News and press releases

Pranë K9 partneres së saj të paduruar, qen i racës Bariu Belg (Malinois) 5 muajshe, e quajtur Ada, Kristina Shikova do të punojë për detektim jashtë në terren që nga fillimi i verës. Kristina po trajnohet për t’u bërë trajnere e qenve të policisë, duke e bërë atë gruan e parë në këtë rol në Maqedoninë e Veriut.   Përderisa Ada kupton si të ndjekë urdhrat e Kristinës me anë të topit, aktualisht ajo është në procesin e të mësuarit si të nuhasë makinat për qëllime të detektimit. Brenda vetëm disa muajve, Ada do të mund të kryejë detyrat e nuhatjes me saktësinë më të madhe, veçanërisht për zbulimin e armëve të zjarrit dhe municioneve. Përpjekjet e Misionit të OSBE-së në Shkup për të rritur kapacitetet e zbulimit të Njësisë së qenve të policisë janë pjesë e përpjekjeve për të forcuar kontrollin e armëve në Evropën Juglindore. Avancimi i kapaciteteve detektuese  kontribuon në mënyrë të konsiderueshme në qëllimin më të gjerë për rritjen e sigurisë dhe reduktimin e përhapjes së armëve në rajon. Kristina ka gjashtë vite që shërben në polici, por që kur është punësuar, ka shprehur dëshirë që të punojë në Njësinë e qenve të policisë. Kur u lirua një vend pune, ajo aplikoi menjëherë. "Akoma më duket e pabesueshme, por e shoh më shumë si kënaqësi sesa si punë. Gjithmonë kam dashur të punojë rreth kafshëve," thotë Kristina, duke rikujtuar kur mori lajmin e mirë për emërimin e saj në janar të këtij viti. Trajnimi i saj aktual përfshinë socializimin, dëgjueshmërinë, kontaktin me qenin e caktuar policor, komponentët teorike dhe praktike, si dhe detyrat fizike. Kristina  beson se do të mësoj shumë gjatë punës së saj dhe synon të shkëlqejë si trajnere, duke u avancuar në nivelin e radhës për t’u bërë instruktore, të ndihmojë kolegët e ri në mënyrë aktive, si dhe të veproj si shembull për ta. Duke u mbështetur në arritjet e saj, Kristina angazhohet për diversitet më të madh në organet për zbatimin e ligjit dhe nevojën për më shumë gra në forcat policore, duke njohur rolin e tyre në ndërtimin e besimit në komunitet. Ajo inkurajon më shumë gra të aplikojnë për të punuar në Njësinë e qenve të policisë, pasi njeh shumë prej tyre që kanë dëshirën dhe përkushtimin e duhur. Misioni në mënyrë aktive promovon barazinë gjinore përmes nismave për mbështetjen e grave në organet për zbatimin e ligjit, duke ofruar trajnime dhe mbështetje, si dhe duke avokuar për përfshirjen e grave në forcat policore. Që nga viti 2018, Misioni ka bashkëpunuar ngushtë me Ministrinë e Punëve të Brendshme (MPB) të Maqedonisë së Veriut për të zbatuar punën policore me ndjeshmëri gjinore përmes Programit gjithëpërfshirës të mentorimit gjinor. Rrugëtimi i Kristinës, së bashku me K9 partneren e saj Ada, shërben si një frymëzim për gratë që konsiderojnë karrierë në organet për zbatimin e ligjit dhe Njësinë e qenve të policisë – një kauzë që Misioni i OSBE-së në Shkup e mbështet me krenari. Mbi përpjekjet për të rritur kapacitetet e AV L-ve për detektim Rritja e kapaciteteve detektuese është pjesë e projektit jashtë-buxhetor të Misionit, "Ndihma autoriteteve kombëtare të Republikës së Maqedonisë së Veriut për uljen e rrezikut të përhapjes së armëve dhe të keqdorimit të armëve të vogla dhe të lehta (ALV)".I financuar nga Belgjika, BE, Franca, Gjermania, Norvegjia, Sllovakia dhe SHBA, projekti ka arritur progres të konsiderueshëm në rritjen e kapaciteteve të detektimit të Njësisë së qenve të policisë në vend. Mësoni më shumë rreth projektit të AVL-ve këtu.

Gjykata Kushtetuese, në bashkëpunim me Prezencën e OSBE-së në Shqipëri, prezantoi Udhërrëfyesin e parë të Jurisprudencës së Gjykatës Kushtetuese, më 21 shkurt 2024. Përfaqësues të institucioneve të drejtësisë, avokatë, akademikë, profesionistë të së drejtës dhe partnerë ndërkombëtarë morën pjesë në veprimtarinë e organizuar, e cila u hap nga Kryetarja e Gjykatës Kushtetuese, Holta Zaçaj dhe Kryetarja në Detyrë e Prezencës së OSBE-së, Clarisse Pasztory. Udhërrëfyesi synon të përmirësojë cilësinë e ankimeve kushtetuese individuale, duke kontribuuar për rritjen e aksesit të qytetarëve në Gjykatë dhe për mbrojtjen më të mirë të të drejtave dhe lirive të tyre themelore. Ai do t’i shërbejë stafit gjyqësor për të përmirësuar kapacitetet kërkimore dhe do të ndihmojë Gjykatën Kushtetuese për të standardizuar vendimet. Udhërrëfyesi do t’u shërbejë edhe avokatëve, praktikantëve të së drejtës dhe studiuesve të ligjit për të njohur dhe referuar në mënyrë efektive jurisprudencën e kësaj gjykate. Prezenca e OSBE-së e mbështeti hartimin e Udhërrëfyesit si pjesë e projektit të saj “Forcimi i shtetit së drejtës dhe promovimi i mbrojtjes së të drejtave të njeriut në Shqipëri nëpërmjet mbështetjes për Gjykatën Kushtetuese”, financuar nga Shtetet e Bashkuara të Amerikës, Italia dhe Greqia. Prezenca do të vazhdojë të mbështesë Gjykatën Kushtetuese në përpjekjet e saj për të rritur transparencën, aksesin dhe efikasitetin e veprimtarisë së saj si edhe forcimin e kapaciteteve institucionale për të mbështetur sundimin e ligjit dhe mbrojtjen e të drejtave të njeriut, në përputhje me standardet ndërkombëtare dhe angazhimet e OSBE-së.

Misioni i OSBE-së në Kosovë publikoi sot raportin më të fundit të fokusuar në caktimin e masës së paraburgimit ndaj të pandehurve me nevoja të shëndetit mendor.

PRISHTINË, 9 shkurt 2024- Misioni i OSBE-së në Kosovë publikoi sot raportin mbi ndikimin e dorëheqjes masive të vitit 2022 të gjyqtarëve, prokurorëve dhe personelit administrativ serb të Kosovës nga sistemi i drejtësisë në rajonin e Mitrovicës.

Tridhjetë përfaqësues nga institucionet shtetërore dhe organizatat e shoqërisë civile u angazhuan në hakatonin e parë kundër trafikimit të qenieve njerëzore në Shqipëri – një trajnim aktiv ku ata punuan së bashku për të zbuluar trafikimin e qenieve njerëzore në internet dhe shfrytëzimin seksual të fëmijëve, më 6 dhe 7 shkurt 2024. Veprimtaria u organizua nga Prezenca e OSBE-së në Shqipëri, në bashkëpunim me Zyrën e Përfaqësuesit Special dhe Koordinatorit të OSBE-së për Luftën kundër Trafikimit të Qenieve Njerëzore. Nën drejtimin e ekspertëve ndërkombëtarë, mentorë në teknologjinë e informacionit dhe sigurinë kibernetike, pjesëmarrësit nga policia, shërbimet sociale, Autoriteti Kombëtar për Certifikimin Elektronik dhe Sigurinë Kibernetike (AKCESK) dhe organizatat e shoqërisë civile u angazhuan në zhvillimin e mjeteve për zbulimin e trafikimit dhe shfrytëzimit seksual në internet. “Teknologjia mund të zhvillohet dhe të përdoret edhe për të ndihmuar në luftimin e trafikimit të qenieve njerëzore në mjedisin online. Kjo është arsyeja pse ne duhet të shohim mundësi përtej sfidave dhe pikërisht ky është qëllimi i këtij trajnimi novator”, tha Clarisse Pasztory, Kryetare në Detyrë e Prezencës së OSBE-së në Shqipëri, e cila foli në sesionin e hapjes krahas drejtorit të AKCESK-ut, Igli Tafa. Qëllimi i hakatonit ishte rritja e ndërgjegjësimit për mënyrat se si keqpërdoret teknologjia në Shqipëri për të shfrytëzuar viktimat, veçanërisht fëmijët. Ai synoi, gjithashtu, të identifikonte platformat dhe faqet e internetit që janë veçanërisht të ekspozuara ndaj rreziqeve të trafikimit të qenieve njerëzore dhe të ofronte një pasqyrë se si shfrytëzohen ato nga trafikantët. Përveç kësaj, hakatoni shërbeu për të ngritur një rrjet ekspertize për të adresuar trafikimin e qenieve njerëzore përmes teknologjisë duke përdorur metodologjinë e të mësuarit duke punuar, që i jep përparësi procesit të të nxënit përkundrejt teorisë dhe duke testuar njohuritë dhe kapacitetet e pjesëmarrësve në një mjedis të drejtpërdrejtë online për të zbuluar faqet e internetit dhe platformat e mediave sociale që rekrutojnë viktima për shfrytëzim seksual.

Së bashku me Shoqatën e Gazetarëve (SHGM) dhe partnerët tanë të tjerë, Misioni i OSBE-së në Shkup mbetet i palëkundur në përkushtimin e tij për të mbështetur gazetarinë e cilësisë së lartë.

Dhjetë përfaqësues të organizatave të shoqërisë civile, Këshillave Vendorë të Sigurisë Publike, Ministrisë së Brendshme dhe Policisë së Shtetit zhvilluan një vizitë në Zagreb të Kroacisë, më 30 dhe 31 janar 2024, për të shkëmbyer praktikat dhe strategjitë më të mira gjatë hartimit e zbatimit të nismave ndërgjegjësuese lidhur me armët e zjarrit, në nivelin vendor dhe kombëtar. Vizita u organizua nga Prezenca e OSBE-së, si pjesë e projektit të saj “Asistencë për autoritetet e Republikës së Shqipërisë për uljen e rrezikut të përhapjes së armëve dhe keqpërdorimit të armëve të vogla dhe të lehta (AVL)”, i cili financohet nga Bashkimi Evropian, Gjermania dhe Franca. Delegacioni shqiptar pati mundësinë të mësonte nga përvoja e gjerë e Kroacisë dhe strategjitë e saj të qëndrueshme për rritjen e ndërgjegjësimit për rrezikun dhe keqpërdorimin e armëve të zjarrit. Ata u takuan me përfaqësues të Drejtorisë së Përgjithshme të Policisë të Kroacisë, Qendrës për Ekzaminime Mjeko-Ligjore, Qendrës Informative për Parandalim dhe Stacionit Policor Velika Gorica. Ata vizituan edhe Kryqin e Kuq në Zagreb dhe qendrën e tij për vullnetarë dhe të rinj, ku u njohën me nisma të ndryshme ndërgjegjësuese dhe parandaluese për rrezikun e armëve, me fokus të rinjtë. “Kjo vizitë shkëmbimi ishte një përvojë e dobishme për ne, për të parë se si zbatohen fushatat ndërgjegjësuese për armët e zjarrit, në kontekstin e Kroacisë. Pas vizitës, në bashkëpunim me projektin e Prezencës së OSBE-së, do të zhvillojmë një plan për zbatimin e veprimtarive informuese në komunitetet tona”, tha Ervin Muço, Drejtor i Përgjithshëm i Shërbimit Social në Bashkinë Elbasan. Strategjia e Rritjes së Ndërgjegjësimit dhe Komunikimit për Keqpërdorimin e Armëve të Vogla e të Lehta, e hartuar së fundmi, vë në pah se Këshillat Vendorë të Sigurisë Publike dhe organizatat e shoqërisë civile janë partnerë të pozicionuar mirë, veçanërisht në mesin e grupeve të synuara të vështira për t’u arritur. Këshillat Vendorë dhe organizatat e përzgjedhura, që ishin pjesë e vizitës në Kroaci, kanë luajtur një rol të rëndësishëm në procesin e konceptualizimit të strategjisë. Po ashtu, ata kanë shprehur vullnetin e tyre për të bashkëpunuar me Ministrinë e Brendshme dhe Policinë e Shtetit në veprimtaritë ndërgjegjësuese, në nivel vendor dhe kombëtar në Shqipëri, që do të zbatohen si pjesë e projektit të OSBE-së për armët e vogla e të lehta. “Kjo është një platformë e jashtëzakonshme, e cila synon të bashkojë përfaqësuesit e Këshillave Vendorë, shoqërisë civile, Ministrisë dhe Policisë përgjatë realizimit të këtyre veprimtarive. Ne besojmë se kjo është arritja e parë në forcimin e bashkëpunimit midis këtyre aktorëve të rëndësishëm, në procesin e rritjes së përpjekjeve ndërgjegjësuese të qeverisë, në dobi të qytetarëve shqiptarë”, tha Xhenis Ballço, specialiste vendase e projektit në Prezencën e OSBE-së. Organizimi i vizitës u mbështet nga Drejtoria e Përgjithshme e Policisë e Ministrisë së Brendshme të Republikës së Kroacisë dhe nga Kryqi i Kuq në Zagreb.