Dialogu politik konstruktiv, i rëndësishëm për çuarjen përpara të reformave, thotë përfaqësuesja e Kryetarit të OSBE-së, gjatë vizitës në Shqipëri

TIRANË, 28 shtator 2012 – Dialogu i sinqertë, me pjesëmarrjen e të gjithë aktorëve, është thelbësor në përparimin e axhendës së reformave të Shqipërisë, tha Lucinda Creighton, Ministrja irlandeze për Çështjet Evropiane, që përfaqëson Kryetarin e Radhës së OSBE-së, gjatë vizitës së saj zyrtare, sot, në Shqipëri.

Pas takimeve me Kryeministrin Sali Berisha dhe Ministren e Integrimit Majlinda Bregu, Creighton tha: “Dialogu i sinqertë, me përkushtimin serioz dhe konstruktiv të të gjitha partive të mëdha politike, është tejet i rëndësishëm në çuarjen përpara të axhendës së reformave të Shqipërisë, edhe në mbështetje të aspiratave të saj evropiane”.

“Kjo është veçanërisht e rëndësishme në periudhën përgatitore për zgjedhjet parlamentare të 2013-s”, theksoi ajo. “Është thelbësore që të gjitha palët politike të dëshmojnë vullnetin politik për të zhvilluar zgjedhje të lira e të ndershme, ku përfshihet zbatimi i plotë i Kodit Zgjedhor të rishikuar”, tha ajo.

“Irlanda e mbështet plotësisht anëtarësimin në Bashkimin Evropian të të gjitha vendeve të Ballkanit Perëndimor, përfshirë Shqipërinë, si një rrugë drejt paqes dhe stabilitetit të rajonit. Si vendi që do të marrë Presidencën e ardhshme të Këshillit Evropian, ne presim me interes rekomandimet e Komisionit Evropian për përparimin e Shqipërisë drejt statusit të vendit kandidat”, tha ajo.

Creighton përshëndeti pjesëmarrjen aktive të Shqipërisë në punën e OSBE-së, edhe përmes bashkëpunimit me misionin e kësaj organizate në vend. Ajo lavdëroi përparimin në zbatimin e reformave kyçe dhe përsëriti gatishmërinë e OSBE-së për të vijuar së mbështeturi Shqipërinë në zgjidhjen e çështjeve të mbetura, përfshirë ato që lidhen me reformën gjyqësore, luftën kundër korrupsionit dhe forcimin e shtetit të së drejtës.

Vizita në Shqipëri përmbyll vizitën zyrtare katërditore të Ministres në rajon, gjatë së cilës ajo vizitoi edhe Beogradin, Prishtinën, Shkupin dhe Lubjanën.