Ҳифзи ҳадафҳои осебпазир аз ҳамлаҳои террористӣ: анҷоми сафари омӯзишии мансабдорони ҳукуматии Ҷумҳурии Тоҷикистон ба Фаронса таҳти роҳбарии САҲА

Дафтари барномаҳои САҲА дар Душанбе, Департаменти таҳдидҳои фаромиллии САҲА ва Намояндагии доимии Фаронса дар САҲА барои намояндагони ҳукумати Ҷумҳурии Тоҷикистон ба Париж сафари омӯзишӣ ташкил намуда, онҳоро бо таҷрибаи Фаронса дар ҳифзи ҳадафҳои осебпазир аз ҳамлаҳои террористӣ шинос намуданд.

Дар ҷараёни сафари омӯзишӣ, ки аз 20 то 22 ноябри соли 2023 сурат гирифт, мансабдорони Ҷумҳурии Тоҷикистон бо намояндагони шаҳри Париж ва ҳукумати кишвар мулоқот карданд. Онҳо таҳияи нақшаҳои амал дар ҳолатҳои фавқулодда дар ҷойҳои ҷамъиятӣ, аз ҷумла мактабҳо, бемористонҳо, ибодатхонаҳо ва марказҳои савдоро баррасӣ карданд. Онҳо инчунин расмиёти таҳлили таҳдидҳо, такмили чорчӯбаи қонунгузориро оид ба пешгирии терроризм, усулҳои ҳифзи ҷойҳои ҷамъиятӣ бо риояи ҳуқуқи инсон ва ҳамкорӣ бо ҷомеа баррасӣ карданд.

«Таҷрибаи Фаронса дар мубориза бо терроризм дар маҷмӯъ ва бахусус ҳифзи ҳадафҳои осебпазир дар вазъияти терроризм метавонад барои густариши минбаъдаи талошҳои миллии мо дар ин самт хеле муфид бошад. Ин як сафари пурсамар ва пурмазмуни омӯзишӣ буд», гуфт муовини Сардори Раёсати кафолатҳои ҳуқуқи инсони назди Дастгоҳи Президенти Ҷумҳурии Тоҷикистон ва роҳбари ҳайати Тоҷикистон дар ин сафари омӯзишӣ Зафар Сафарализода.

«Кишвари мо солҳои тӯлонӣ мавриди ҳадафи гурӯҳҳои ДИИШ ва Ал-Қоида ва тарафдорони онҳо қарор гирифтааст. Ҳамла ба ҳадафҳои осебпазир як усули амалиётест, ки мо бояд онро пешгӯӣ кунем ва ба онҳо вокуниш кунем. Ҳамлаҳои террористӣ, ки ҷомеаи фаронсавиро дар солҳои охир, бахусус дар моҳҳои январ ва ноябри соли 2015 дар Париж ба мотам оварданд, зарурати муҳимтарини таъмини амнияти мардуми Фаронса ҳангоми нигоҳ доштани тарзи зиндагӣ, арзишҳо ва ӯҳдадориҳои мо ба озодиро нишон медиҳанд. Ин сафари омӯзишӣ, ки бо ибтикори САҲА сурат гирифт, ба ҳайати Ҷумҳурии Тоҷикистон дар ин сафари омӯзишӣ имкон дод, ки бо мансабдорони мухталифе, ки масъули ҳалли ин мушкилотанд, вохӯранд ва ба талошҳои мо ҷиҳати таҳкими ҳамкорӣ ва табодули таҷрибаи пешқадам бо кишварҳое, ки бо таҳдидҳои шабеҳ дучор меоянд, саҳм гузорад», - гуфт генерал Кристоф Перре, Сардори зербахши корҳои байналмилалии Вазорати корҳои дохилии Фаронса (SDAI), ки сафари омӯзиширо ҳамоҳанг кардааст.

«Яке аз ҷиҳатҳои қавии САҲА ин кордонӣ ва таҷрибаи кишварҳои узви он ва омодагии онҳо барои мубодила бо ҳамдигар аст. Мо ба ҳукумати Фаронса барои  пазируфтани ҳайати Ҷумҳурии Тоҷикистон дар кишварашон ва дастрас кардани таҷрибаи зарурӣ барои воқеан дарк кардани он, ки чӣ гуна мактабҳо, ҷойҳои ҷамъиятӣ, ибодатгоҳҳо ва дигар ҳадафҳои осебпазир аз ҳамлаҳои террористӣ ҳифз шудаанд, изҳори миннатдорӣ мекунем», гуфт Юкка Туононен Роҳбари Шӯъбаи сиёсӣ-ҳарбӣ ва Иҷрокунандаи вазифаи Роҳбари Дафтари барномаҳои САҲА дар Душанбе.

Сафари омӯзишӣ барои таҳкими минбаъдаи иқтидор ва дастгирии техникии Ҷумҳурии Тоҷикистон аз ҷониби САҲА дар самти ҳифзи ҳадафҳои осебпазир бо таваҷҷӯҳ ба пешгирии таҳдидҳои террористӣ ва риояи эҳтироми ҳуқуқ ва озодиҳои асосии инсон асос хоҳад буд. Сафари омӯзишӣ дар баробари фаъолиятҳои охирини САҲА ва ҳамкорони соҳаи ҳифзи ҳадафҳои осебпазир, аз ҷумла Семинари соли 2023 оид ба баланд бардоштани сатҳи огоҳӣ ва оғози татбиқи Нақшаи амали Ҷумҳурии Тоҷикистон оид ба мубориза бо таҳдидҳои террористӣ ба ҳадафҳои осебпазир ва семинари минтақавии ба Осиёи Марказӣ нигаронидашудаи ҳифзи ҳадафҳои осебпазир аз ҳамлаҳои террористӣ то соли 2022 доир мегардад.

Сафари омӯзишӣ дар доираи лоиҳаи аз Буҷети умумии Дафтари барномаҳои САҲА дар Душанбе маблағгузоришудаи «Дастгирии стратегияи миллии Ҷумҳурии Тоҷикистон ва нақшаи чорабиниҳо оид ба мубориза бо терроризм ва ифротгароии хушунатомез барои солҳои 2021-2025» сурат гирифт, ки ба кишвари мизбон дар татбиқи ӯҳдадориҳои зиддитеррористии худ мувофиқи стандартҳо ва принсипҳои дахлдори САҲА мусоидат мекунад.