ԵԱՀԿ-ն խթանում է օրենքի միասնական կիրառումը և արդարադատության կանխատեսելիությունը Հայաստանում

ԵԱՀԿ աջակցությամբ 2016թ. հունիսի 11-ին և 12-ին Դիլիջանում կազմակերպված ուսուցողական սեմինարի ուշադրության կենտրոնում էին մարդու իրավունքներն ու արդար դատաքննության չափանիշներն՝ արտացոլված ՀՀ վճռաբեկ դատարանի վերջին որոշումներում, որը հանդիսանում է երկրի բարձրագույն դատական ​​ատյան՝ բացառաթյամբ սահմանադրական հարցերի: Սեմինարի նպատակն էր խթանել արդարադատության թափանցիկությունն ու կանխատեսելիությունը և օրենքի միասնական կիրառումը:

Ընդհանուր իրավասության դատարանների և Վերաքննիչ դատարանի մոտ քառասուն դատավորներ և նրանց օգնականներ քննարկեցին Վճռաբեկ դատարանի հիմնական նախադեպային որոշումները՝ կապված մարդու իրավունքների և մինչդատական ​​վարույթում դատական ​​վերահսկողության հետ, անմեղության կանխավարկածը, ազատության և անձնական անձեռնմխելիության իրավունքն ու արդար դատաքննության այլ երաշխիքներ:

Վճռաբեկ դատարանի Քրեական պալատի նախագահ Դավիթ Ավետիսյանը, ով վարում էր աշխատաժողովն, ընդգծեց, որ վճռաբեկ դատարանի նախադեպային որոշումները ոչ միայն ձևավորում են դատական ​​պրակտիկան, այլ նաև ներգործում են քրեական արդարադատության համակարգում ընդհանուր զարգացումների և ընթացիկ բարեփոխումների վրա:

«Այս նախաձեռնությունը ԵԱՀԿ երևանյան գրասենյակի շարունակական ջանքերի մաս է՝ խթանելու միջազգային լավագույն փորձի և մարդու իրավունքների չափանիշների կիրառումը դատավորների առօրյա աշխատանքում», - ասաց  ԵԱՀԿ գրասենյակի իրավաբանական խորհրդատու Մարիա Սիլվանյանը:

Միջոցառումը չորրորդն է աշխատաժողովների շարքում՝ կազմակերպված ԵԱՀԿ երևանյան գրասենյակի աջակցությամբ՝ Վճռաբեկ դատարանի ու Դատական ​​դեպարտամենտի հետ համատեղ: Ուսուցողական սեմինարների ընթացքում վերապատրաստվել են Երևանից և Հայաստանի մարզերից շուրջ հարյուր մասնակից՝ քրեական իրավունքի դատավորներ և նրանց օգնականներ:

ԵԱՀԿ գրասենյակը Վճռաբեկ դատարանի հետ երկարաժամկետ համագործակցության ընթացքում իր ներդրումն է ունեցել դատական ​​համակարգի անկախության, անաչառության և հմտությունների զարգացման, ինչպես նաև  միջազգային չափանիշներին համապատասխան որոշումների ընդունման ուղղությամբ: