Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Misioni i OSBE-së në Kosovë përmbyll serinë e punëtorive mbi dhunën seksuale dhe ngacmimin seksual për nxënës të shkollave të mesme
Publishing date: 8 qershor 2023
Content type: News
Where we are: Misioni i OSBE-së në Kosovë
Më 31 maj 2023, Misioni i OSBE-së në Kosovë përfundoi serinë prej pesë punëtorish për nxënës të shkollave të mesme mbi dhunën seksuale dhe ngacmimin seksual. Organizuar në bashkëpunim me Ministrinë e Arsimit, Shkencës, Teknologjisë dhe Inovacionit (MESTI), punëtoritë kanë synuar pasurimin e mëtejmë të njohurive të pjesëmarrësve rreth këtyre temave dhe përgatitjen e tyre për të organizuar aktivitete të ngjashme për bashkëmoshatarët e tyre, pas një raundi prej pesë punëtorish te mbajtura vitin e kaluar. Pesë punëtoritë u mbajtën në Gjilan, Mitrovicë Jugore, Prishtinë, Gjakovë dhe Prizren dhe u ndoqën nga 71 nxënës të shkollave të mesme. Nxënësit mësuan rreth përkufizimeve të dhunës me bazë gjinore, sulmit seksual, ngacmimit seksual, shërbimeve në dispozicion dhe rëndësisë së raportimit të hershëm, si dhe rreth roleve të institucioneve të ndryshme në trajtimin dhe adresimin e rasteve të dhunës seksuale dhe ngacmimit seksual. “Bazuar në Anketën e OSBE-së për Sigurinë dhe Mirëqenien e Grave të publikuar në vitin 2019, pothuajse një e treta e të gjitha grave, ose 29%, thonë se kanë përjetuar të paktën një formë të ngacmimit seksual që nga mosha 15 vjeçare. Dhuna ndaj grave është veçanërisht e lartë tek nxënësit me 60%, dhe është shkak e pasojë e pabarazisë gjinore, e nxitur nga normat dhe qëndrimet ekzistuese”, tha Valentina Bejtullahu Turjaka nga Misioni i OSBE-së në Kosovë. “Nga ana tjetër, ndonëse raportimi i hershëm i dhunës seksuale është thelbësor për të siguruar qasje në drejtësi për viktimat gjatë proceseve gjyqësore, ai mbetet i ulët kryesisht për shkak të mungesës së mbështetjes nga familja, shkolla dhe shoqëria, e ndjekur nga stigma dhe frika nga kërcënimi. Shumë nxënës nuk janë të vetëdijshëm se ngacmimi seksual është vepër penale dhe e dënueshme me ligj në Kosovë, dhe shumë prej tyre nuk kanë informacion mbi shërbimet në dispozicion dhe mekanizmat e raportimit. Prandaj, ndërgjegjësimi i gjeneratave të reja mbi këtë shkelje të ndjeshme të të drejtave të njeriut është domosdoshmëri për të thyer heshtjen, për të fuqizuar vajzat dhe për të parandaluar çdo formë diskriminimi dhe dhune mes tyre”, shtoi ajo. Gjatë punëtorive, përmes ushtrimeve në grup, pjesëmarrësit diskutuan edhe për metodologjinë dhe hartuan plan veprimi se si të organizojnë punëtori për bashkëmoshatarët e tyre. Deri më tani, me mbështetjen e Misionit të OSBE-së dhe psikologëve të shkollave, nxënësit e trajnuar kanë organizuar 12 sesione informuese për dhunën seksuale dhe ngacmimin seksual për rreth 290 nxënës tjerë. Përveç kësaj, ata kanë krijuar edhe vepra arti dhe posterë me mesazhe mbi dhunën seksuale dhe mekanizmat e raportimit. Gjatë gjithë vitit 2023, me mbështetjen e psikologëve të shkollave, nxënësit do të organizojnë sesione informuese shtesë për dhunën seksuale dhe ngacmimin seksual për më shumë nxënës. Misioni i OSBE-së në Kosovë është i mandatuar për të mbrojtur dhe promovuar të drejtat e njeriut dhe të komuniteteve, si dhe demokratizimin dhe zhvillimin e sektorit të sigurisë publike.
Misioni i OSBE-së në Kosovë nis edicionin e 5-të të programit për gazetarë të rinj ‘Media Fellowship’
Publishing date: 22 maj 2023
Content type: News
Where we are: Misioni i OSBE-së në Kosovë
What we do: Liria dhe zhvillimi i medias, Rinia
Misioni i OSBE-së në Kosovë ka nisur sot edicionin e pestë të Programit ‘Media Fellowship’, iniciativë kjo vjetore që synon të zhvillojë kapacitetet e gazetarëve të rinj dhe të krijojë rrjet kolegësh gazetarë nga komunitete të ndryshme. Tetë gazetarë nga e gjithë Kosova do të vizitojnë organizatat lokale të gazetarëve, transmetuesit publikë, këshillat e mediave të shkruara, si dhe mediat hulumtuese në Prishtinë dhe Beograd. Ata do të mësojnë nga afër për standardet e raportimit profesional, standardet e gazetarisë, raportimin cilësor, edukimin medial dhe informativ, si dhe respektimin e kodeve të etikës. "Programi ‘Media Fellowship’ i Misionit të OSBE-së mbledh gazetarë të rinj nga komunitete të ndryshme, duke u dhënë atyre mundësi për t'u lidhur me gazetarë dhe ekspertë të njohur, si dhe duke i ndihmuar të zhvillohen në një ambient medial dinamik," tha Ambasadori Michael Davenport, Shef i Misionit të OSBE-së në Kosovë. “Në rrugëtim e tyre drejt ngritjes profesionale, këta gazetarë të rinj do të formësojnë diskursin e ardhshëm publik dhe shpresoj se do të mbrojnë lirinë e shtypit dhe qasjen në informata të besueshme,” shtoi ai. Nisur në vitin 2017, me një ndërprerje dyvjeçare gjatë pandemisë, ‘Media Fellowship’ kultivon talentin e gazetarëve vendor, duke promovuar barazinë gjinore. Ai vazhdon të shërbejë si mundësi për të forcuar marrëdhëniet mes gazetarëve nga komunitete të ndryshme, si dhe njohuritë e tyre për mënyrën se si funksionon media në rajon. Deri më tani, 38 gazetarë nga komunitete të ndryshme në Kosovë kanë marrë pjesë në program dhe i janë bashkuar të diplomuarve nga programi ‘Media Fellowship’. Gazetarët e përzgjedhur për programin e këtij viti janë: Shkodrane Dakaj, BIRN; Unitet Berisha, T7; Vlera Shabani, Kallxo.com; Zoran Saviq, KOSSEV; Dushica Stankoviq, Radio Kontakt Plus; Urosh Nikoliq, RTV Mir; Donjeta Zeqiraj, Telegrafi.com; si dhe Armand Hoti, ATV. “Doja të isha pjesë e Programit ‘Media Fellowship’, sepse mendoj se bashkëpunimi me gazetarë të tjerë në këtë program mund të jetë i dobishëm në shumë mënyra. Mund të shkëmbehen ide, të merren vlerësime për punën si dhe të fitohen njohuri nga këndvështrime të ndryshme. Këto ndërveprime mund të nxisin kreativitetin, të frymëzojnë këndvështrime të reja në storiet tona, si dhe të na ndihmojnë të përsosim aftësitë tona të shkrimit,” tha Shkodrane Dakaj nga BIRN. “Pritjet e mia nga kjo vizitë vlerësuese në media në Prishtinë dhe Beograd janë që do të kem mundësinë të shoh dhe të vërej se si funksionojnë mediat e mëdha. Ajo që më gëzon veçanërisht është se do të kem mundësinë të ndjek ndoshta program drejtpërdrejt në ndonjë televizion me frekuenca kombëtare. Si gazetare, besoj se kjo përvojë do të ketë shumë domethënie për mua në punën dhe avancimin tim në të ardhmen, sepse do të kem mundësinë të bisedoj me kolegë që kanë shumë vite, madje edhe dekada punë prapa tyre,” tha Dushica Stankoviq, gazetare në Kontakt Plus Radio. “Të qenit pjesë e këtij programi do të më ndihmojë shumë në punën time të ardhshme. E di që do të takoj njerëz me të cilët do të bashkëpunoj në të ardhmen. E vlerësoj edhe faktin që do të takoj edhe kolegë me të cilët do të ndajmë ide të ndryshme për punën tonë, por edhe përvojat tona,” tha Unitet Berisha nga T7. Misioni i OSBE-së në Kosovë ka për mandat mbrojtjen dhe promovimin e të drejtave të njeriut, demokratizimin dhe zhvillimin e sektorit të sigurisë publike. Misioni ndihmon në mbrojtjen e lirisë së medias dhe lirisë së shprehjes, si dhe mbështet zhvillimin e mediave.
Misioni i OSBE-së prezanton Udhëzuesin për punë efektive të Mekanizmave Komunal kundër Dhunës në Familje
Publishing date: 17 maj 2023
Misioni i OSBE-së në Kosovë prezantoi të mërkurën Udhëzuesin për Punë Efektive të Mekanizmave Koordinues Komunal kundër Dhunës në Familje (MKKDHF), një mjet për të lehtësuar reagimin më efektiv dhe më të koordinuar ndaj rasteve të dhunës në familje. MKKDHF-të synojnë të forcojnë bashkërendimin, shkëmbimin e informacionit dhe angazhimin e të gjithë akterëve përkatës në nivel lokal. Ato përbëhen nga përfaqësues të gjykatave dhe prokurorive, Policisë së Kosovës, drejtorive përkatëse komunale, Zyrës për Mbrojtje dhe Ndihmë Viktimave, Qendrave për Punë Sociale, strehimoreve lokale për viktimat e dhunës në familje dhe organizatave të shoqërisë civile. Udhëzuesi mbulon bazën ligjore dhe qëllimin e MKKDHF-ve dhe lehtëson një qasje të koordinuar shumë-institucionale, e cila përfshin mbledhjen e të dhënave, raportimin, trajnimin dhe ngritjen e kapaciteteve për anëtarët e MKKDHF-ve. “Ne të gjithë e kuptojmë se sa e rëndësishme është të punojmë së bashku për të parandaluar dhe trajtuar problemin e dhunës në familje. MKKDHF-të, si organe koordinuese në nivel lokal, janë një hap në drejtimin e duhur,” tha Ambasadori Michael Davenport, Shef i Misionit të OSBE-së në Kosovë. “Udhëzuesi i publikuar sot duhet të shërbejë si një mjet praktik për të ndihmuar anëtarët të rrisin më tej efikasitetin e MKKDHF-ve përmes kuptimit më të mirë të roleve dhe përgjegjësive të tyre,” shtoi Ambasadori Davenport. Udhëzuesi është pjesë e një projekti të mbështetur nga Qeveria Franceze, dhe është hartuar nga Misioni i OSBE-së në Kosovë pas vlerësimit të nevojave, takimeve të gjera me anëtarë të MKKDHF-ve, trajnimeve dhe punëtorive. Ambasadori francez, Olivier Guerot, tha se Franca promovon zbatimin universal të Konventës së Stambollit si pjesë e përpjekjeve të saj në kuadër të diplomacisë feministe. “Financimi i këtij aktiviteti të OSBE-së është pjesë e promovimit të Konventës së Stambollit dhe zbatimit të saj. Ky është një mjet i shkëlqyer për të lehtësuar zbatimin praktik të Konventës dhe ne kishim kënaqësinë të mbështeteshim në përvojën dhe ekspertizën e Misionit të OSBE-së në Kosovë,” tha Guerot. Ministrja e Drejtësisë, Albulena Haxhiu, theksoi se “lufta kundër dhunës në familje dhe dhunës ndaj grave kërkon një përgjigje gjithëpërfshirëse dhe të mirë-koordinuar të të gjitha institucioneve dhe agjencive të përfshira në çdo rast që nga momenti i raportimit deri tek fuqizimi i viktimës dhe mundësimi i një jete të dinjitetshme, të pavarur dhe pa dhunë.” Deri më sot, gjithsej 33 MKKDHF janë themeluar në shumicën e komunave të Kosovës, 20 prej tyre me mbështetjen e Misionit të OSBE-së. Me 18 maj 2023, Misioni i OSBE-së do të mbështesë themelimin e MKKDHF-së të 34-të në Shtërpcë. Udhëzuesin në gjuhën shqipe, serbe, turke dhe angleze mund ta gjeni këtu: Guidelines for Effective Performance of Municipal Coordination Mechanisms Against Domestic Violence (MCMDVs) | OSCE
Misioni i OSBE-së nis sesione informuese me të rinj të komuniteteve jo-shumicë për t'iu bashkuar Policisë së Kosovës
Publishing date: 11 maj 2023
Content type: News
Where we are: Misioni i OSBE-së në Kosovë
What we do: Të drejtat e njeriut, Policimi, Sundimi i ligjit
Misioni i OSBE-së në Kosovë mbajti dje në Graçanicë takimin e parë nga gjithsej gjashtë sa do të mbahen me të rinj të komuniteteve jo-shumicë për t'i informuar ata rreth mundësive të punësimit në Policinë e Kosovës dhe për t'i njoftuar me procedurat e rekrutimit. Takimet do të zhvillohen së bashku me policinë në rajone të ndryshme në mbarë Kosovën dhe po mbahen në mbështetje të fushatës së Policisë së Kosovës për rekrutim. Në këto sesione, pjesëmarrësit do të mësojnë për procedurat e aplikimit për t'ju bashkuar policisë, duke u përqendruar veçanërisht në kriteret e rekrutimit dhe procesin e përzgjedhjes, përfshirë edhe testet me shkrim, ato fizike dhe psikologjike. Ata do të mësojnë edhe për trajnimin bazik profesional të policisë dhe për rëndësinë e punës së policisë për të kontribuar për komunitetet të cilave u shërbejnë. “Edhe pse korniza ligjore ofron mbrojtje adekuate dhe përfshirje të barabartë të të gjitha komuniteteve në radhët e policisë, përfshirja e komuniteteve jo-shumicë mbetet sfidë për policinë”, tha Ambasadori Michael Davenport, Shef i Misionit të OSBE-së në Kosovë. “Një forcë policore diverse dhe përfaqësuese i shërben më mirë publikut. E përgëzojmë Policinë e Kosovës për përpjekjet e saj për t’iu qasur të gjitha komuniteteve, duke ofruar informacion të dorës së parë dhe përgjigjur pyetjeve, dhe duke i motivuar njerëzit që të bëhen pjesë e saj për të ofruar siguri për komunitetet e ndryshme të Kosovës”, shtoi ai. Misioni i OSBE-së në Kosovë ka për mandat mbrojtën dhe promovimin e të drejtave të njeriut dhe të komuniteteve, si dhe demokratizimin dhe zhvillimin e sektorit të sigurisë publike. Përveç trajnimeve të specializuara dhe mundësive zhvillimore për policinë, Misioni punon me Policinë e Kosovës për të shtuar edhe më tej pjesëmarrjen e komuniteteve jo-shumicë dhe grave në radhët e saj. Një video mesazh nga Ambasadori Davenport në mbështetje të kësaj fushate mund ta shikoni këtu: (1) Facebook
“Si të shoh? – Kosovë:” OSBE dhe DokuFest bashkojnë të rinjtë nga komunitete të ndryshme përmes kampit të shkëmbimit ndërkulturor
Publishing date: 8 maj 2023
Misioni i OSBE-së në Kosovë, në bashkëpunim me DokuFest-in, e kanë përmbyllur më 7 maj 2023 kampin e shkëmbimit ndërkulturor tetëditor si pjesë e nismës "Si të shoh? – Kosovë” (“How do I see you? – Kosovo). Aktiviteti bashkoi 14 të rinj nga komunitete, zona dhe prejardhje të ndryshme, me qëllim që të njihen më mirë me njëri-tjetrin dhe së bashku të zbërthejnë paragjykimet që mund të ndikojnë në dialogun dhe mirëkuptimin e ndërsjellë. Aktiviteti ka përfshirë vizita kulturore në mbarë Kosovën, takime me organizata që promovojnë shkëmbimet kulturore dhe dialogun, dhe eksplorim të edukimit medial dhe filmik si mjete për të shkëmbyer përvoja dhe për të tejkaluar dallimet. Pjesëmarrësit patën mundësinë që të sfidojnë pikëpamjet e tyre fillestare se çfarë do të thotë të jetosh në shoqëri shumëkulturore. Ata iu referuan kampit si mundësi e shkëlqyeshme për të njohur më mirë komunitetet e ndryshme që jetojnë në Kosovë, dhe për të zbuluar pasurinë e të qenit shoqëri e larmishme dhe gjithëpërfshirëse. “Falë kësaj mundësie, pata rastin të njihem me të rinj tjerë nga komunitete të ndryshme. Kemi shkëmbyer ide dhe pikëpamje dhe çka është më e rëndësishmja, e kemi ndarë këtë përvojë së bashku. Së bashku zbuluam vende të reja dhe u takuam me njerëz frymëzues. Tani mezi pres t'u them të gjithë miqve të mi se sa i mrekullueshëm ishte ky rrugëtim”, tha Doruntina Azemi, njëra nga pjesëmarrësit. Emre Ismaili, një tjetër pjesëmarrës, tha: “Ky kamp na ka bërë që t’i vlerësojmë nuancat e diversitetit”. Si rezultat i këtij aktiviteti, gjatë festivalit të filmit DokuFest i cili do të mbahet nga data 4 deri më 12 gusht 2023 në Prizren, do të organizohet ekspozitë me materiale audio dhe video nga intervistat e pjesëmarrësve me njëri-tjetrin. Këto intervista përqendrohen në këndvështrimet e tyre rreth dialogut ndërmjet dhe brenda komuniteteve, duke ilustruar rrugëtimin e tyre dhe “si e shohin ata njëri-tjetrin”. Misioni i OSBE-së në Kosovë ishte nga mbështetësit e parë të DokuFestit që nga viti 2002, i cili përveç vetë festivalit punon edhe me të rinjtë në kinematografi për të zhvilluar produksionet e tyre personale kreative mbi dialogun dhe tregimet për të drejtat e njeriut.
Misioni i OSBE-së dhe Agjencia për Informim dhe Privatësi diskutojnë me zyrtarët komunalë në Kosovë rreth balancimit të së drejtës për privatësi me të drejtën për qasje në dokumente publike
Publishing date: 25 prill 2023
Content type: News
Where we are: Misioni i OSBE-së në Kosovë
Misioni i OSBE-së në Kosovë dhe Agjencia për Informim dhe Privatësi (AIP) përmbyllën serinë e pesë punëtorive rajonale mbajtur për më shumë se 100 zyrtarë komunalë nga komunat anembanë Kosovës me temë balancimi i së drejtës për privatësi dhe qasja në dokumente publike. Diskutimet u fokusuan në sfidat që kanë të bëjnë me të dhënat personale të përfshira në dokumentet komunale, të cilat rrezikojnë të zbulohen në procesin e sigurimit të qasjes në të dhënat zyrtare. Pjesëmarrësit prezantuan raste konkrete që dalin nga situata të tilla si publikimi i listave të subvencioneve mjekësore komunale dhe qasja në të dhënat e mbledhura përmes kamerave të vëzhgimit të hapësirave publike. Paneli, i përbërë nga ekspertë të AIP-së, trajtoi pyetjet, duke u ofruar zyrtarëve komunalë përgjigje se si të merren me balancimin e të drejtës për privatësi dhe drejtës për qasjes në informacione publike. Kryetarja e AIP-së, Komisionerja Krenare Sogojeva-Dermaku, tha: “Ekziston një vijë e hollë ndërmjet të drejtës për privatësi dhe qasjes në dokumente publike, e cila nuk është gjithmonë lehtësisht e dallueshme. Prandaj, balancimi i këtyre dy të drejtave është i një rëndësie jetike në vendosjen e standardeve të qarta dhe të sakta, bazuar në praktikat më të mira të zbatimit të këtyre të drejtave.” Komisionerja Sogojeva-Dermaku ftoi pjesëmarrësit që të promovojnë publikimin proaktiv të informatave zyrtare në ueb-faqet e tyre dhe caktimin e zyrtarëve komunalë për mbrojtjen e të dhënave personale, të cilët ende mungojnë në një numër komunash. Për të përsosur kuptimin e kësaj detyre të ndjeshme, z. Ali Topalli, zyrtar komunal përgjegjës për qasje në të dhënat zyrtare në komunën e Fushë Kosovës sugjeroi që AIP të shpjegojë balancimin e të drejtës për privatësi dhe qasjen në dokumente publike edhe për palën tjetër në këtë proces, kërkuesin e informacionit: publikun e gjerë, organizatat e shoqërisë civile dhe mediat. “Kjo do t'i ndihmojë ata të kuptojnë të gjithë procesin dhe të përmbahen nga parashtrimi i ankesave në situatat kur iu mohohet qasja në informacione zyrtare për të mbrojtur të dhënat personale të një individi,” tha ai. Duke përdorur të dhënat e mbledhura nga këto punëtori, Misioni i OSBE-së, në bashkëpunim me AIP-në, do të hartojë ‘Pyetjet e Bëra Shpesh’ (në gjuhën angleze "FAQ") për balancimin e privatësisë dhe qasjes në dokumente publike, të cilat do t'u shërbejnë zyrtarëve komunalë si një mjet udhëzues në situatat që lindin nga raporti konfliktual midis të drejtës për privatësi dhe qasjes në të dhëna. Misioni i OSBE-së në Kosovë ka mandat mbrojtjen dhe promovimin e të drejtave të njeriut dhe të komuniteteve, si dhe demokratizimin dhe zhvillimin e sektorit të sigurisë publike. Misioni mbështet AIP-në në promovimin e të drejtës për privatësi dhe qasje në dokumentet publike dhe rritjen e kapaciteteve profesionale të zyrtarëve publikë, duke garantuar në këtë mënyrë transparencë më të madhe ndaj publikut dhe duke siguruar njëkohësisht që të drejtat e tyre të privatësisë të mos shkelen në këtë proces.
Misioni i OSBE-së në Kosovë mbështetë themelimin e Mekanizmit Koordinues kundër Dunës në Familje në komunën e Novobërdës
Publishing date: 16 mars 2023
Content type: News
Where we are: Misioni i OSBE-së në Kosovë
Shefi i Misionit të OSBE-së në Kosovë, Ambasadori Michael Davenport, mori pjesë në ceremoninë e organizuar me rastin e nënshkrimit të Memorandumit të Mirëkuptimit për themelimin e Mekanizmit Koordinues kundër Dhunës në Familje (MKDHF) në Komunën e Novobërdës. Ambasadori Davenport theksoi se krijimi i mekanizmit koordinues komunal paraqet një hap të madh para dhe dëshmon përkushtimin e Komunës së Novobërdës për reagim të përbashkët institucional më efektiv në luftimin e dhunës në familje. “Funksionimi efektiv i Mekanizmit Koordinues mund të ndihmojë në ofrimin e mbështetjes dhe shërbimeve të nevojshme për viktimat e dhunës në familje, ofrimin e sigurisë dhe përmirësimin e efikasitetit të shërbimeve me bazë në komunitet për të parandaluar dhunën në familje para se te shfaqet," tha ai. Nazlie Bala, këshilltare e ministres së Drejtësisë, tha se e tërë puna, angazhimi dhe përkushtimi nuk do të kishte qenë i mundur pa ndihmën dhe mbështetjen e organizatave ndërkombëtare. “Dëshiroj të veçoj Misionin e OSBE-së në Kosovë, sepse e di se çfarë ka bërë Misioni në fushën e të drejtave të njeriut, veçanërisht në fushën e dhunës në familje. Misioni ka ndihmuar drejtpërsëdrejti si hartues i strategjive dhe planeve të shumta të veprimit për trajtimit e dhunës në familje”, tha ajo. Palë nënshkruese të Memorandumit të Mirëkuptimit janë përfaqësues të gjykatës dhe prokurorisë, Policisë së Kosovës, drejtorive përkatëse komunale, Zyrës për Mbrojtje dhe Ndihmë Viktimave, Qendrës për Punë Sociale, strehimores lokale për viktimat e dhunës në familje dhe organizatave të shoqërisë civile. Ky është mekanizmi i 19-të koordinues komunal kundër dhunës në familje i krijuar me mbështetjen e Misionit të OSBE-së në Kosovë. Këta mekanizma synojnë të forcojnë bashkërendimin, shkëmbimin e informatave dhe angazhimin e gjithë akterëve përkatës në nivel lokal, dhe marrin hapa konkretë për të përmirësuar parandalimin e dhunës në familje dhe për të forcuar mbrojtjen, trajtimin dhe riintegrimin e viktimave.