ԵԱՀԿ և ԵՄ աջակցեցին Հայաստանում ընտրությունների ժամանակ ոստիկանության դերի վերաբերյալ քննարկմանը
ԵՐԵՎԱՆ, 13-ն ապրիլի, 2012 – Այսօր Երևանում կլոր սեղան-հանդիպման ընթացքում քննարկվեց ընտրությունների ժամանակ ոստիկանության դերի և գործառույթների հարցերը, ներառյալ` համագործակցությունը ընտրական հանձնաժողովների, քաղաքական կուսակցությունների, դիտորդների հետ, ինչպես նաև կապը քաղաքացիների հետ:
Միջոցառումը կազմակերպվել էր ՀՀ ոստիկանության նախաձեռնությամբ` ԵԱՀԿ երևանյան գրասենյակի աջակցությամբ և Եվրամիության ֆինանսական օժանդակությամբ:
Աշխատանքային քննարկման նպատակն էր պարզել տարբեր իրավապահ մարմինների դերը ընտրական գործընթացների բոլոր փուլերում և նրանց կապը ընտրական կառույցների հետ, ինչպես նաև տեղեկացնել այդ մասին բոլոր շահագրգիռ կողմերին, այդ թվում` քաղաքական կուսակցություններին, ընտրական մարմիններին, դիտորդներին, ԶԼՄ-ին, միջազգային կազմակեպություններին և լայն հասարակությանը:
«Առաջիկա ընտրությունների սահուն անցկացումն ապահովելու գործում ոստիկանության դերը չի կարելի թերագնահատել», - ասաց ՀՀ ոստիկանության ղեկավար, գեներալ-լեյտենանտ Վլադիմիր Գասպարյանը և շարունակեց, - «Այսօրվա քննարկման գլխավոր նպատակն է ներկայացնել ընտրությունների նախապատրաստման համար մինչև այժմ Ոստիկանության ձեռնարկած միջոցառումները և լսել մասնակիցների տեսակետներն ու առաջարկները»:
ԵԱՀԿ երևանյան գրասենյակի ղեկավար, դեսպան Անդրեյ Սորոկինը հավելեց. «Ես ուրախ եմ տեսնել իրավապահ մարմինների շարունակական ջանքերը` լինել կանխատեսելի և թափանցիկ հանրության համար և տեղեկացնել հասարակությանը, թե ինչպես է ոստիկանությունը անդրադառնալու հանրության ուշադրության կենտրոնում գտնվող խնդիրներին: Այսօրվա միջոցառումը առաջինն է իր շարքում, և մենք խրախուսում ենք ներկա գտնվող ոստիկանության, ԶԼՄ-ների, քաղաքական կուսակցությունների և քաղաքացիական հասարակության կազմակերպությունների ներկայացուցիչներին լայնորեն տարածել այսօր հնչած զեկույցների և քննարկումների արդյունքները«:
«Թափանցիկությունը շատ կարևոր է ընտրական գործընթացի նկատմամբ հասարակության վստահությունն ունենալու համար», նշեց Եվրամիության պատվիրակության առաջին խորհրդական Օննո Սիմոնսը: «Ոստիկանությունը կարևոր դեր ունի այս գործում, և մենք հույս ունենք, որ իրապես կապահովի թափանցիկություն և դրանով կհավաստիացնի ընտրողներին իրենց ընտրության կարևորության մասին»:
Մասնակիցները քննարկեցին ոստիկանության` ընտրությունների հարցերով նորաստեղծ օպերատիվ շտաբի գործառույթները, ինչպես նաև ընտրացուցակներում հնարավոր անճշտությունների վերացման գործընթացին հասարակության ներգրավվածության, ընտրախախտումների մասին ոստիկանության հաղորդումների ներկայացման ընթացակարգերի և դրանց արագ արձագանքման ուղիների վերաբերյալ: Քննարկված թեմաներից էին նաև ընտրական հանձնաժողովների և ոստիկանության ստորաբաժանումների համագործակցությունը, լրատվամիջոցներին տեղեկատվության տրամադրումը, քվեարկության օրը ոստիկանության ուժերի ծառայության անցկացումը, պարեկապահակային ծառայության իրականացումը, հասարակական կարգի ու հասարակական անվտանգության ապահովումը:
Աշխատանքային քննարկումը Հայաստանում ընտրական գործընթացների հզորացմանն ուղղված 1.7 միլիոն եվրո արժողությամբ ծրագրի մասն է, որն իրականացվում է ԵԱՀԿ երևանյան գրասենյակի կողմից` Եվրամիության ֆինանսական աջակցությամբ: