Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Prezenca e OSBE-së dhe Drejtoria e Ndihmës Juridike Falas nënshkruajnë memorandum mirëkuptimi për të rritur aksesin në drejtësi për të gjithë
Publishing date: 22 shkurt 2024
Content type: News
Where we are: Prezenca e OSBE-së në Shqipëri
What we do: Të drejtat e njeriut, Sundimi i ligjit
Kryetarja në Detyrë e Prezencës së OSBE-së në Shqipëri, Clarisse Pasztory dhe Drejtori i Ndihmës Juridike Falas, Ergys Qirici, nënshkruan një memorandum mirëkuptimi, më 22 shkurt 2024, me qëllim përcaktimin e fushave me interes të ndërsjellë dhe forcimin e bashkëpunimit mes dy institucioneve. Misioni i Drejtorisë së Ndihmës Juridike Falas është të garantojë akses të barabartë në drejtësi për të gjithë njerëzit. Memorandumi është shprehje e mbështetjes së plotë të Prezencës për punën shumë të rëndësishme të kësaj agjencie të themeluar në vitin 2020. Siç parashikohet në dokument, Prezenca do të ndihmojë në rritjen e kapaciteteve të Drejtorisë përmes trajnimeve për komunikimin me personat vulnerabël për organizatat e shoqërisë civile të licencuara për të ofruar ndihmë juridike falas, dhe do të mbështesë Drejtorinë të zhvillojë materiale për personat me shikim të dëmtuar dhe shtetasit e huaj. Gjithashtu, Prezenca do të mbështesë ngritjen e plotë të një klinike ligjore universitare në Universitetin e Elbasanit. Të dyja nismat synojnë rritjen e aksesit të publikut në drejtësi. Gjatë nënshkrimit, Prezenca e OSBE-së i dha Drejtorisë një manual të porositur nga Prezenca, i cili përmban metoda dhe teknika që do të zbatohen nga ofruesit e ndihmës juridike falas gjatë pritjes dhe komunikimit me grupeve e cenueshme. Në vitin 2022, Prezenca hartoi një udhëzues për komunikimin dhe pritjen e qytetarëve nga grupe të tilla, duke përfshirë të miturit, viktimat e dhunës në familje, pakicat (veçanërisht ato rome dhe egjiptiane) dhe personat me aftësi të kufizuara. Udhëzuesi shërbeu si material bazë për një trajnim për rreth 30 punonjës të Ndihmës Juridike Falas nga e gjithë Shqipëria, që Prezenca organizoi në nëntor 2023. Memorandumi u nënshkrua në kuadër të Javës për Mbrojtjen e Viktimave të Krimit, të organizuar nga Ministria e Drejtësisë e Shqipërisë nga 15 deri më 22 shkurt 2024.
Diplomohen studentët e parë të Programit Master në Kriminologji, të mbështetur nga Prezenca e OSBE-së në Shqipëri
Publishing date: 27 shtator 2023
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Sundimi i ligjit
Një ceremoni për të diplomuar 30 studentët e parë që përfunduan programin Master në Kriminologji dhe për të falënderuar të gjithë ata që bënë të mundur këtë program u zhvillua në Fakultetin e Drejtësisë të Universitetit të Tiranës, më 27 shtator 2023. Programi Master – i themeluar në dhjetor 2020 me nismën dhe mbështetjen e Prezencës së OSBE-së – ka për qëllim të përmirësojë kapacitetet kërkuese të profesionistëve të drejtësisë penale, akademikëve dhe hartuesve të politikave në parandalimin dhe luftën kundër kriminalitetit në Shqipëri, në përputhje me standardet e të drejtave të njeriut dhe me angazhimet e OSBE-së. Ai është Masteri i parë Ekzekutiv në Shqipëri i përfshirë në ciklin e tretë të studimeve, që e bën atë të barabartë me një doktoraturë. “Sot, ne po korrim rezultatet e përpjekjeve tona, pas më shumë se pesë vitesh pune intensive. Masteri në Kriminologji ka dëshmuar tashmë potencialin e tij për të sjellë risi për vendin: duke u larguar nga një qasje klasike ndaj kriminalitetit, mbështetur te hetimi dhe ndëshkimi, dhe duke e zhvendosur fokusin te një qasje më gjithëpërfshirëse, restauruese dhe empirike”, tha ambasadori Bruce Berton, Kryetar i Prezencës së OSBE-së. Rektori i Universitetit të Tiranës, Prof. Dr. Artan Hoxha, tha: “Masteri ekzekutiv ka bërë të mundur zhvillimin e kërkimit shkencor në fushën e kriminologjisë dhe kjo do të ndikojë në rritjen e kapaciteteve të stafit akademik dhe të studentëve. Në zbatim të projektit të Prezencës së OSBE-së për krijimin e programit master, është përmirësuar infrastruktura akademike duke zhvilluar më tej përfshirjen e studentëve në kërkim shkencor”. Prej vitit 2019, Prezenca e OSBE-së dhe Fakulteti i Drejtësisë kanë punuar intensivisht për të zhvilluar strukturën dhe kurrikulën e programit, dhe për të ndërtuar kapacitetet dhe burimet e Universitetit të Tiranës për të ofruar dhe menaxhuar atë. Nëntëdhjetë studentët e regjistruar që prej fillimit në këtë program vijnë nga profesione të ndryshme. Ata janë kryesisht oficerë të policisë gjyqësore, avokatë mbrojtës, pedagogë të Akademisë së Sigurisë, punonjës të administratës së Kuvendit, aktivistë të shoqërisë civile dhe ekspertë të drejtësisë penale. Programi Master ofron një kurrikulë të integruar dhe gjithëpërfshirëse, e cila është e dobishme për ndjekjen e karrierave të ndryshme në sistemin e drejtësisë. Veprimtaria u organizua si pjesë e projektit me fonde jashtëbuxhetore të Prezencës së OSBE-së “Për ngritjen e programit master në kriminologji”, i cili financohet nga Zyra për Çështjet Ndërkombëtare të Narkotikëve dhe Zbatimin e Ligjit, në Departamentin Amerikan të Shtetit, nga Misioni i SHBA-së në OSBE, nga ambasada britanike në Tiranë dhe nga qeveria e Italisë. Prezenca e OSBE-së e zbaton projektin në bashkëpunim me Fakultetin e Drejtësisë të Universitetit të Tiranës, me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme.
Shqipëria miraton një Mekanizëm të ri Kombëtar Referues për Viktimat dhe Viktimat e Mundshme të Trafikimit, hartuar me mbështetjen e Prezencës së OSBE-së
Publishing date: 29 qershor 2023
Content type: News
Më 26 qershor, institucionet shtetërore shqiptare dhe organizatat e shoqërisë civile (OSHC) nënshkruan një Marrëveshje të re Bashkëpunimi për Mekanizmin Kombëtar Referues për Viktimat dhe Viktimat e Mundshme të Trafikimit (MKR), hartuar falë asistencës teknike të Prezencës së OSBE-së në vitet 2022-2023. Marrëveshja e re, që synon të trajtojë llojet ekzistuese dhe të reja të trafikimit të qenieve njerëzore, përfshin të gjitha institucionet përkatëse për të garantuar mbrojtjen e duhur për viktimat dhe viktimat e mundshme të trafikimit në Shqipëri. Ajo është fryti i një analize të plotë të vlerësimit të nevojave dhe i konsultimeve me palët e interesuara shtetërore dhe të shoqërisë civile, të kryera nga Prezenca dhe Ministria e Brendshme, me qëllim përditësimin e kuadrit të MKR-së në përputhje me sfidat shqiptare të trafikimit të qenieve njerëzore, kuadrin ligjor dhe me angazhimet e OSBE-së. Në fjalën e mbajtur në këtë aktivitet, Kreu i Prezencës së OSBE-së në Shqipëri, Ambasadori Bruce Berton theksoi faktin se, “Për herë të parë në Shqipëri, Marrëveshja e MKR-së përfshin bordin këshillimor të viktimave të trafikimit nëpërmjet strehëzave për viktimat e trafikimit, e bën atë edhe më të dallueshëm dhe në përputhje me qasjen e OSBE-së për të pasur viktimat në qendër të luftës kundër trafikimit të qenieve njerëzore”. Pesëmbëdhjetë përfaqësues të institucioneve shtetërore dhe OSHC-ve e nënshkruan Marrëveshjen e re të Bashkëpunimit për MKR-në. Vlen të theksohet se numri i nënshkruesve është zgjeruar në krahasim me marrëveshjen e mëparshme, duke përfshirë institucione të tilla shtetërore si Agjencia Shtetërore për të Drejtat dhe Mbrojtjen e Fëmijës, Inspektorati Shtetëror i Punës, Ndihma Juridike Falas, Agjencia Shtetërore e Pasurive të Sekuestruara dhe Konfiskuara dhe Shërbimi Shtetëror i Punësimit, si dhe OSHC që ofrojnë ndihmë të menjëhershme dhe afatgjatë për viktimat e trafikimit, duke zgjeruar kështu gamën e shërbimeve në dispozicion për të rriturit dhe fëmijët viktima të trafikimit. Prezenca e OSBE-së në Shqipëri do të vijojë t’i ofrojë mbështetje teknike institucioneve shtetërore në luftën kundër trafikimit të qenieve njerëzore, veçanërisht për zbatimin e Marrëveshjes së Bashkëpunimit për MKR-në nëpërmjet ofrimit të udhëzimeve dhe trajnimeve specifike.
Prezenca e OSBE-së dhe Drejtoria e Përgjithshme e Burgjeve forcojnë kapacitetet e zyrtarëve shqiptarë për regjimin e posaçëm në burgjet e sigurisë së lartë
Publishing date: 16 qershor 2023
Content type: News
Where we are: Prezenca e OSBE-së në Shqipëri
Nga 12 deri më 16 qershor 2023, Prezenca e OSBE-së në Shqipëri, në bashkëpunim me Drejtorinë e Përgjithshme të Burgjeve, organizoi një trajnim për 25 punonjës të regjimit të posaçëm në burgjet e sigurisë së lartë, të Shërbimit të Kontrollit të Brendshëm të Burgjeve dhe të Drejtorisë së Përgjithshme të Burgjeve. Regjimi i posaçëm – i cili filloi të zbatohet në Shqipëri më 2020, mbështetur në modelin italian 41-bis – vendos një sërë kufizimesh mbi të burgosurit, të cilat, nëse zbatohen në mënyrë të papërshtatshme, mund të çojnë në shkelje të të drejtave të njeriut. Trajnimi i njohu pjesëmarrësit me konceptet, mjetet dhe aftësitë për të trajtuar të dënuarit me rrezikshmëri të lartë në regjimin e posaçëm. Ai u përqendrua te specializimi i stafit të burgjeve si në aspektin e sigurisë, ashtu edhe në trajtimin e të të dënuarve me rrezikshmëri të lartë në përputhje me standardet ndërkombëtare të të drejtave të njeriut. “Ky trajnim shumë i vlefshëm ka si qëllimi që regjimi i posaçëm të jetë funksional në parandalimin efektiv të rrjeteve të krimit të organizuar brenda sistemit të burgjeve dhe të minimizojë mundësinë e orkestrimit të aktiviteteve kriminale nga prapa hekurave. Ai është pjesë e përpjekjeve të Ministrisë së Drejtësisë dhe Drejtorisë së Përgjithshme të Burgjeve për të luftuar krimin e organizuar dhe për të ruajtur sigurinë publike. Një falënderim i veçantë shkon për Prezencën e OSBE-së, si një ndër mbështetësit kryesorë të përpjekjeve për reformimin e sistemit të burgjeve”, tha Drejtori i Përgjithshëm i Burgjeve, Admir Abrija. Në hapje të trajnimit folën dhe Drejtori i Policisë së Burgjeve, Drejtues i Lartë Paulin Rajta dhe drejtuesi i Departamentit të Ligjit dhe të të Drejtave të Njeriut në Prezencën e OSBE-së, Cailean Maclean. Gjeneral Brigade Mauro D’Amico – ish-Drejtor i Grupit Operativ të Lëvizshëm të Policisë italiane të Burgjeve, me përvojë të gjerë në regjimin 41-bis – dha kontributin e tij të çmuar në trajnim. Paralelisht, më 15 qershor, Prezenca dhe Drejtoria e Përgjithshme e Burgjeve organizuan edhe një tryezë konsultative për regjimin e posaçëm dhe sfidat e tij, ku morën pjesë rreth 30 gjyqtarë, prokurorë dhe personel drejtues i Strukturës së Posaçme kundër Korrupsionit dhe Krimit të Organizuar (SPAK), përfaqësues nga Prokuroria e Përgjithshme, Shërbimi Informativ i Shtetit, Policia e Shtetit, Drejtoria e Përgjithshme e Burgjeve e të tjerë. Më herët gjatë këtij muaji, Prezenca përfundoi hartimin e një kurrikule trajnimi për stafin e regjimit të posaçëm në burgje, i cili do të përfshihet në kurrikulën e formimit profesional të stafit të burgjeve nga ana e Drejtorisë së Përgjithshme të Burgjeve. Këto veprimtari janë vijimësi e mbështetjes së Prezencës për reformën e burgjeve në Shqipëri, përgjatë viteve dhe të përfshirjes aktive të saj në promovimin e të drejtave të njeriut të personave të dënuar dhe të paraburgosur. Së fundmi, në dhjetor 2022, Prezenca organizoi një vizitë studimore të zyrtarëve shqiptarë në mjediset e regjimit 41-bis në Itali. Përveç regjimit të posaçëm, Prezenca ka kontribuar në arritjet në sistemin penitenciar duke ofruar mbështetje legjislative për paketën ligjore për sistemin penitenciar; duke punuar për Parandalimin dhe Luftën kundër Ekstremizmit të Dhunshëm dhe Radikalizmit që çojnë në Terrorizëm në burgje dhe në shërbimin e provës; si edhe duke krijuar programin Master në Kriminologji në Universitetin e Tiranës. Prezenca e OSBE-së do të vijojë të mbështesë reformën në sistemin penitenciar në Shqipëri.
Prezenca e OSBE-së në Shqipëri organizon vizitë kërkimore në universitetet e Oksfordit dhe të Kembrixhit
Publishing date: 5 qershor 2023
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Sundimi i ligjit
Nga 30 maji deri më 2 qershor 2023, Prezenca e OSBE-së në Shqipëri, së bashku me Universitetin e Tiranës dhe Fakultetin e Drejtësisë, organizoi një vizitë kërkimore në dy universitete të shquara në Mbretërinë e Bashkuar e në mbarë botën: në Universitetin e Oksfordit dhe në Universitetin e Kembrixhit. Vizita kishte si qëllim rritjen e kapaciteteve dhe të burimeve të Fakultetit të Drejtësisë në ofrimin dhe menaxhimin e programit të kriminologjisë, si edhe njohjen me praktikat më të mira për ngritjen dhe punën e qendrave kërkimore universitare. Delegacioni nga Shqipëria përbëhej nga Rektori i Universitetit të Tiranës, Prof. Dr. Artan Hoxha, Dekania e Fakultetit të Drejtësisë, Prof. Asoc. Dr. Dorina Hoxha, pedagogë të Fakultetit të Drejtësisë dhe Fakultetit të Shkencave Sociale dhe ekipi i projektit të OSBE-së “Ngritja e një Programi Master në Kriminologji”. Ata u takuan me profesorë dhe drejtues të dy universiteteve, mes të cilëve me Kryetarin e Departamentit të Sociologjisë në Universitetin e Oksfordit, Prof. Federico Varese, Drejtorin e Qendrës së Kriminologjisë të Oksfordit, Prof. Ian Loader dhe Drejtorin e Institutit të Kriminologjisë në Universitetin e Kembrixhit, Prof. Manuel Eisner. Ky shkëmbim do të kontribuojë edhe në ngritjen e Qendrës Kërkimore të Kriminologjisë, në Fakultetin e Drejtësisë në Tiranë, e cila do të mundësojë kapacitetet e qëndrueshme kërkimore në fushën e kriminologjisë, do të ofrojë mbështetje të vijueshme për Programin Master në Kriminologji dhe do të kontribuojë në hartimin e politikave bazuar te të dhënat. “Qendra Kërkimore e Kriminologjisë do të rrisë kërkimin shkencor dhe bashkëpunimin me të gjitha organet ligjzbatuese. Mbështetja e Institutit të Kriminologjisë të Universitetit të Kembrixhit do të na orientojë jo vetëm në metoda të reja të kërkimit shkencor, por edhe do të krijojë një bazë për zhvillimin e projekteve të përbashkëta në fusha të caktuara të kriminalitetit”, tha Dekania Hoxha. “Përfshirja e studentëve më të mirë pranë kësaj qendre është prioritet për të nxitur kërkuesit e rinj në fushën e kriminologjisë”, shtoi ajo. Drejtuesja e Projektit të OSBE-së, Alba Jorganxhi, tha: “Universitetet e Oksfordit dhe Kembrixhit njihen në tërë botën për cilësinë e shkëlqyer në kërkim dhe mësimdhënie. Bashkëpunimi që krijuam do të ndihmojë në mbështetjen e një qasjeje shumëdisiplinore në parandalimin e krimit në Shqipëri, veçanërisht duke zhvilluar lidhjet mes drejtësisë penale dhe asaj sociale. Jemi shumë të kënaqur që mundësojmë këtë shkëmbim dhe jemi gati të mbështesim çdo bashkëpunim të ardhshëm mes universiteteve”. Prezenca e OSBE-së e organizoi vizitën si pjesë e projektit të saj jashtëbuxhetor “Ngritja e një Programi Master në Kriminologji”, i cili mbështetet financiarisht nga Byroja e Shteteve të Bashkuara për Çështje Ndërkombëtare të Narkotikëve dhe Zbatimit të Ligjit dhe zbatohet në bashkëpunim të ngushtë me Fakultetin e Drejtësisë të Universitetit të Tiranës dhe me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme. Programi Master, i nisur në dhjetor 2020, ofron një kurrikulum gjithëpërfshirës e të integruar, që mundëson karrierën në fusha të ndryshme të sistemit të drejtësisë. Përmes programit master, Prezenca synon të përmirësojë kapacitetet kërkuese të profesionistëve, akademikëve dhe politikëbërësve në Shqipëri në identifikimin e shkaqeve rrënjësore të krimit.
Prezenca e OSBE-së mundëson bashkëpunimin mes Universitetit të Tiranës dhe Universitetit “Demokriti” të Trakës
Publishing date: 5 prill 2023
Content type: News
Where we are: Prezenca e OSBE-së në Shqipëri
What we do: Të drejtat e njeriut, Arsimi, Sundimi i ligjit
Më 4 prill 2023, Universiteti i Tiranës dhe Universiteti “Demokriti” i Trakës nënshkruan një marrëveshje bashkëpunimi, të mundësuar nga Prezenca e OSBE-së, në mjediset e universitetit grek. Memorandumi i mirëkuptimit synon të rregullojë bashkëpunimin mes dy universiteteve për shkëmbimin e dijeve dhe teknologjisë, përmes programeve dhe kërkimit të aplikuar, veçanërisht në fushën e kriminologjisë. Po ashtu, ai parashikon shkëmbime të stafit akademik dhe teknik, shkëmbimin e studentëve, stazhe dhe specializime, organizimin e vizitave studimore, seminare, konferenca, botime dhe veprimtari të ndryshme shkencore. Rektori i Universitetit të Tiranës, Prof. Dr. Artan Hoxha, i cili nënshkroi marrëveshjen me homologun e tij grek Dr. Fotios Maris, tha: “Vlerësojmë që, së bashku me Prezencën e OSBE-së, si mbështetëse e disa nismave të ndërmarra së fundmi, ky bashkëpunim do të ndikojë më tej në përmirësimin e veprimtarive akademike, në mbështetje të studentëve dhe të personelit të Fakultetit të Drejtësisë të Universitetit të Tiranës. Ky fakultet luan një rol të veçantë, ndër të tjera, në drejtim të ecurisë të reformës në drejtësi dhe në zhvillimin e strategjive dhe veprimtarive në luftën kundër krimit në përgjithësi, krimit të organizuar dhe korrupsionit në veçanti, që ndikohen edhe nga rritja e kapaciteteve nëpërmjet bashkëpunimit ndërkombëtar”. Veprimtaria u organizua si pjesë e projektit “Për ngritjen e një programi master në kriminologji”, i cili mbështetet financiarisht nga Byroja e Shteteve të Bashkuara për Çështje Ndërkombëtare të Narkotikëve dhe Zbatimit të Ligjit. Prezenca e OSBE-së e zbaton këtë projekt në bashkëpunim të ngushtë me Fakultetin e Drejtësisë dhe me mbështetjen e Fakultetit të Shkencave Sociale, Ministrisë së Drejtësisë dhe Ministrisë së Brendshme. Menaxherja e projektit, Alba Jorganxhi, tha: “Prezenca mbështet bashkëpunimin mes Universitetit të Tiranës dhe Universitetit “Demokriti” të Trakës për të rritur kapacitetet kërkimore të profesionistëve shqiptarë të drejtësisë penale, akademikëve dhe politikëbërësve në parandalimin dhe luftën kundër krimit. Bashkëpunimi rajonal në fushën akademike dhe atë të kriminologjisë mundëson arritjen e standardeve më të mira ndërkombëtare të shtetit të së drejtës dhe të të drejtave të njeriut”. Në veprimtari morën pjesë edhe dy zëvendësrektorët e Universitetit “Demokriti” të Trakës, dekanët e fakulteteve të drejtësisë të të dyja universiteteve, si dhe anëtarë të tjerë të stafit akademik. Ajo u pasua nga takime të përbashkëta me profesorë e studentë të Universitetit “Demokriti”. Programi Master në Kriminologji – i krijuar në dhjetor 2020 me nismën dhe mbështetjen e Prezencës së OSBE-së – u mundëson studentëve të eksplorojnë ndërlidhjet mes krimit, drejtësisë dhe shoqërisë, në kontekst krahasues, si edhe promovimin e drejtësisë restauruese për viktimat dhe përgjigjet me në qendër viktimat. Kurrikulumi i tij gjithëpërfshirës dhe i integruar mundëson karrierën në fusha të ndryshme të sistemit të drejtësisë. Përmes programit master, Prezenca synon të përmirësojë kapacitetet kërkuese të profesionistëve, akademikëve dhe politikëbërësve në Shqipëri në identifikimin e shkaqeve rrënjësore të krimit.
Prezenca e OSBE-së organizon vizitë studimore për zyrtarët shqiptarë në sistemin 41-bis të Italisë
Publishing date: 13 dhjetor 2022
Content type: News
Where we are: Prezenca e OSBE-së në Shqipëri
Nga 5 deri më 9 dhjetor 2022, Prezenca e OSBE-së në Shqipëri organizoi një vizitë studimore për zyrtarë shqiptarë në Regjimin e Posaçëm 41-bis në Itali. Vizita ishte e para e këtij lloji, që pason zbatimin e Regjimit të Posaçëm në Shqipëri në vitin 2020, bazuar në modelin italian 41-bis. Regjimi i Posaçëm vendos një sërë kufizimesh mbi të burgosurit, ndaj, nëse aplikohet në mënyrë të papërshtatshme, mund të çojë në shkelje të të drejtave të njeriut. Delegacioni me 12 anëtarë kryesohej nga Drejtori i Policisë së Burgjeve Paulin Rajta dhe përbëhej nga Drejtori i Shërbimit të Kontrollit të Brendshëm në sistemin e burgjeve në Ministrinë e Drejtësisë Klevis Qose; deputeti Denis Deliu, anëtar i Komisionit të Sigurisë dhe i Komisionit të Ligjeve, Administratës Publike dhe të Drejtave të Njeriut; Komisioneri për Mekanizmin Kombëtar për Parandalimin e Torturës pranë Avokatit të Popullit Ahmet Prençi; Këshilltarja Ligjore / Drejtuesja e Projektit nga Prezenca e OSBE-së Alba Jorganxhi, dhe zyrtarë të lartë të burgjeve. Delegacioni shqiptar u prit nga gjyqtari Carlo Renoldi, Shef i Departamentit të Administratës së Burgjeve dhe nga Gjeneral Brigade z. Mauro D’Amico, Drejtor i Grupit Operativ të Lëvizshëm (Gruppo Operativo Mobile, GOM) në Ministrinë e Drejtësisë italiane, të cilët bashkorganizuan dhe bashkërenduan vizitën studimore. Pjesëmarrësit u pajisën me njohuri për standardet më të mira vendase dhe ndërkombëtare mbi menaxhimin në përputhje me të drejtat e njeriut për të burgosurit me rrezikshmëri të lartë. Ata përfituan edhe nga përvoja dhe praktikat e Policisë Italiane të Burgjeve në burgjet e vizituara. Programi përfshinte një vizitë në mjediset e seksionit 41-bis në Sassari dhe L'Aquila dhe një vizitë në Shkollën e Trajnimit të Burgjeve “Giovanni Falcone” në Romë, ku pjesëmarrësit u njohën me kurrikulën e trajnimit për personelin e burgjeve italiane. Vizita studimore ishte pjesë e projektit të Prezencës “Për forcimin e mbrojtjes së të drejtave të njeriut në Shqipëri” dhe projektit me fonde jashtëbuxhetore “Përgjigjet ndaj terrorizmit në sistemin e drejtësisë penale në Shqipëri në përputhje me shtetin e së drejtës” të financuar nga qeveria e Austrisë dhe ajo e Norvegjisë. Vizita studimore bazohet në mbështetjen e Prezencës për reformën e burgjeve në Shqipëri dhe përfshirjen e saj aktive në promovimin e të drejtave të personave të dënuar dhe të paraburgosur. Në fillim të këtij viti, Prezenca hartoi dhe mbajti një modul trajnimi për personelin e burgjeve të regjimit të posaçëm. Në vitin 2021, ajo organizoi një seancë trajnimi të stafit të burgjeve të Regjimit të Posaçëm mbi menaxhimin në përputhje me të drejtat e njeriut të të burgosurve me rrezikshmëri të lartë. Ndërsa në vitin 2020, Prezenca përgatiti një raport vlerësimi të regjimit të posaçëm për të burgosurit e sigurisë së lartë në Shqipëri, në përputhje me praktikat e mira ndërkombëtare dhe në funksion të nevojave specifike të të dënuarve. Përveç regjimit të posaçëm, Prezenca ka kontribuar në arritjet në sistemin penitenciar, duke ofruar mbështetje legjislative për paketën ligjore për sistemin penitenciar; duke punuar për Parandalimin dhe Luftën ndaj Ekstremizmit të Dhunshëm dhe Radikalizmit që çon në Terrorizëm (P/CVERLT) në burgje dhe në shërbimin e provës; si edhe duke krijuar programin Master në Kriminologji në Universitetin e Tiranës.