News and press releases

Më 10 dhe 11 maj 2022, në bashkëpunim me Zyrën për Institucione Demokratike dhe të Drejtat e Njeriut (ODIHR), Misioni i OSBE-së në Kosovë ka mbajtur një punëtori dyditore me temë qeverisjen e përgjegjshme gjinore dhe rolin e grave në proceset e vendimmarrjes në nivel komunal. Punëtoria mblodhi gra të zgjedhura si dhe të emëruara rishtas në pozita të pushtetit lokal, dhe u fokusua në atë se si gratë në pozita vendimmarrëse mund ta përdorin autoritetin e tyre për ta avancuar barazinë gjinore në komunitetet e tyre. Gjatë punëtorisë u prezantuan mjete konkrete dhe modele të praktikave më të mira për kontekstualizim të mëtejmë të diskutimit, si ilustrime të mënyrave në të cilat buxhetimi i përgjegjshëm gjinor mund të përdoret për të ndërtuar praktika të qeverisjes komunale më gjithëpërfshirëse dhe më të ndjeshme ndaj çështjeve gjinore. Në fjalën e tij, zëvendësshefi i Misionit të OSBE-së Kilian Wahl tha se ka dëshmi të qarta se qeverisja e përgjegjshme gjinore është më efektive dhe se shpie përfundimisht në vendime më të mira dhe komuna më të suksesshme. Z. Wahl u zotua se Misioni i OSBE-së në Kosovë do të vazhdojë së mbështeturi zyrtaret dhe zyrtarët e komunave në avancimin e mëtejmë të shkathtësive dhe kapaciteteve të tyre në këtë fushë. “Gjatë punëtorisë na u konfirmua se përdorimi i mjeteve dhe mekanizmave të barazisë gjinore është thelbësor për të pasur qeverisje më efektive dhe më të përgjegjshme ndaj çështjeve gjinore, si për shembull përmes hartimit dhe zbatimit të planeve komunale të veprimit gjinor dhe buxhetimit gjinor” tha Marqe Selmanaj, nënkryetare e Komunës së Klinës. Diskutimet nxorën në pah sfidat me të cilat përballen gratë në punën e tyre të përditshme, si mungesa e besimit të eprorëve për t’iu dhënë grave vendimmarrëse përgjegjësi domethënëse apo mundësi për zhvillim të mëtejmë dhe mungesa e solidaritetit ndërmjet grave, me ç’ rast pjesëmarrëset vunë në dukje se uniteti më i madh ndërmjet zyrtareve nëpër komuna mund të çojë në ndryshime pozitive. “Përfshirja e zërave të grave në politika dhe planifikim kontribuon në ndërtimin e qëndrueshëm të komuniteteve lokale dhe u mundëson që të gjithëve të zhvillohen në mënyrë të barabartë, ngaqë politikat e ndjeshme ndaj çështjeve gjinore janë në dobi si të grave ashtu edhe burrave duke krijuar një potencial transformues ku perceptimet, praktikat dhe vlerat zhvillohen për t'i shërbyer mirëqenies së komuniteteve lokale,” tha Dr. Yulia Netesova, shefe e Njësisë për Qeverisje Demokratike dhe Gjinore në kuadër të ODIHR.

Misioni i OSBE-së në Kosovë ka përmbyllur serinë prej 23 punëtorish për anëtarët e kuvendeve të komunave të zgjedhur për herë të parë në zgjedhjet lokale të tetorit 2021.Trajnimet u përqendruan në rolin e anëtarëve të kuvendeve në përfaqësimin e interesave të elektorateve të tyre përkatëse dhe avancimin e funksionimit të kuvendeve të komunës pjesë e së cilave janë.

Në Strugë të Maqedonisë Veriore, më 21 prill, u përmbyll seminari katërditor me Komisionin Qendror të Zgjedhjeve (KQZ) mbi rishikimin e rregullave zgjedhore. Qëllimi i seminarit ishte rishikimi dhe harmonizimi i këtyre rregullave sipas ligjit aktual për zgjedhjet e përgjithshme dhe ligjet e tjera të lidhura në Kosovë, në përputhje me rekomandimet e organizatave ndërkombëtare të vëzhgimit të zgjedhjeve dhe Misionit të OSBE-së, bazuar në mësimet e nxjerra nga proceset e mëparshme zgjedhore. Gjatë këtij seminari, KQZ-ja, me mbështetje të Ekipit Zgjedhor të Misionit të OSBE-së, identifikoi çështjet që kërkojnë ndryshime ligjore dhe përgatiti një sërë rekomandimesh për referencë të Komisionit të përkohshëm Kuvendit të Kosovës për përmirësimin dhe fuqizimin e procesit zgjedhor dhe grupit të tij këshillues. KQZ-ja shqyrtoi rregullat më të rëndësishme në lidhje me regjistrimin dhe funksionimin e partive politike, certifikimin e subjekteve politike dhe kodin e tyre të mirësjelljes, vëzhguesit e zgjedhjeve, si dhe rregullat zgjedhore në lidhje me listën e votuesve dhe votimin jashtë Kosovës. Gjithashtu, u ndanë informata mbi standardet ndërkombëtare dhe praktikat e mira për zgjedhjet. “Procedurat e qarta zgjedhore ndihmojnë KQZ-në në organizim të duhur të zgjedhjeve, por edhe rrisin besimin publik në proceset e përgjithshme zgjedhore,” tha Nathania Tabone, Këshilltare e Lartë Ligjore për Zgjedhjet në Misionin e OSBE-së. Ndryshimet në rregullat zgjedhore për të cilat KQZ-ja ka rënë dakord gjatë seminarit do të finalizohen nga KQZ-ja në javët në vijim. Draft-rregulloret përfundimtare duhet t’i nënshtrohen një konsultimi publik me palët e tjera kyçe të interesit zgjedhor, siç janë organizatat e specializuara të shoqërisë civile për zgjedhjet dhe Paneli Zgjedhor për Ankesa dhe Parashtresa. Misioni i OSBE-së në Kosovë do të vazhdojë të ofrojë këshilla teknike dhe ekspertizë për KQZ-në, Panelin Zgjedhor për Ankesa dhe Parashtresa dhe Sekretariatet e tyre, në përputhje me standardet ndërkombëtare dhe rekomandimet e ofruara nga misionet ndërkombëtare të vëzhgimit të zgjedhjeve.

PRISHTINË, 6 tetor 2021 – Mekanizmat komunalë për mbrojtjen e komuniteteve kanë treguar avancim gradual drejt arritjes së potencialit të tyre të plotë, me progres gradual në përmbushjen e detyrave të tyre thelbësore. Ende vazhdojnë të ekzistojnë boshllëqe në kuadrin legjislativ dhe atë të politikave por, megjithatë, avancimi i këtyre mekanizmave ka dëshmuar se mekanizmat mund të kenë ndikim pozitiv te komunitetet në të gjithë Kosovën, thuhet në raportin e Misionit të OSBE-së në Kosovë të prezantuar sot.

PRISHTINË, 30 korrik 2021- Në konferencën e mbështetur nga Misioni i OSBE-së në Kosovë u konkludua që zhvillimi dhe miratimi i planeve të menaxhimit të trashëgimisë kulturore është instrument i rëndësishëm për rritjen e mbrojtjes dhe ruajtjes së monumenteve të trashëgimisë kulturore.

Misioni në Kosovë i OSBE-së dhe Zyra e Bashkimit Evropian në Kosovë organizuan një ngjarje onlajn në 21 korrik 2021 për lansimin e projektin rajonal tre-vjeçar të financuar nga BE të titulluar "Mbështetja e administrimit më efektiv të drejtësisë në rastet e korrupsionit dhe krimit të organizuar në Ballkanin Perëndimor përmes monitorimit gjyqësor”. Në ngjarje morën pjesë përfaqësues të organizatave të shoqërisë civile dhe gazetarë.

Kryetari Mytaher Haskuka dhe Shefi i Misionit të OSBE-së në Kosovë Ambasadori Jan Braathu lansuan sot në Prizren Platformën Digjitale për Pjesëmarrje të Publikut, platformë Online që lidh qytetarët me institucionet lokale...