Prezenca e OSBE-së në Shqipëri mbështet zhvillimin e Konferencës Ndërkombëtare mbi Krimin dhe Sigurinë Mjedisore
Konferenca e 5-të Ndërkombëtare Shkencore mbi “Krimin mjedisor, Sigurinë Mjedisore dhe Sigurinë Kombëtare”, e organizuar nga Akademia e Sigurisë në bashkëpunim të ngushtë me Prezencën e OSBE-së në Shqipëri dhe Bashkinë e Tiranës, u zhvillua më 11 shkurt 2020 në Tiranë.
Diskutimet në konferencë u përqendruan në forcimin e bashkërendimit dhe bashkëpunimit të të gjithë aktorëve të përfshirë në mbrojtjen e mjedisit për rritjen e sigurisë mjedisore dhe pakësimin e krimeve mjedisore në vend. Konferenca kishte për synim që t’i sillte krimet mjedisore në qendër të vëmendjes, duke rritur ndërgjegjësimin për to, ndarë praktikat e mira, paraqitur zgjidhje dhe nxitur reagimin ndaj tyre qoftë të institucioneve të shtetit ashtu edhe të shoqërisë.
Më se 100 përfaqësues të shoqërisë civile, studiuesve, institucioneve publike dhe organeve ligjzbatuese që merrnin pjesë në të theksuan nevojën për burime njerëzore shtesë, bashkëpunim më të intensifikuar ndër-institucional, si dhe ndryshime legjislative për ta luftuar këtë problem.
“OSBE-ja është krenare që mbështet këto projekte si dhe platformat e tjera që bëjnë bashkë aktorë të rëndësishëm nga fusha të ndryshme, me synim shqyrtimin e shtrirjes dhe natyrës specifike të krimeve mjedisore dhe masat që duhen marrë për t’i bërë ballë tyre”, tha zëvendëskryetari i Prezencës së OSBE-së në Shqipëri Robert Wilton.
Ministri i Turizmit dhe Mjedisit, Blendi Klosi, tha se lufta kundër krimit mjedisor kërkon bashkëpunimin e gjithë aktorëve, shtetërorë dhe jo shtetërorë si dhe ndërveprimin mes tyre në mënyrë të sinkronizuar. “Ne si ministri kemi ndërmarrë tashmë nismat tona së bashku me partnerët tanë për ta luftuar krimin mjedisor, i cili është një realitet i njohur në vendin tonë. Po i kalojmë një sërë kompetencash edhe Policisë së Shtetit për çështjet e krimit mjedisor, me qëllim që të marrë ndëshkimin e merituar”.
Qysh prej vitit 2015, Prezenca e OSBE-së në Shqipëri i ka mbështetur autoritetet shqiptare në shtimin e kapaciteteve dhe përmirësimin e njohjes së krijimit mjedisor duke promovuar një qasje ndër-institucionale në trajtimin e çështjeve të lidhura me krimin mjedisor në një mënyrë konsekuente, shumëdisiplinore dhe ndër-sektoriale.
Gjatë vitit që sapo ka nisur, angazhimi vijues i Prezencës në këtë fushë do të përqendrohet kryesisht në shtimin e kapaciteteve dhe të bashkërendimit mes organeve ligjzbatuese për parandalimin dhe ndjekjen penale të krimeve mjedisore.