ԵԱՀԿ-ն ներկայացնում է «Բոլոնյան համակարգն ուսանողի աչքերով» ուսումնասիրության արդյունքները Հայաստանում

ԵՐԵՎԱՆ, 17 սեպտեմբերի 2015թ. – Այսօր Երևանում ներկայացվեցին ԵԱՀԿ աջակցությամբ իրականացված ուսումնասիրության արդյունքներն ու առաջարկությունները: Վերջինիս նպատակն էր բացահայտել ուսանողների տեղեկացվածության աստիճանը ու վերաբերմունքը Հայաստանում իրականացվող կրթական բարեփոխումների վերաբերյալ:

Հետազոտությունը իրականացվել է 1723 ուսանողների շրջանում՝ Երևանի և մարզերի 37 պետական, մասնավոր և միջկառավարական բարձրագույն ուսումնական հաստատությունների մասնակցությամբ: Անհատական հարցազրույցները իրականավել էին 2014թ. հոկտեմբերից 2015թ. ապրիլի ժամանակահատվածում:

Ուսումնասիրության արդյունքում հայտնաբերվել է, որ Բոլոնյայի բարեփոխումները Հայաստանում իրականացվում են բավարար մակարդակի վրա: Ուսանողների 57% կարծում է, որ կրթական համակարգում իրականացվել են խորը և էական փոփոխություններ:  Սակայն, ուսանողների մեծ մասը չի կարող հստակ բացատրել, թե ինչ են իրենցից ներկայացնում Բոլոնյայի բարեփոխումները և կապում են դրանք նոր գնահատման համակարգի, բարձրագույն կրթության որակի ապահովման կամ ուսանողակենտրոն ուսուցման հետ:

«Կրթության իրավունքը մարդու հիմնարար իրավունքներից մեկն է և սերտ կապված է երկրում անվտանգության հետ», նշեց ԵԱՀԿ երևանյան գրասենյակի Մարդու իրավունքների ծրագրերի պատասխանատու Ռադկա Ռուբիլինան: «Կրթական համակարգի վերաբերյալ տեղեկատվությունը պետք է լինի մատչելի և հասկանալի: Նման կրթական համակարգն է առաջադեմ հասարակության և կայուն տնտեսության երաշխիքը»: 

Զեկույցը ԵԱՀԿ երևանյան գրասենյակի աջակցությամբ իրականացրել էր Հայաստանի ուսանողական ազգային ասոցիացիան, որը համահավաք մարմին է և ներկայացնում է ուսանողների շահերը 17 տեղական միությունների միջոցով: Ուսումնասիրությունը տրամադրում է վիճակագրական տվյալներ պետությունում տեղի ունեցող բարեփոխումների վերաբերյալ ուսանողների ընկալումների մասին և առաջարկում փոփոխություններ ներկա իրավիճակը բարելավելու համար:

Հայաստանի ուսանողական ազգային ասոցիացիայի նախագահ Արմեն Ալեքսանյանը հավելեց. «Մեր օրերում գիտելիքն ու կրթությունը ամենակարևոր ռեսուրսներն են, որոնց միջոցով էլ հենց կերտվում է վաղվա ապագան, ինչքան որակյալ լինի այդ ռեսուրսը, այդքան ավելի շատ են երաշխիքները, որ վաղը կունենանք ամուր հիմքերով պետություն: Ուսանողությունը՝ որպես հասարակության ամենակտիվ խավ, պետք է մասնակցի իր կրթության որակի գնահատմանը և ներկայացնի իր տեսակետը գալիք սերունդների համար առավել որակյալ կրթություն ապահովելու համար»:

Մարզերի ուսանողները ավելի գոհ են բարեփոխումների արդյունավետությունից՝ ի տարբերություն մայրաքաղաքի ուսանողությանը, ինչը կարող է պայմանավորված լինել որակյալ կրթություն ստանալու պահանջների տարբերությամբ: Հետաքրքրական է, որ Բոլոնյայի համակարգի ազդեցության վերաբերյալ դրական ընկալումը նվազում է ուսման տարիներին զուգահեռ: Ուսանողների թիվը, ում կարծիքով Բոլոնյայի համակարգը մակերեսային է, առանց էական փոփոխությունների, ավելի մեծ է բարձր կուրսի ուսանողների շրջանում՝ թե՛ բակալավրի, և թե՛ մագիստրոսի կրթական ծրագրերում, ի տարբերություն ցածր կուրսերի ուսանողների: 

Զեկույցի հայերեն տարբերակը կարող եք գտնել այստեղ.

https://www.osce.org/node/182206