ЕҚЫҰ Қазақстандағы қазіргі қауіпсіздік қатерлеріне қатысты қару-жарақ пен оқ-дәрілердің қауіпсіздігі мәселелері бойынша стратегиялық серіктестердің сапарын ұйымдастырды
ЕҚЫҰ-ның Астанадағы Бағдарламалар офисі 2025 жылдың 11-14 шілде аралығында Қазақстанға халықаралық серіктестердің бірнеше күндік сапарын ұйымдастырды. Сапар «Қазақстан Республикасындағы қазіргі заманғы қауіпсіздік қатерлерін жою» атты бюджеттен тыс жоба аясында қол жеткізілген нәтижелерді көрсетуге бағытталды.
Делегация құрамында ЕҚЫҰ жанындағы АҚШ пен Германияның Тұрақты өкілдері, сондай-ақ ЕҚЫҰ жобасының қызметкерлері болды. Сапар аясында Қазақстан Республикасының Қорғаныс министрлігі мен ҰҚК Шекара қызметімен бірқатар далалық іс-шаралар мен терең сараптамалық кездесулер өтті. Талқылаулар атқыш және жеңіл қару-жарақтың өмірлік циклін басқару, оқ-дәрілердің қауіпсіздігі және мамандандырылған дайындық бойынша ұлттық әлеуетті арттыруға арналды.
Бағдарлама шеңберінде серіктестер Қараойдағы қызметтік иттерді даярлау орталығына және Ленгер қаласындағы ұшқышсыз ұшу аппараттарының (ҰҰА) құзырет орталығына барды. Онда оларға оқу бағдарламалары, инфрақұрылымды жаңғырту, ит өсіру бағдарламасы және әлеуетті арттыру шаралары бойынша ақпарат ұсынылды. Делегация сондай-ақ Алматыдағы Шекара қызметі академиясы мен «Бітімгер» бітімгершілік операциялар орталығына барып, жобаның практикалық іске асырылу барысымен танысты.
«Бұл сапар ЕҚЫҰ мен Қазақстанның қауіпсіздік құрылымдары арасындағы берік серіктестікті, сондай-ақ қазіргі заманғы қауіпсіздік сын-қатерлерін стандарттарға негізделген, орнықты тәсілдермен шешуге деген ортақ ұмтылысты көрсетті», - деді жобаның басқарушысы Ярослав Курек.
Сапарға қатысқан серіктестер Қорғаныс министрлігі мен Шекара қызметінің ынтымақтастыққа ашық және белсенді ұстанымын жоғары бағалап, жобаны іске асыру барысы туралы толыққанды түсінік алды.
ЕҚЫҰ ұлттық органдармен және халықаралық серіктестермен диалогты, ашықтықты және практикалық ынтымақтастықты ілгерілетіп, өңірлік тұрақтылық пен қауіпсіздікті нығайтуға бейілді.