vitin 2020, bazuar në modelin italian 41-bis. Regjimi i Posaçëm vendos një sërë kufizimesh mbi të burgosurit, ndaj, nëse aplikohet në mënyrë të papërshtatshme, mund të çojë në shkelje të të drejtave të njeriut. Delegacioni me 12 anëtarë kryesohej nga Drejtori i Policisë së Burgjeve Paulin Rajta dhe përbëhej nga Drejtori i Shërbimit të Kontrollit të Brendshëm në sistemin e burgjeve në Ministrinë e Drejtësisë Klevis Qose; deputeti Denis Deliu, anëtar i Komisionit të Sigurisë dhe i Komisionit të Ligjeve, Administratës Publike dhe të Drejtave të Njeriut; Komisioneri për Mekanizmin Kombëtar për Parandalimin e Torturës pranë Avokatit të Popullit Ahmet Prençi; Këshilltarja Ligjore / Drejtuesja e Projektit nga Prezenca e OSBE-së Alba Jorganxhi, dhe zyrtarë të lartë të burgjeve. Delegacioni shqiptar u prit nga gjyqtari Carlo Renoldi, Shef i Departamentit të Administratës së Burgjeve dhe nga Gjeneral Brigade z. Mauro D’Amico, Drejtor i Grupit Operativ të Lëvizshëm (Gruppo Operativo Mobile, GOM) në Ministrinë e Drejtësisë italiane, të cilët bashkorganizuan dhe bashkërenduan vizitën studimore. Pjesëmarrësit u pajisën me njohuri për standardet më të mira vendase dhe ndërkombëtare mbi menaxhimin në përputhje me të drejtat e njeriut për të burgosurit me rrezikshmëri të lartë. Ata përfituan edhe nga përvoja dhe praktikat e Policisë Italiane të Burgjeve në burgjet e vizituara. Programi përfshinte një vizitë në mjediset e seksionit 41-bis në Sassari dhe L'Aquila dhe një vizitë në Shkollën e Trajnimit të Burgjeve “Giovanni Falcone” në Romë, ku pjesëmarrësit u njohën me kurrikulën e trajnimit për personelin e burgjeve italiane. Vizita studimore ishte pjesë e projektit të Prezencës “Për forcimin e mbrojtjes së të drejtave të njeriut në Shqipëri” dhe projektit me fonde jashtëbuxhetore “Përgjigjet ndaj terrorizmit në sistemin e drejtësisë penale në Shqipëri në përputhje me shtetin e së drejtës” të financuar nga qeveria e Austrisë dhe ajo e Norvegjisë. Vizita studimore bazohet në mbështetjen e Prezencës për reformën e burgjeve në Shqipëri dhe përfshirjen e saj aktive në promovimin e të drejtave të personave të dënuar dhe të paraburgosur. Në fillim të këtij viti, Prezenca hartoi dhe mbajti një modul trajnimi për personelin e burgjeve të regjimit të posaçëm. Në vitin 2021, ajo organizoi një seancë trajnimi të stafit të burgjeve të Regjimit të Posaçëm mbi menaxhimin në përputhje me të drejtat e njeriut të të burgosurve me rrezikshmëri të lartë. Ndërsa në vitin 2020, Prezenca përgatiti një raport vlerësimi të regjimit të posaçëm për të burgosurit e sigurisë së lartë në Shqipëri, në përputhje me praktikat e mira ndërkombëtare dhe në funksion të nevojave specifike të të dënuarve. Përveç regjimit të posaçëm, Prezenca ka kontribuar në arritjet në sistemin penitenciar, duke ofruar mbështetje legjislative për paketën ligjore për sistemin penitenciar; duke punuar për Parandalimin dhe Luftën ndaj Ekstremizmit të Dhunshëm dhe Radikalizmit që çon në Terrorizëm (P/CVERLT) në burgje dhe në shërbimin e provës; si edhe duke krijuar programin Master në Kriminologji në Universitetin e Tiranës.
Prezenca e OSBE-së organizon vizitë pune për institucionet shqiptare, në Kroaci, lidhur me personat e zhdukur gjatë regjimit komunist
Publishing date: 27 shtator 2022
Content type: News
Where we are: Prezenca e OSBE-së në Shqipëri
What we do: Të drejtat e njeriut, Sundimi i ligjit
Përvoja e gjerë e Kroacisë në hetimin dhe gjykimin e rasteve të zhdukjeve me forcë mund t’i ndihmojë autoritetet shqiptare në çuarjen përpara të punës për identifikimin dhe gjetjen e eshtrave të personave të zhdukur gjatë regjimit komunist. Me këtë qëllim, nga 21 deri më 23 shtator 2022, Prezenca e OSBE-së në Shqipëri organizoi një vizitë studimore në Kroaci për përfaqësues të institucioneve kryesore në këtë fushë, si Prokuroria e Përgjithshme, Autoriteti për Informimin mbi Dokumentet e ish-Sigurimit të Shtetit, Instituti i Mjekësisë Ligjore dhe Policia Shkencore. Programi përfshinte një vizitë në Ministrinë për Çështjen e Veteranëve dhe në Institutin e Mjekësisë Ligjore dhe të Kriminologjisë të Kroacisë. Duke folur në takimin e organizuar në ministri, zëvendëskryeministri dhe ministri për Çështjet e Veteranëve, Tomo Medved, ofroi mbështetjen e pakursyer të institucionit të tij për autoritetet shqiptare në përpjekjet e tyre për të bërë progres në identifikimin dhe gjetjen e eshtrave të të zhdukurve. Zyrtarë të kësaj ministrie e njohën delegacionin shqiptar me modelin kroat të kërkimit të personave të zhdukur, ndërsa përfaqësues të Ministrisë së Brendshme, Prokurorisë së Zagrebit dhe të Arkivave Shtetërore folën për rolin e tyre në procesin e kërkimit. Vizita u shërbeu ekspertëve shqiptarë, përfshi atyre të Institutit të Mjekësisë Ligjore dhe të Policisë Shkencore, edhe për të krijuar lidhje me homologët kroatë për bashkëpunim të ardhshëm në çështjen e kërkimit të personave të zhdukur. Vizita u financua nga Fondacioni Konrad Adenauer (KAS) dhe u organizua nga Prezenca e OSBE-së në Shqipëri, në bashkëpunim me Ministrinë për Çështjen e Veteranëve të Kroacisë, KAS-in dhe Komisionin Ndërkombëtar për Personat e Zhdukur.
Prezenca e OSBE-së zhvillon takimin “Të rinjtë flasin” mbi zhdukjet me forcë gjatë regjimin komunist në Shqipëri dhe rolin e të rinjve në proceset e drejtësisë tranzitore
Publishing date: 27 maj 2022
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Rinia, Sundimi i ligjit
Rreth 80 studentë të Universitetit të Korçës morën pjesë në një takim “Të rinjtë flasin”, të fokusuar në çështjen e personave të zhdukur gjatë regjimit komunist, më 26 maj 2022. Veprimtaria, e organizuar nga Prezenca e OSBE-së në Shqipëri dhe nga Grupi Këshillimor Rinor i saj – kishte për qëllim rritjen e përfshirjes së të rinjve në proceset e drejtësisë tranzitore në rrugën drejt pajtimit me të kaluarën, konsolidimit demokratik dhe ndërtimit të paqes. Pas shfaqjes së një dokumentari për personat e zhdukur, studiues të kontraktuar nga Prezenca i njohën studentët me gjetjet e tyre në këtë fushë, me fokus të veçantë te gratë e zhdukura, aspektet ligjore dhe sociologjike të persekutimit politik dhe standardet ndërkombëtare. Grupi Këshillues Rinor foli për rolin e të rinjve në proceset e drejtësisë tranzitore dhe drejtoi diskutimet me studentët. Gjatë takimit, u diskutua në detaje shkeljet e rënda sistematike të të drejtave të njeriut gjatë periudhës komuniste në Shqipëri, që çuan në mbi 6 000 persona të zhdukur. Të rinjtë mësuan se si qytetarët burgoseshin apo ekzekutoheshin pa një proces gjyqësor, se si një numër personash të burgosur humbën jetën për shkak të rraskapitjes, kequshqyerjes dhe sëmundjeve, e se si shumë fëmijë të lindur në kampet e punës së detyruar nuk u regjistruan kurrë dhe nuk mundën të mbijetonin në ato vende. Gjithashtu, ata u ndalën edhe në historitë e viktimave që humbën jetën në përpjekje për t'i shpëtuar regjimit duke u larguar nga vendi dhe që u ekzekutuan në pikat e kalimeve kufitare; të burgosurit që u ekzekutuan gjatë përpjekjes për të ikur nga vendet e paraburgimit; dhe individët e zhdukur gjatë shërbimit ushtarak. “Kërkimi dhe gjetja e personave të zhdukur është detyrim i një shteti sipas kuadrit ligjor kombëtar dhe ndërkombëtar. Që nga fillimet e konsolidimit të saj demokratik në vitet ‘90, Shqipëria ka bërë përpjekje të vijueshme për t'u marrë me të kaluarën e saj dhe fatin e të zhdukurve. Megjithatë, mbetet shumë për t’u bërë,” tha Cailean Maclean, Shef i Departamentit të Prezencës për Shtetin e së Drejtës dhe të Drejtat e Njeriut. Ky ishte forumi i dytë rinor për çështjen e personave të zhdukur që Prezenca organizoi këtë vit. I pari u zhvillua me studentë të Universitetit të Tiranës, në muajin shkurt. Prezenca njeh rolin e brezave të rinj në formësimin e së ardhmes demokratike të vendit dhe punon për t'i bashkuar ata për të eksploruar çështjen e personave të zhdukur, rolin e të rinjve në drejtësinë tranzitore dhe në implikimet që ajo ka në diskursin publik mbi të drejtat e njeriut, sundimin e ligjit dhe axhendën për Rininë, Paqen dhe Sigurinë në vend. Veprimtaria është pjesë e projektit të Prezencës “Forcimi i mbrojtjes së të drejtave të njeriut në Shqipëri” dhe i projektit “Të rinjtë në fokus II”, që financohet nga Agjencia Austriake e Zhvillimit, Ambasada Greke në Tiranë dhe Misioni i Përhershëm i Italisë në OSBE.