ԵԱՀԿ-ն սարքավորումներ է նվիրաբերում Արմավիրի մարզի ճգնաժամային կառավարման կենտրոնին
2015թ. դեկտեմբերի 14-ին ԵԱՀԿ երևանյան գրասենյակի ղեկավար դեսպան Անդրեյ Սորոկինը գրասենյակի անունից ՀՀ տարածքային կառավարման և արտակարգ իրավիճակների նախարարության Արմավիրի մարզի ճգնաժամային կառավարման կենտրոնին նվիրաբերեց սարքավորումներ նախարարության՝ մարդկանց և շրջակա միջավայրի պաշտպանության ոլորտում կարողությունների հզորացման նպատակով:
ՀՀ տարածքային կառավարման և արտակարգ իրավիճակների նախարարի տեղակալ Վաչե Տերտերյանը նախարարության անունից ստացավ ութ մոնիտոր, որոնք կօգտագործվեն ռադիոլոկացիոն կայաններից տեղեկատվություն ստանալու նպատակով և հիդրո-օդերևութաբանական պայմանների, արտակարգ իրավիճակների, ինչպես նաև սեյսմիկ երևույթների մոնիտորինգի համար: Սարքավորումները կաջակցեն նախարարության կարողությունների զարգացմանը՝ Արմավիրի մարզում արտակարգ իրավիճակների կանխման, մոնիտորինգի և արագ արձագանքման գործում:
Օգոստոսին ԵԱՀԿ երևանյան գրասենյակը ևս նվիրաբերել է մոնիտորինգի սարքավորումներ Հայաստանի հիդրոօդերեևութաբանության և մոնիտորինգի պետական ծառայությանը:
Տեխնիկական աջակցությունը մաս է կազմում ԵԱՀԿ երևանյան գրասենյակի և ԵԱՀԿ տնտեսական և բնապահպանական գործունեության համակարգողի գրասենյակի համատեղ ծրագրի՝ իրականացված Գերմանիայի հրդեհների մոնիտորինգի համաշխարհային կենտրոնի և Կանադայի անտառային ծառայության հետ համագործակցությամբ: Համակարգը օգտագործվելու է անտառային հրդեհների արդյունավետ կառավարման նպատակով երկրի և տեղական մակարդակով՝ բարձրացնելու հրդեհների կանխման, հայտնաբերման և մարման արդյունավետությունը և ապահովելու է հրդեհների վաղ կանխարգելում: