News and press releases

I hapur për: studentët në studimet diplomike dhe post-diplomike të Universitetit Shën Kirili dhe Metodi në Shkup, Universitetit Goce Delçev në Shtip, Universitetit Shën Kliment Ohridski në Manastir dhe Universitetit të Evropës Jug-Lindore. Data e fundit për dorëzimin e eseve: 15 nëntor 2024 Shpërblime: tre esetë më të mira do të marrin vauçerë për pajisje të TI-së (teknologjisë informative). Projekti për “Përforcimin e sundimit të së drejtës dhe të drejtave të njeriut në Maqedoninë e Veriut III”, ka për qëllim që të zhvillojë sundimin e së drejtës duke zbatuar standardet ndërkombëtare si dhe zotimet e OSBE-së në fushën e gjyqësorit dhe të drejtave themelore, në të njëjtën linjë si dhe prioritetet strategjike të Maqedonisë së Veriut. Ky projekt synon të përballet me sfida të ndryshme të fushës së pavarësisë së gjyqësorit dhe paanshmërisë, të së drejtës penale, luftës kundër korrupsionit, luftës kundër diskriminimit, barazisë gjinore dhe të drejtave themelore në Maqedoninë e Veriut, ashtu si janë identifikuar në dokumentet e ndryshme politike të qeverisë dhe hulumtimet e ekspertëve ndërkombëtar. Pas përfundimit me sukses të ligjeratave për luftën kundër korrupsionit, të organizuar në bashkëpunim me katër Universitetet vendore (Universiteti Shën Kirili dhe Metodi në Shkup, Universiteti Goce Delçev në Shtip, Universiteti Shën Kliment Ohridski në Manastir dhe Universiteti të Evropës Jug-Lindore) nga entuziazmi i shprehur i studentëve si dhe për inkurajimin për angazhim të mëtutjeshëm të tyre në lufteë kundër korrupsionit, Misioni i OSBE-së në Shkup organizon një garë në shkrimin e eseve për studentët. Kjo garë rrjedh si rezultat i entuziazmit të studentëve të cilët morën pjesë në këtë aktivitet të ligjëratave (master klasëve) për luftën kundër korrupsionit, gjatë së cilave studentëve ju ofruan ligjerata frymëzuese nga profesionistë të spikatur në fushën e luftës kundër korrupsionit, si dhe akademikë, ashtu edhe aktivistë.        Autorët e tre eseve më të mira do të fitojnë vauçerë për blerjen e pajisjeve të TI-së (teknologji informative). Ky konkurs do të jetë i hapur deri më 15 nëntor 2024.    Esetë duhet të paraqesin një kuptim të plotë bazuar në kuptimin faktik të natyrës komplekse të korrupsionit dhe gjithashtu duhet të japin ide reale se si të zvogëlohet korrupsioni. Autorët duhet të japin një ose disa argumente në lidhje me temën e zgjedhur për analizë dhe duhet të shpjegohet dhe përforcohet me disa burime të literaturës së besueshme nga ana akademike, ligjore ose politike. Rrjedhimisht, autorët janë të inkurajuar që të paraqesin mendimin e tare por gjithashtu duhet të jenë të sigurte që ky mendim është i bazuar në dëshmi të besueshme dhe bindëse. Esetë duhet të shkruhen në mënyre që të jenë mirë të strukturuar, të qartë e me përdorimin e gjuhës së përshtatshme.    Esetë duhet të bazohen në një nga këto tema të përgjithshme: Korrupsioni dhe rinia Korrupsioni dhe zgjedhjet/financimi i partive politike Aspektet penale të korrupsionit Korrupsioni dhe gjinia Këto tema shërbejnë si një drejtim i përgjithshëm dhe autorët duhet të jenë të lirë të zhvillojnë esetë e tyre në mënyrë më specifike përderisa qëndrojnë në vijë me një nga katër temat e përgjithshme. Esetë do të vlerësohen nga ana e një komisioni të përbërë nga tre profesorë, të cilët do t’i vlerësojnë esetë në bazë të kritereve si në vijim: Tema e esesë dhe relevanca (maks. 25 pikë) Kreativiteti dhe origjinaliteti i argumenteve dhe zgjedhjeve të propozuara (maks.25 pikë) Argumentimi dhe përdorimi i dëshmive dhe burimeve (maks.25 pikë) Gjuha, struktura dhe qartësia (maks.25 pikë) Esetë duhet të shkruhen në gjuhën angleze, duke përdorur Times New Roman, në madhësinë e fontit 12 dhe zbrazëtirë brenda rreshtave prej 1.5 dhe duhet të jenë të gjatë rreth 1400 dhe 1600 fjalë (rreth 3 faqe). Esetë më të gjata nuk do të merren parasysh. Esetë duhet të jenë punë origjinale e autorëve. Çdo shenjë e plagjiaturës (përfshirë këtu edhe përdorimin e Chat GPT) do të sanksionohet me diskualifikim nga kjo garë. INFO SESION Për studentët e interesuar, Misioni i OSBE-së në Shkup, një javë para afatit të dorëzimit të eseve do të organizojë një sesion informativ, me udhëzime më të detajuara për të përgatitur një ese më të mirë. Për të marrë informata më të hollësishme në lidhje me orën dhe datën e saktë të këtij sesioni, si dhe zoom linkun, dërgoni në e-mail me të dhënat tuaja deri tek Diana.Zhupanoska@osce.org. Procesi i aplikimit Udhëzimet për konkursin e eseve janë të qasshme edhe në gjuhën angleze dhe gjuhën maqedonase.     Autorët duhet të dërgojnë esetë e tyre ne e-mail te Diana.Zhupanoska@osce.org deri më 15 nëntor 2024 si një dokument i bashkangjitur në PDF. Me qëllim të lehtësimit në procesin e vlerësimit anonim, autorët duhet të theksojnë emrin dhe mbiemrin e tyre të plotë në tekstin e e-mailit, por jo të vendosin emrin e tyre në dokumentin PDF.   

Më 3 dhe 4 shtator 2024, Prezenca e OSBE-së në Shqipëri zhvilloi një trajnim dyditor me temë trafikimin e paligjshëm të armëve të zjarrit me pjesëmarrjen e zyrtarëve të Sektorëve për Hetimin e Trafiqeve të Policisë së Shtetit Shqiptar në nivel qendror dhe vendor, prokurorëve të Prokurorisë së Përgjithshme, Prokurorisë së Posaçme kundër Korrupsionit dhe Krimit të Organizuar (SPAK) dhe hetuesve të Byrosë Kombëtare të Hetimit (BKH). Për organizimin e kësaj veprimtarie, Prezenca bashkëpunoi me Programin Ndërkombëtar të Ndihmës për Trajnimin e Hetimeve Kriminale (ICITAP) të Departamentit të Drejtësisë të Shteteve të Bashkuara. Dy ekspertë nga Zyra Federale e Policisë Kriminale Gjermane (BKA) dhe tre ekspertë nga Policia Kombëtare Holandeze me përvojë të bollshme në trafikimin e armëve të zjarrit prezantuan dhe ndanë përvojat, praktikat më të mira dhe studimet konkrete të forcave të tyre policore. Nëpërmjet komunikimit të drejtpërdrejtë dhe diskutimit të hapur, ekspertët krijuan një platformë për bashkëpunim të mëtejshëm e të ngushtë dhe hetime të përbashkëta. Trajnimi kishte për synim të përmirësonte aftësitë dhe metodat hetimore e analitike të agjencive ligjzbatuese shqiptare, veçanërisht në marrjen e informacionit cilësor e të besueshëm, duke përdorur teknika hetimore speciale në luftën kundër trafikimit të armëve të zjarrit. Kjo veprimtari u zhvillua në kuadrin e projektit të Prezencës së OSBE-së në Shqipëri “Mbështetja e agjencive shqiptare të zbatimit të ligjit për të trajtuar në mënyrë efektive krimet e rënda dhe krimin e organizuar dhe për të përmirësuar bashkëpunimin rajonal V”, i cili synon të mbështesë e ndihmojë agjencitë ligjzbatuese shqiptare në luftimin e krimit të organizuar kombëtar e ndërkombëtar dhe krimeve të rënda në mënyrë efektive e në përputhje me praktikat më të mira ndërkombëtare, si dhe në përmirësimin e bashkëpunimit me partnerët ndërkombëtarë e rajonalë.

Shkup, shtator 2024  – Misioni i OSBE-së në Shkup ka publikuar hulumtimin gjithëpërfshirës mbi “Rinia dhe Siguria: Perceptimet, qëndrimet dhe sfidat e të rinjve në Maqedoninë e Veriut” duke hedhur dritë mbi shqetësimet, perceptimet, sfidat dhe pritjet të rinisë në vend në lidhje me sigurinë dhe mbrojtjen. Hulumtimi shpalosë njohuri të rëndësishme për politikëbërësit, institucionet relevante në të gjitha nivelet, edukatorët, dhe organizatat e shoqërisë civile dhe sugjeron kornizë dhe rrugë konstruktive për zhvillim më të avancuar të politikave dhe implementimin e tyre. Gjithashtu nënvizon rëndësinë e qasjes bashkëpunuese për të adresuar çështjet dhe shqetësimet të identifikuara përmes intervenimeve të synuara me synim të përfshirjes më të madhe të të rinjve në zhvillimin e politikave të bazuara në dëshmi në nivel lokal dhe atë kombëtar. Bashkëpunimi midis palëve të përfshira është thelbësor për të siguruar mjedis më të informuar, angazhuar dhe të sigurt për rininë në mbarë rajonin. Hulumtimi u zhvillua në mbarë vendin në shtator dhe tetor të vitit 2023, përmes 1,235 sondazheve telefonike duke synuar të anketuarit të moshës 15 deri më 29 vjeç, si dhe fokus gupet dhe intervistat e palëve të interesuara. Analiza ngërthen një spektër të gjerë të shqetësimeve dhe përvojave në këto sfera kyçe: 1. Perceptimi i rinisë mbi sigurinë aktuale dhe nivelet e sigurisë dhe pritjet për pesë vitet e ardhshme. Numri më i madh i të anketuarve (54%) e konsiderojnë shtetin pjesërisht të sigurt ose tërësisht të sigurt, por ka dhe 17% të të rinjve të cilët mendojnë se ky shtet nuk është vend i sigurt. Më shumë se një e katërta (27%) mendon se situata do të përkeqësohet. Veçanërisht, vajzat e reja raportojnë se ndjehen më pak të sigurta në dallim me bashkëmoshatarët e tyre djem, dhe pabarazitë rajonale janë të dukshëm, posaçërisht në rajonin verilindor. 2. Njohuria dhe pjesëmarrja e rinisë në Proceset Paqësore formale dhe joformale: Studimi zbulon dituri dhe njohuri shumë të ulët konceptuale të ndërtimit të paqes, me vetëm 26% të të anketuarve që e kuptojnë këtë koncept, dhe 87% pa ndonjë njohuri të aktiviteteve të sigurisë për ndërtimin e paqes nga ana e autoriteteve. Angazhimi në nismat e paqes dhe sigurisë duket se është në nivel të ulët, me 6% të të rinjve të cilët në mënyrë aktive kanë marr pjesë në aktivitete të këtij lloji gjatë vitit të kaluar. Duhet cekur nevojën e theksuar për ndërgjegjësim dhe përfshirje më të madhe të rinisë në përpjekjet për ndërtimin e paqes. 3. Niveli i ndërgjegjësimit të rinisë për Luftimin e ekstremizmit të dhunshëm dhe radikalizimit dhe qëndrimet ndaj riintegrimi: Përderisa 53% e të anketuarve nuk e perceptojnë radikalizimin si çështje të rëndësishme në komunitetet e tyre, 38% shprehin shqetësimet lidhur me prezencën e të njëjtit. Motivuesit kryesor të radikalizimit të identifikuar përfshijnë faktorët politik, pabarazitë ekonomike dhe religjionin. Madje, duket se ka hezitim të theksuar tek të rinjtë për të mbështetur riintegrimin e ekstremistëve të mëparshëm, me 43% hezitim për mbështetjen e risocializimit të individëve të dënuar. 4. Perceptimi dhe përvoja e rinisë me të gjitha format e dhunës: 59% e të anketuarve konsiderojnë se dhuna tek të rinjtë është “tërësisht prezentë”. Gati një nga pesë persona të rinj (18%) të përfshirë në këtë hulumtim kanë përjetuar apo dëshmuar dhunë ose të dyja. Djemtë e rinj duket se kanë përjetuar më shumë dhunë fizike, në krahasim me vajzat e reja (80% krahas 66%), përderisa vajzat e reja kanë përjetuar apo dëshmuar më tepër dhunë verbale në krahasim me djemtë e rinj (84% krahas 76%). Për më tepër, ky studim nxjerrë në pah një trend shqetësues të dhunës nëpër shkollat, ku 81% të të rinjve (të moshës 15-18) kanë raportuar përvojë apo dëshmi të dhunës në mjediset shkollore. 5. Ngacmimi kibernetikë: Gati gjysma e të të anketuarve (42%) në hulumtimin ndihen “të sigurt” ose “tërësisht të sigurt” kur përdorin internetin, përderisa 20% nuk ndihen ashtu. Një përqindje relativisht e madhe e të anketuarve (38%) ndihen “as të sigurt, e as të rrezikuar”. Kjo mund të sugjeroi se mund të nevojitet hulumtim i mëtutjeshëm mbi shkaqet për perceptimet e tilla, si dhe mundësisht, ndërgjegjësim plotësues mbi sigurinë kibernetike. 6. Përjashtimi dhe diskriminimi: Afër një e treta (31%) e të anketuarve kanë identifikuar përkatësinë etnike si motivi kryesor i diskriminimit dhe përjashtimit, ndjekur nga statusi ekonomik dhe përkatësia politike. Ndërkohë, 11% e të anketuarve kanë deklaruar të kenë përjetuar diskriminim personal. Vajzat e reja duket të kenë qenë subjekt i diskriminimit më shumë se djemtë e rinj, e njëjta vlen dhe për të rinjtë e komunitetit rom në krahasim me të rinjtë shqiptar dhe maqedonas. Hulumtimi shfaq një zbrazëti të rëndësishme në përfshirjen e rinisë në proceset vendimmarrëse në nivelet lokale dhe institucionale. 7. Besimi tek autoritetet dhe marrëdhëniet ndërmjet komuniteteve: Besimi tek institucionet duket të jetë përgjithësisht i ulët, ku qeveria dhe liderët politik kanë fituar vlerësim veçanërisht të dobët.  Besim më të lartë duket se gëzojnë Policia, liderët fetar, dhe organizatat e shoqërisë civile. Rinia duket se ka vlerësim të ndarë mbi nivelin e besimit tek personat nga përkatësitë e ndryshme etnike, ku 57% kanë shprehur në përgjithësi besim të kufizuar në personat me përkatësi të ndryshme etnike, dhe 43% janë shprehur se ju besojnë atyre. Megjithatë, vlerësimi i përgjithshëm i marrëdhënieve ndëretnike dhe ndërmjet komuniteteve është më pak përçarës, ku 46% e kanë vlerësuar si  “as keq, e as mirë” dhe 41% me mirë. Për qasje në tërë hulumtimin, ju lutemi vizitoni linkun më poshtë. Perceptimet, qëndrimet dhe sfidat e të rinjve në Мaqedoninë e Veriut- Hulumtim për të rinjtë dhe sigurinë | OSCE Perceptions, views and challenges of young people in North Macedonia- Research on Youth and Security | OSCE Перцепции, ставови и предизвици на младите во Северна Македонија- Истражување за млади и безбедност | OSCE

Sot, në një hap të rëndësishëm drejt modernizimit të proceseve zgjedhore në Kosovë, Misioni i OSBE-së i dorëzoi Komisionit Qendror të Zgjedhjeve (KQZ) softuerin për digjitalizimin e numërimit të votave dhe tabulimin e rezultateve të zgjedhjeve. Softueri i sapo zhvilluar, produkt i bashkëpunimit të ngushtë ndërmjet Misionit të OSBE-së, KQZ-së dhe kompanisë softuerike CACTTUS, përfaqëson arritje të rëndësishme në përpjekjet e vazhdueshme për digjitalizimin e infrastrukturës zgjedhore në Kosovë. I krijuar në përputhje me detyrimet e reja që burojnë nga ligji zgjedhor i ndryshuar e plotësuar së fundmi, softueri do të lehtësojë menaxhimin e zgjedhjeve, do ta përmirësojë saktësinë e të dhënave, do të sigurojë rezultate në kohë dhe të besueshme dhe do ta rrisë transparencën e numërimit dhe tabulimit të rezultateve për publikun. “Ky softuer është më shumë se vetëm avancim teknologjik, ai përfaqëson përparim thelbësor në forcimin e demokracisë, rritjen e besimit të publikut dhe siguron që zgjedhjet në Kosovë të zhvillohen me integritet dhe transparencë maksimale, duke përdorur dy gjuhët zyrtare dhe duke pasur parasysh nevojat e të gjitha komuniteteve,” tha Shefi i Misionit të OSBE-së në Kosovë, Ambasadori Michael Davenport, në ceremoninë e dorëzimit. Kryetari i KQZ-së, Kreshnik Radoniqi, tha: “Në këtë kohë të zhvillimit të madh të teknologjisë, Komisioni Qendror i Zgjedhjeve po bënë hapa të konsiderueshëm në digjitalizimin e operacioneve zgjedhore. Softueri i KQZ-së, i cili është zhvilluar me mbështetjen e Misionit të OSBE-së në Kosovë, ka për qëllim të avancojë shërbimet e institucionit për votuesit, subjektet politike dhe vëzhguesit e zgjedhjeve.” “Andaj, në emër të Komisionit Qendror të Zgjedhjeve, shpreh mirënjohjen për OSBE-në dhe Ambasadorin Davenport, në ndihmën e dhënë në këtë drejtim,” shtoi ai. Misioni i OSBE-së do të vazhdojë ta mbështesë KQZ-në për të forcuar më tej proceset zgjedhore në Kosovë, për t'i bërë ato më profesionale, më gjithëpërfshirëse dhe më të ndjeshme në aspektin gjinor.

Nga 9 maji deri më 10 korrik 2024, Prezenca e OSBE-së mbështeti fushatën informuese, edukuese dhe ndërgjegjësuese të Komisionit Qendror të Zgjedhjeve (KQZ), që synon të informojë dhe të përfshijë të rinjtë, gratë dhe pakicat, në të gjithë Shqipërinë në aspekte të ndryshme të procesit zgjedhor. Faza e parë e takimeve u zhvillua me studentët e universiteteve të Korçës, Shkodrës, Durrësit, Elbasanit dhe Vlorës. Ata mësuan për organizimin dhe funksionimin e administratës zgjedhore dhe eksploruan mundësitë për përfshirjen e tyre në kapacitete të ndryshme në zgjedhjet e përgjithshme të vitit 2025. Gjatë një simulimi të procesit të votimit, studentët luajtën rolet e subjekteve zgjedhore, komisionerëve e zgjedhësve dhe, më pas, diskutuan për hapat e procesit të votimit, plotësimin e fletëve të votimit dhe administrimin e materialit zgjedhor. Faza e dytë, e realizuar në bashkëpunim me Rrjetin e Fuqizimit të Gruas në Shqipëri, u zhvillua me gratë dhe pakicat në Laç, Gjirokastër, Berat, Pustec dhe Finiq. Diskutimet u fokusuan në mënyrat për të fuqizuar përfaqësimin e grave në vendimmarrje dhe për të rritur pjesëmarrjen e tyre në zgjedhje. Ekspertë nga KQZ-ja, Rrjeti dhe Prezenca e OSBE-së kontribuan në diskutime. Rreth 500 persona morën pjesë në këto veprimtari, të cilat ishin pjesë e projektit të Prezencës së OSBE-së “Mbështetje për reformën dhe procesin zgjedhor në Shqipëri”, financuar nga Suedia, Zvicra, Misioni i SHBA-së në OSBE dhe Polonia.

PRISHTINË/PRIŠTINA, 11 July 2024- The OSCE Mission in Kosovo is concerned by certain aspects of today’s adoption by the Assembly of Kosovo of a new Law on the Independent Media Commission (IMC).

Në përgatitje të zgjedhjeve parlamentare në Shqipëri, Prezenca e OSBE-së mbështeti Komisionin Qendror të Zgjedhjeve (KQZ), më 9 korrik 2024, në organizimin e një tryeze të rrumbullakët për të identifikuar dhe diskutuar çështjet që prekin administrimin e efektshëm të procesit të zgjedhjeve parlamentare 2025. Në takim morën pjesë përfaqësues të partive politike, institucioneve shtetërore, organizatave të shoqërisë civile dhe organizatave ndërkombëtare. Diskutimet u përqendruan te vendosja e një sistemi komunikimi efiçent mes KQZ-së dhe agjencive ligjzbatuese; administrimi dhe vëzhgimi i procesit të votimit e numërimit; përmirësimi i sistemit të raportimit të institucioneve publike në KQZ; trajnimi i komisionerëve të niveleve më të ulëta; si edhe përmirësimi i sistemit të mbikëqyrjes për votimin elektronik dhe asistencën e tij teknike. Përgjatë takimit, pjesëmarrësit theksuan nevojën për dialog dhe bashkëpunim të vijueshëm për të siguruar një proces zgjedhor transparent e të besueshëm. Në hapje të tryezës, Komisioneri Shtetëror i Zgjedhjeve, Ilirjan Celibashi, tha: “Qëllimi i këtij takimi është të hapim diskutimin në lidhje me çështje të cilat KQZ-ja mund t’i adresojë në mënyrë të pavarur nga ndryshimet ligjore që do të bëjë Kuvendi i Shqipërisë. Kemi mjaft çështje që mund të diskutojmë, ka mjaft problematika që KQZ-ja  do të duhet t'i adresojë, me qëllim që të përmirësojmë gjithë procesin e përgatitjes dhe administrimit të zgjedhjeve. Jemi dëshmitarë të problemeve të ndryshme që e karakterizojnë procesin zgjedhor në Shqipëri. Të gjitha çështjet problematike, do t'i listojmë dhe më pas të shkëmbejmë mendime për mënyrat dhe rrugët që KQZ-ja do të duhet të ndjekë për t'i adresuar. Partitë politike, shoqëria civile dhe të gjitha palët e angazhuara në zgjedhje, janë të mirëpritura për ta nxitur dhe për të ndihmuar këtë nismë të Komisionit Qendror të Zgjedhjeve në bashkëpunim me Prezencën e OSBE-së në Shqipëri”. Kryetari i Prezencës së OSBE-së në Shqipëri, ambasadori Michel Tarran, u bëri thirrje aktorëve politikë ta bëjnë reformën zgjedhore në mënyrë gjithëpërfshirëse dhe në kohë, në mënyrë që t’u lejojnë organeve të administrimit të zgjedhjeve kohë të mjaftueshme për zbatim. “Kemi një sfidë të pazgjidhur ende: zbatimin e efektshëm të vendimeve të Gjykatës Kushtetuese, duke përfshirë këtu edhe çështjen e votimit nga jashtë vendit. Duhet të theksoj se çdo vendim, qoftë në lidhje me ndreqjen e hendeqeve legjislative apo me normimin e elementeve praktike, duhet të rrjedhë prej konsensusit të gjerë. Ky konsensus duhet të bazohet në vlerësime tërësore dhe në konsultime gjithëpërfshirëse me të gjithë aktorët përkatës, duke përfshirë këtu aktorët politikë, shoqërinë civile dhe komunitetin e diasporës. Një përqasje e tillë do të mundësonte zbatim të rrjedhshëm dhe pa kundërshtime të votimit nga jashtë vendit, duke çuar edhe në rritje të besimit të votuesve në procesin zgjedhor”, tha Tarran. Takimi u mbyll me një thirrje ndaj gjithë aktorëve për të zbatuar në kohë dhe në mënyrë gjithëpërfshirëse zgjidhjet dhe rekomandimet e propozuara, duke synuar kështu një menaxhim më transparent dhe të efektshëm të zgjedhjeve në Shqipëri. Veprimtaria u organizua si pjesë e projektit të Prezencës së OSBE-së “Mbështetje për reformën dhe procesin zgjedhor në Shqipëri”, i cili financohet nga Suedia, Zvicra, Misioni i SHBA-së në OSBE dhe Polonia.