ԵԱՀԿ աջակցությամբ իրականացվող <<կարգավորիչ գիլյոտինի>> մեկնարկ Հայաստանում

ԵՐԵՎԱՆ, 3 նոյեմբերի 2011թ. - Հայաստանում տնտեսական արդյունավետ կառավարման խթանումը կարգավորման պարզեցման մեխանիզմի միջոցով` հայտնի նաև որպես <<կարգավորիչ գիլյոտին>>, հանդիսանում է ԵԱՀԿ երևանյան գրասենյակի աջակցությամբ իրականացվող և այսօր Երևանում մեկնարկած ծրագրի նպատակը:

ԵԱՀԿ երևանյան գրասենյակը ս.թ. փետրվարին հրավիրել էր կարգավորման բարեփոխումների միջազգային առաջատար փորձագետ` գնահատելու Հայաստանի գործարար միջավայրն ու առավել արդյունավետ պետական կարգավորման համակարգ ստեղծելու գործիքներն` ի պատասխան ՀՀ կառավարության խնդրանքին: Ըստ գնահատման` բազմաթիվ հնացած ու հակասական իրավական նորմեր խոչընդոտում են գործարարության զարգացմանը Հայաստանում և կարիք ունեն պարզեցման:

<<Ստորագրելով մտադրությունների մասին սույն նամակն այսօր` ԵԱՀԿ-ն ստանձնում է կառավարության ջանքերին աջակցելու պարտավորվածություն` իրականացնելու կարգավորիչ բարեփոխումներ, որոնք կբարձրացնեն հաշվետվողականությունն ու թափանցիկությունը, կնվազեցնեն կոռուպցիոն ռիսկերը և Հայաստանը կդարձնեն գրավիչ` օտարերկրյա ներդրողների համար:

<<Կարգավորիչ գիլյոտինն>> իրականացվել է աշխարհի շատ երկրներում և նպաստել է գործարարության և օտարերկրյա ներդրումների աճին>>, - ասաց ԵԱՀԿ երևանյան գրասենյակի ղեկավարի պաշտոնակատար Քարել Հոֆսթրան:

Ծրագրի շրջանակներում ձեռնարկատիրական գործունեությունը  կարգավորող ու  մարդկանց առօրյայի հետ առնչվող  պետական կարգավորման դաշտը կվերանայվի և կպարզեցվի: Ողջ ծրագրի ընթացքում, որը կմեկնարկի ս.թ. դեկտեմբերի 1-ին և կշարունակվի մինչև 2013թ. նոյեմբերի 31-ը, կգործի <<Երկխոսության համատեղ ֆորումը>>` նպաստելու տեղեկատվության փոխանակման և  կողմերի միջև հետագա քննարկումներին:

ԵԱՀԿ երևանյան գրասենյակի և ՀՀ կառավարության հետ միասին` նամակը ստորագրել են  <<Ավստրիական զարգացման գործակալությունը>>, ԱՄՆ ՄԶԳ, Համաշխարհային բանկի և ՄԱԶԾ տեղի ներկայացուցչությունները: