Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Gjykata Kushtetuese dhe Prezenca e OSBE-së në Shqipëri prezantojnë Udhërrëfyesin e parë të Jurisprudencës së Gjykatës Kushtetuese
Publishing date: 21 shkurt 2024
Gjykata Kushtetuese, në bashkëpunim me Prezencën e OSBE-së në Shqipëri, prezantoi Udhërrëfyesin e parë të Jurisprudencës së Gjykatës Kushtetuese, më 21 shkurt 2024. Përfaqësues të institucioneve të drejtësisë, avokatë, akademikë, profesionistë të së drejtës dhe partnerë ndërkombëtarë morën pjesë në veprimtarinë e organizuar, e cila u hap nga Kryetarja e Gjykatës Kushtetuese, Holta Zaçaj dhe Kryetarja në Detyrë e Prezencës së OSBE-së, Clarisse Pasztory. Udhërrëfyesi synon të përmirësojë cilësinë e ankimeve kushtetuese individuale, duke kontribuuar për rritjen e aksesit të qytetarëve në Gjykatë dhe për mbrojtjen më të mirë të të drejtave dhe lirive të tyre themelore. Ai do t’i shërbejë stafit gjyqësor për të përmirësuar kapacitetet kërkimore dhe do të ndihmojë Gjykatën Kushtetuese për të standardizuar vendimet. Udhërrëfyesi do t’u shërbejë edhe avokatëve, praktikantëve të së drejtës dhe studiuesve të ligjit për të njohur dhe referuar në mënyrë efektive jurisprudencën e kësaj gjykate. Prezenca e OSBE-së e mbështeti hartimin e Udhërrëfyesit si pjesë e projektit të saj “Forcimi i shtetit së drejtës dhe promovimi i mbrojtjes së të drejtave të njeriut në Shqipëri nëpërmjet mbështetjes për Gjykatën Kushtetuese”, financuar nga Shtetet e Bashkuara të Amerikës, Italia dhe Greqia. Prezenca do të vazhdojë të mbështesë Gjykatën Kushtetuese në përpjekjet e saj për të rritur transparencën, aksesin dhe efikasitetin e veprimtarisë së saj si edhe forcimin e kapaciteteve institucionale për të mbështetur sundimin e ligjit dhe mbrojtjen e të drejtave të njeriut, në përputhje me standardet ndërkombëtare dhe angazhimet e OSBE-së.
OSBE-ja organizon hakatonin e parë kundër trafikimit të qenieve njerëzore në Shqipëri
Publishing date: 7 shkurt 2024
Content type: News
Where we are: Prezenca e OSBE-së në Shqipëri, Office of the Special Representative and Co-ordinator for Combating Trafficking in Human Beings
What we do: Combating trafficking in human beings, Sajber/ TIK Siguri
Tridhjetë përfaqësues nga institucionet shtetërore dhe organizatat e shoqërisë civile u angazhuan në hakatonin e parë kundër trafikimit të qenieve njerëzore në Shqipëri – një trajnim aktiv ku ata punuan së bashku për të zbuluar trafikimin e qenieve njerëzore në internet dhe shfrytëzimin seksual të fëmijëve, më 6 dhe 7 shkurt 2024. Veprimtaria u organizua nga Prezenca e OSBE-së në Shqipëri, në bashkëpunim me Zyrën e Përfaqësuesit Special dhe Koordinatorit të OSBE-së për Luftën kundër Trafikimit të Qenieve Njerëzore. Nën drejtimin e ekspertëve ndërkombëtarë, mentorë në teknologjinë e informacionit dhe sigurinë kibernetike, pjesëmarrësit nga policia, shërbimet sociale, Autoriteti Kombëtar për Certifikimin Elektronik dhe Sigurinë Kibernetike (AKCESK) dhe organizatat e shoqërisë civile u angazhuan në zhvillimin e mjeteve për zbulimin e trafikimit dhe shfrytëzimit seksual në internet. “Teknologjia mund të zhvillohet dhe të përdoret edhe për të ndihmuar në luftimin e trafikimit të qenieve njerëzore në mjedisin online. Kjo është arsyeja pse ne duhet të shohim mundësi përtej sfidave dhe pikërisht ky është qëllimi i këtij trajnimi novator”, tha Clarisse Pasztory, Kryetare në Detyrë e Prezencës së OSBE-së në Shqipëri, e cila foli në sesionin e hapjes krahas drejtorit të AKCESK-ut, Igli Tafa. Qëllimi i hakatonit ishte rritja e ndërgjegjësimit për mënyrat se si keqpërdoret teknologjia në Shqipëri për të shfrytëzuar viktimat, veçanërisht fëmijët. Ai synoi, gjithashtu, të identifikonte platformat dhe faqet e internetit që janë veçanërisht të ekspozuara ndaj rreziqeve të trafikimit të qenieve njerëzore dhe të ofronte një pasqyrë se si shfrytëzohen ato nga trafikantët. Përveç kësaj, hakatoni shërbeu për të ngritur një rrjet ekspertize për të adresuar trafikimin e qenieve njerëzore përmes teknologjisë duke përdorur metodologjinë e të mësuarit duke punuar, që i jep përparësi procesit të të nxënit përkundrejt teorisë dhe duke testuar njohuritë dhe kapacitetet e pjesëmarrësve në një mjedis të drejtpërdrejtë online për të zbuluar faqet e internetit dhe platformat e mediave sociale që rekrutojnë viktima për shfrytëzim seksual.
Organizatat e shoqërisë civile, përfaqësues të pushtetit vendor e qendror shkëmbejnë praktikat më të mira në rritjen e ndërgjegjësimit për armët e zjarrit, gjatë vizitës në Kroaci organizuar nga Prezenca e OSBE-së
Publishing date: 2 shkurt 2024
Dhjetë përfaqësues të organizatave të shoqërisë civile, Këshillave Vendorë të Sigurisë Publike, Ministrisë së Brendshme dhe Policisë së Shtetit zhvilluan një vizitë në Zagreb të Kroacisë, më 30 dhe 31 janar 2024, për të shkëmbyer praktikat dhe strategjitë më të mira gjatë hartimit e zbatimit të nismave ndërgjegjësuese lidhur me armët e zjarrit, në nivelin vendor dhe kombëtar. Vizita u organizua nga Prezenca e OSBE-së, si pjesë e projektit të saj “Asistencë për autoritetet e Republikës së Shqipërisë për uljen e rrezikut të përhapjes së armëve dhe keqpërdorimit të armëve të vogla dhe të lehta (AVL)”, i cili financohet nga Bashkimi Evropian, Gjermania dhe Franca. Delegacioni shqiptar pati mundësinë të mësonte nga përvoja e gjerë e Kroacisë dhe strategjitë e saj të qëndrueshme për rritjen e ndërgjegjësimit për rrezikun dhe keqpërdorimin e armëve të zjarrit. Ata u takuan me përfaqësues të Drejtorisë së Përgjithshme të Policisë të Kroacisë, Qendrës për Ekzaminime Mjeko-Ligjore, Qendrës Informative për Parandalim dhe Stacionit Policor Velika Gorica. Ata vizituan edhe Kryqin e Kuq në Zagreb dhe qendrën e tij për vullnetarë dhe të rinj, ku u njohën me nisma të ndryshme ndërgjegjësuese dhe parandaluese për rrezikun e armëve, me fokus të rinjtë. “Kjo vizitë shkëmbimi ishte një përvojë e dobishme për ne, për të parë se si zbatohen fushatat ndërgjegjësuese për armët e zjarrit, në kontekstin e Kroacisë. Pas vizitës, në bashkëpunim me projektin e Prezencës së OSBE-së, do të zhvillojmë një plan për zbatimin e veprimtarive informuese në komunitetet tona”, tha Ervin Muço, Drejtor i Përgjithshëm i Shërbimit Social në Bashkinë Elbasan. Strategjia e Rritjes së Ndërgjegjësimit dhe Komunikimit për Keqpërdorimin e Armëve të Vogla e të Lehta, e hartuar së fundmi, vë në pah se Këshillat Vendorë të Sigurisë Publike dhe organizatat e shoqërisë civile janë partnerë të pozicionuar mirë, veçanërisht në mesin e grupeve të synuara të vështira për t’u arritur. Këshillat Vendorë dhe organizatat e përzgjedhura, që ishin pjesë e vizitës në Kroaci, kanë luajtur një rol të rëndësishëm në procesin e konceptualizimit të strategjisë. Po ashtu, ata kanë shprehur vullnetin e tyre për të bashkëpunuar me Ministrinë e Brendshme dhe Policinë e Shtetit në veprimtaritë ndërgjegjësuese, në nivel vendor dhe kombëtar në Shqipëri, që do të zbatohen si pjesë e projektit të OSBE-së për armët e vogla e të lehta. “Kjo është një platformë e jashtëzakonshme, e cila synon të bashkojë përfaqësuesit e Këshillave Vendorë, shoqërisë civile, Ministrisë dhe Policisë përgjatë realizimit të këtyre veprimtarive. Ne besojmë se kjo është arritja e parë në forcimin e bashkëpunimit midis këtyre aktorëve të rëndësishëm, në procesin e rritjes së përpjekjeve ndërgjegjësuese të qeverisë, në dobi të qytetarëve shqiptarë”, tha Xhenis Ballço, specialiste vendase e projektit në Prezencën e OSBE-së. Organizimi i vizitës u mbështet nga Drejtoria e Përgjithshme e Policisë e Ministrisë së Brendshme të Republikës së Kroacisë dhe nga Kryqi i Kuq në Zagreb.
Prezenca e OSBE-së në Shqipëri organizon vizitë studimore në Sllovaki për zyrtarë të mjedisit dhe të zbatimit të ligjit
Publishing date: 31 janar 2024
Content type: News
Where we are: Prezenca e OSBE-së në Shqipëri
What we do: Veprimtaritë mjedisore, Environmental good governance
Zyrtarë të mjedisit dhe të zbatimit të ligjit zhvilluan një vizitë studimore në Sllovaki me fokus inspektimin mjedisor dhe hetimin e krimeve mjedisore, më 30 dhe 31 janar 2024. Vizita u organizua nga Prezenca e OSBE-së në Shqipëri, si pjesë e përpjekjeve të saj për të rritur kapacitetet kombëtare në adresimin e sfidave të lidhura me qeverisjen dhe sigurinë mjedisore. Gjatë takimeve me homologët sllovakë, delegacioni prej 11 anëtarësh u njoh me standardet vendase dhe ndërkombëtare për sigurinë mjedisore dhe hetimin e krimit mjedisor në Sllovaki. Ata përfituan edhe nga përvoja dhe praktikat e Njësisë Sllovake të Krimit Mjedisor, struktura e saj policore prej 200 oficerësh të policisë së krimit mjedisor dhe bashkërendimi i tyre ndërinstitucional. Delegacioni u prit nga zyrtarë të Departamentit për Zbulimin e Substancave të Rrezikshme dhe Krimin Mjedisor në policinë sllovake, Prokurorisë, Ministrisë së Mjedisit, autoriteteve doganore, Inspektoratit Shtetëror dhe Ministrisë së Bujqësisë së Sllovakisë. “Përafrimi i legjislacionit të krimit mjedisor është në një fazë të përparuar në Shqipëri. Megjithatë, zbatimi i tij kërkon një qasje të bashkërenduar strategjike mes institucioneve të ndryshme, ngritjen e kapaciteteve dhe ekspertizës të punonjësve dhe rritjen e ndërgjegjësimit publik”, tha Drejtorja e Përgjithshme e Agjencisë Kombëtare të Mjedisit, Arta Dollani. Vizita studimore ishte pjesë e projektit të Prezencës së OSBE-së “Për rritjen e qeverisjes dhe sigurisë mjedisore në Shqipëri", i cili financohet nga Italia, Franca dhe Norvegjia. Vitin e kaluar, Prezenca zhvilloi një kurrikulë të re për legjislacionin mjedisor për Shkollën e Magjistraturës dhe mbështeti një vlerësim të nevojave për trajnime për të gjitha institucionet që merren me sigurinë mjedisore.
Prezenca e OSBE-së në Shqipëri paraqet gjetjet paraprake të anketës për qeverisjen mjedisore dhe të vlerësimit të nevojave për trajnim
Publishing date: 20 dhjetor 2023
Content type: News
Where we are: Prezenca e OSBE-së në Shqipëri
What we do: Veprimtaritë mjedisore, Environmental good governance
Qeverisja mjedisore efektive dhe funksionale mbështetet në ekspertizën e gjerë teknike të institucioneve dhe angazhimin proaktiv publik. Duke njohur aspektet e ndërlikuara të sfidave mjedisore, Prezenca e OSBE-së po punon me agjencitë e zbatimit të ligjit dhe të respektimit të standardeve mjedisore për të forcuar kapacitetet e tyre teknike për trajtimin e shkeljeve mjedisore dhe për të rritur rolin dhe pjesëmarrjen e qytetarëve në qeverisjen mjedisore. Në këtë kontekst, si pjesë e përpjekjeve të saj të vazhdueshme, Prezenca e OSBE-së ka drejtuar punën për hartimin e dy dokumenteve të rëndësishme: një anketë e hapur për qeverisjen mjedisore dhe një vlerësim i nevojave për trajnim në të gjithë zinxhirin institucional që trajton shkeljet mjedisore. Më 19 dhjetor 2023, Prezenca prezantoi dhe diskutoi gjetjet paraprake të të dyja raporteve me 30 pjesëmarrës nga sfera të ndryshme, si prokurorë, inspektorë mjedisorë, zyrtarë policorë, nëpunës civilë dhe organizata të shoqërisë civile. Përmes këtij diskutimi teknik, u shtjelluan dhe thelluan më tej gjetjet paraprake, të cilat do të orientojnë dhe mbështesin punën e Prezencës për hartimin e programeve të posaçme të avancuara për trajnimin e institucioneve, si dhe për të ndërmarrë fushatat e ndërgjegjësimit publik për mjedisin. Në hapje të veprimtarisë, kreu i Departamentit për Qeverisjen në Çështjet Ekonomike dhe Mjedisore, Aleksandar Maskovic, tha: “Temat e diskutuara këtu do të ndihmojnë për të formësuar programet e ardhshme të trajnimit dhe, gjithashtu, do të kontribuojnë në zhvillimin e një strategjie të fuqishme dhe të bashkërenduar midis të gjitha palëve të interesuara.” Anila Leka, prokurore e Prokurorisë së Përgjithshme, nënvizoi rëndësinë e ngritjes së kapaciteteve të prokurorëve për shkeljet mjedisore, në përputhje me përpjekjet për rishikimin e të gjithë kodit penal të Shqipërisë. Anketa mbi qeverisjen mjedisore tregoi se 86% e të anketuarve kanë interes të lartë për të kontribuar për qeverisjen mjedisore në Shqipëri. Ndër të tjera, anketa trajtoi çështje të tjera të rëndësishme, si kryqëzimi i shkeljeve mjedisore me korrupsionin dhe gjininë. Rezultatet e sondazhit do të mbështesin Prezencën dhe palët e tjera të interesuara për të hartuar dhe zhvilluar fushata mjedisore të posaçme. Vlerësimi i nevojave për trajnim nënvizon rëndësinë e programeve sistematike të trajnimit për nëpunësit civilë të institucioneve që merren me shkeljet mjedisore. Ai hedh dritë mbi situatën aktuale, identifikon boshllëqet në njohuri dhe aftësi dhe përfundimisht u hap rrugën ndërhyrjeve strategjike që do të fuqizojnë palët përkatëse të interesuara në përpjekjet e tyre për të luftuar me efektivitet shkeljet mjedisore. Anketa dhe vlerësimi i nevojave për trajnim janë zhvilluar në kuadër të projektit me financim të jashtëm “Forcimi i qeverisjes dhe i sigurisë mjedisore në Shqipëri”, zbatuar nga Prezenca e OSBE-së në Shqipëri dhe mbështetur nga qeveritë e Norvegjisë, Francës dhe Italisë.
Prezenca e OSBE-së fuqizon këshilltaret e reja në Vlorë, Shkodër dhe Tiranë, përmes Programit të Ekselencës së Grave në Nivel Vendor
Publishing date: 14 dhjetor 2023
Content type: News
Where we are: Prezenca e OSBE-së në Shqipëri
What we do: Demokratizimi, Barazia gjinore
Rreth 45 këshilltare nga qarqet e Vlorës, Shkodrës dhe Tiranës morën pjesë në tri sesione informuese të posaçme të organizuara nga Prezenca e OSBE-së, si pjesë e Programit të Ekselencës së Grave në Nivel Vendor #WoMEP, gjatë dy javëve të para të dhjetorit 2023. Objektivi parësor i këtyre veprimtarive ishte forcimi i efikasitetit të grave këshilltare të sapozgjedhura. Duke i pajisur ato me mjetet e nevojshme, seancat informuese synuan t'i fuqizojnë përfaqësueset vendore, duke u mundësuar atyre të shkëlqejnë në rolet e tyre. Pjesëmarrëset u angazhuan në mënyrë aktive në diskutime për të identifikuar nevojat dhe pritshmëritë e tyre, duke kontribuar në planifikimin strategjik të aktiviteteve të WoMEP-it për vitin 2024. Gratë këshilltare, gjithashtu, u thelluan në përcaktimin e përparësive zhvillimore për qeverinë vendore dhe kuptimin e ndërlikimeve të buxheteve vendore dhe politikave fiskale. Që nga viti 2020, WoMEP qëndron si një nismë kryesore në përpjekjet e Prezencës për të nxitur barazinë gjinore në nivel vendor. Ky program novator është krijuar posaçërisht për të fuqizuar gratë këshilltare që shërbejnë në 61 këshillat bashkiakë të Shqipërisë, duke theksuar aspekte kritike si barazia gjinore, lidershipi dhe aftësitë menaxhuese. Qëllimi përfundimtar është të mbështesë dhe drejtojë gratë këshilltare, duke nxitur ndryshime të prekshme brenda këshillave bashkiakë.
Prezenca e OSBE-së thekson nevojën për progres me reformën zgjedhore në Shqipëri, në takimin e posaçëm të Grupit Ndërkombëtar të Punës për Zgjedhjet
Publishing date: 7 dhjetor 2023
Në veprimtarinë e tij të fundit si Kryetar i Prezencës së OSBE-së në Shqipëri, më 7 dhjetor 2023, ambasadori Bruce Berton priti takimin e posaçëm të Grupit Ndërkombëtar të Punës për Zgjedhjet, ku morën pjesë drejtues të ambasadave të shteteve pjesëmarrëse të OSBE-së dhe të organizatave ndërkombëtare në Shqipëri. Takimi u fokusua te rekomandimet e OSBE/ODIHR-it pas zgjedhjeve vendore të 14 majit 2023 dhe vizitës pasuese në Tiranë. Po ashtu, u diskutua për përpjekjet më të fundit lidhur me reformën zgjedhore dhe për nevojën për përparim të vazhdueshëm në këtë drejtim. “Shpresoj që drejtuesit dhe përfaqësuesit e partive dhe grupimeve të ndryshme politike të ngrihen mbi ndasitë dhe interesat partiake e të ndërmarrin hapa konkretë drejt një reforme të njëmendtë”, tha ambasadori Berton. “Vendimi i Kuvendit për ngritjen e komisionit të posaçëm për reformën zgjedhore përcakton se rekomandimet e OSBE/ODIHR-it janë udhëzuesi kryesor për reformën zgjedhore. Rekomandimet i drejtohen një game të gjerë aktorësh, përfshirë ata politikë, Komisionin Qendror të Zgjedhjeve, autoritetet shtetërore, institucionet publike e të tjerë dhe secili duhet të bëjë pjesën e vet”. Duke theksuar se të gjitha rekomandimet janë të rëndësishme dhe meritojnë vëmendje, ambasadori Berton vuri në dukje tri fusha kryesore që kërkojnë vëmendje të shtuar: Hetimi i plotë dhe i shpejtë i akuzave për shkeljet e rënda zgjedhore si blerje votash, presion ndaj votuesve dhe abuzim me burimet shtetërore për përfitime elektorale, së bashku me ndërgjegjësimin për këto dukuri negative; Garantimi i fshehtësisë së votimit nëpërmjet masave mbrojtëse efektive procedurale të zbatueshme nga autoritetet përgjegjëse kur flitet për parandalimin e frikësimit të votuesve, votimit në grup, në emër të përfaqësuesit, etj.. Trajtimi i disa çështjeve që lidhen me rolin e medias në zgjedhje, në veçanti:- shmangia ose të paktën kufizimi i përdorimit në lajme të materialeve të prodhuara nga partitë/autoritetet shtetërore;- nxitja e një mjedisi mediatik të pavarur dhe vërtet të larmishëm, që është i lirë nga ndikimi politik/privat dhe që kufizon përqendrimin e pronësisë së medias. Grupi Ndërkombëtar i Punës për Zgjedhjet është një forum i krijuar me nismën e Prezencës së OSBE-së në Shqipëri, i cili mblidhet periodikisht për të shkëmbyer informacione dhe për të bashkërenduar qëndrimet dhe ndihmën për çështjet zgjedhore.