News and press releases

Rreth 50 përfaqësues nga bashkitë, forcat e rendit, sistemi i drejtësisë, shërbimet sociale dhe shoqëria civile nga Kukësi dhe Dragashi u mblodhën në Kukës, më 16 korrik 2025, për të forcuar bashkëpunimin në adresimin e dhunës në familje dhe dhunës me bazë gjinore.

VJENË/HELSINKI, 9 maj 2025- E dërguara e posaçme e Kryesisë së OSBE-së, ambasadorja Terhi Hakala, përfundoi sot vizitën e saj zyrtare të Malit të Zi dhe Maqedonisë së Veriut. Vizita riafirmoi përkushtimin e OSBE-së për stabilitet, siguri dhe forcimin e institucioneve demokratike në Evropën Juglindore.

[embed:https://youtu.be/hUFRrXVgrY8] Me mbështetjen e Misionit të OSBE-së në Shkup, Kuvendi është duke bërë progres të prekshëm drejt barazisë midis grave dhe burrave, duke prezantuar politika të reja, forcuar mbikëqyrjen dhe avancuar reformat strukturore. Më 11 shkurt, Komisioni parlamentar për mundësi të barabarta për gratë dhe  burrat miratoi Planin Nacional të Veprimit për avancimin e barazisë midis grave dhe burrave për periudhën 2025-2027. [1]   “Ky hap shënon Planin e tretë të radhës me mbështetjen e Misionit të OSBE-së në Shkup dhe Zyrës së OSBE-së për Institucione Demokratike dhe të Drejtat e Njeriut (ODIHR), duke forcuar përkushtimin e Kuvendit në promovimin e barazisë midis grave dhe burrave,” tha ambasadori Kilian Wahl, shef i Misionit të OSBE-së në Shkup.  Marina Dimovska, Sekretare e Përgjithshme e Kuvendit, riafirmoi përkushtimin e institucionit për promovimin e mundësive të barabarta për të gjithë. “Kuvendi, si shtëpia që përfaqëson të gjithë qytetarët dhe institucioni demokratik më i rëndësishëm, mbetet fuqia kryesore për promovimin e barazisë midis grave dhe burrave.” Plani i ri i veprimit vendos qëllime ambicioze me synim të forcimit të barazisë midis grave dhe burrave në përfaqësimin politik, proceset legjislative dhe funksionet e mbikëqyrjes. Madje, këto përpjekje përqendrohen në forcimin e organizimit të brendshëm të Kuvendit, duke përfshirë themelimin e njësisë të dedikuar për barazinë midis grave dhe burrave, përmirësimet infrastrukturore për përkrahjen e politikave në sferën e familjes për stafin dhe deputetët, dhe rritjen e kapaciteteve për analizë gjinore. Objektivat kyçe përfshinë avancimin e standardeve etike për të parandaluar të gjithë format e dhunës, duke inkurajuar politikanët burra për të nxitur në mënyrë aktive barazinë, dhe rritjen e ndërgjegjësimit publik për çështjet që lidhen me gjininë. Që nga viti 2019, Misioni i OSBE-së në Shkup dhe ODIHR kanë mbështetur përpjekjet për ta bërë Kuvendin më gjithëpërfshirës, duke siguruar që perspektivat dhe prioritetet e grave dhe burrave reflektohen në punën e tij. Kuvendi ka paraqitur sesione trajnimi të specializuara për barazinë gjinore, doracak gjithëpërfshirës mbi praktikat më të mira [2], si dhe trajnim induksioni për deputetët e sapozgjedhur. Posti i Këshilltarit Gjinor, i themeluar në vitin 2023, siguron mbështetje të plotë dhe të vazhdueshme për politikat që reflektojnë nevojat e të gjithë qytetarëve. Këto ndryshime gjithëpërfshirëse janë duke formësuar një Kuvend më të drejtë dhe më përfaqësues.  Seanca plenare vjetore që shënon Ditën Ndërkombëtare të Gruas mbanë barazinë në agjendë, përderisa dispozitat me ndjeshmëri gjinore të Rregullave të Procedurës ndihmojnë në shndërrimin e angazhimeve në veprime. Shkëmbimet rajonale forcojnë më tej këto përpjekje, duke promovuar bashkëpunim përtej kufijve për të ndërtuar institucione më gjithëpërfshirëse. Misioni i OSBE-së në Shkup vazhdon të mbështesë institucionet e Maqedonisë së Veriut në përpjekjet e tyre të inkorporojnë praktika me ndjeshmëri gjinore në politikëbërjen, duke siguruar progres të afatgjatë drejt barazisë dhe gjithëpërfshirjes.   [1] https://www.sobranie.mk/ns-newsarticle-usvoen-akciskiot-plan-za-unapreduvane-na-ramnopravnosta-megu-zenite-i-mazite.nspx   [2] https://www.osce.org/mission-to-skopje/500983

24 nëntor: Evenimenti qendror i OSBE-së: “Dhuna ndaj grave të reja dhe vajzave: ngacmimi seksual, përndjekja dhe sjellja kontrolluese”   Koha dhe vendi: 12:00- 14:30, Laboratorium, Shkup Ky eveniment synon të identifikojë dhe trajtojë sfidat praktike për parandalimin dhe ndjekjen penale të dhunës ndaj grave të reja dhe vajzave, duke u përqendruar në shkallën e ulët të akuzave dhe ndjekjeve penale. Temat kyçe përfshinë rritjen e ndërgjegjësimit lidhur me ngacmimin seksual, përndjekjen dhe sjelljen kontrolluese si forma gjinore të dhunës, si dhe ndikimin afatgjatë të këtyre krimeve mbi mirëqenien dhe zhvillimin e grave të reja dhe vajzave. Do të projektohet një video e krijuar në bashkëpunim me Fakultetin e Arteve Dramatike të Universitetit të Shën Kirilit dhe Metodit në Shkup, pasuar nga një debat me palët e kyçura. Komponenti qendror i këtij evenimenti do të jetë firmosja e Deklaratës së Qëllimit, që do të shërbejë si angazhim publik për të luftuar dhunën ndaj grave të reja dhe vajzave. Deklarata përmban dhjetë pika të veprimit me masa konkrete që Misioni i OSBE-së do t’i mbështesë gjatë vitit 2025. Pjesëmarrësit e ftuar për të nënshkruar Deklaratën përfshinë Presidenten e Maqedonisë së Veriut, Ministren e Arsimit, përfaqësues të shkollave lokale, organizatave të të rinjve dhe OJQ-të që punojnë për t’i dhënë fund dhunës ndaj grave. Presidentja e Maqedonisë së Veriut dhe Ministrja e Arsimit do të mbajnë fjalët hyrëse. Për shkaqe shëndetësore, Shefi i Misionit të OSBE-së, Ambasadori Kilian Wahl, nuk do të marrë pjesë fizikisht, por do të drejtohet përmes një video mesazhi. Zëvendësshefja e Misionit të OSBE-së do të moderon seancën kryesore. 25 nëntor: Evenimenti që shënon fillimin e 16 Ditëve të Aktivizmit kundër DhBGj-së i organizuar nga KB-të (eveniment i mbështetur nga OSBE) Koha dhe vendi: 19:30-22:30, Muzeu i Qytetit të Shkupit: Lëshimi i disa platformave të ndryshme, me mbështetjen financiare të Misionit të OSBE-së, të cilat do të promovojnë unitet në trajtimin e dhunës ndaj grave dhe vajzave (DhNGV). Këto platforma përfshinë panele të hapura diskutimi me përfaqësuesit e organizatave partnere të KB-ve dhe donatorët bilateral, ministritë qeveritare, aktivistët rinor, OJQ-të dhe mediat. Evenimenti do të përfshijë projektimin e një dokumentari të shkurtër mbi DhBGj dhe një ekspozitë artistike, “Vragë të Qëndresës, Zëra të Shpresës” nga Martina Spasovska. Zëvendësshefja e Misionit të OSBE-së do të marrë pjesë në panel diskutimin. Seanca publike e Komisionit Parlamentar për Mundësi të Barabarta të Grave dhe Burrave mbi temën e dhunës ndaj grave dhe vajzave Koha dhe vendi: 10:00-12:00, Kuvendi, Shkup Me ftesë të Kryetares së Komisionit, Shefi i Misionit të OSBE-së do t’i drejtohet Komisionit përmes një video mesazhi, përderisa Zëvendësshefja e Misionit do të marrë pjesë në seancën. 27 nëntor: Punëtori për të diskutuar mbi një analizë ekspertësh të mbështetur nga Misioni i OSBE-së në Shkup mbi “format e reja të parandalimit të trafikimit me qenie njerëzore me fokus në grupet e cenuara, përfshirë rekomandimet dhe shqetësimet kryesore të grave.” Koha dhe vendi: 10:00-14:30, Hoteli Arka, Shkup (eveniment i mbyllur) Gratë dhe vajzat janë jo proporcionalisht të prekura nga trafikimi me qenie njerëzore për shkak se janë më të nënshtruara dhunës me bazë gjinore. Trafikantët e qenieve njerëzore shpesh shfrytëzojnë pabarazitë gjinore. Kjo punëtori do të eksplorojë strategjitë për parandalimin e trafikimit me qenie njerëzore, veçanërisht nga grupet e cenuara, përfshirë gratë. Seanca do ta pajisë Raportuesin Nacional kundër Trafikimit me mjete për monitorimin e veprimeve parandaluese dhe rreziqeve. Ekspertja Marija Todorovska do ta udhëheqë këtë punëtori. 28-29 nëntor: Trajnim për Juristët mbi të Drejtat e Viktimave në Rastet e Trafikimit me Qenie Njerëzore Koha dhe vendi: 10:00-16:00, Hoteli Arka, Shkup (eveniment i mbyllur) Ky trajnim synon avancimin e kapaciteteve të juristëve për të përfaqësuar viktimat e trafikimit me qenie njerëzore, me fokus të veçantë në gratë dhe vajzat e trafikuara për qëllime të eksploatimit seksual dhe punës së detyruar. Seanca do të trajtojë dallimet midis kontrabandës së emigrantëve dhe trafikimit, duke nënvizuar rrezikun me të cilin përballen gratë dhe vajzat e zhvendosura. Moderatoret: Maja Koneska (Prokurore Publike) dhe Olja Ristova (Gjyqtare). 3-4 dhjetor: Ndërtimi i kapaciteteve të punonjësve social për luftimin e trafikimit me qenie njerëzore dhe mbrojtën e të drejtave të viktimave Koha dhe vendi: 10:00-16:00, Hoteli Arka, Shkup (eveniment i mbyllur) Si pjesë e përpjekjeve aktuale për të forcuar reagimin e vendit në luftën për t’i dhënë fund trafikimit me qenie njerëzore, Misioni është duke punuar ngushtë me Komisionin Nacional për Luftën kundër  Trafikimit dhe me Ministrinë e Politikës Sociale, Demografisë dhe Rinisë (MPSDR) mbi intervenime të posaçme në përputhje me Planin Vjetor për Zbatimin e Strategjisë Nacionale për Luftimin e Trafikimit. Theksi kryesor i këtyre përpjekjeve është vënë në avancimin e kapaciteteve të punonjësve social për të trajtuar dhe mbrojtur të drejtat e njeriut në mënyrë efektive. Kjo nismë trajnimi synon të pajisë punonjësit socialë me njohuri dhe aftësi thelbësore, ndërkohë që mundëson një vlerësim të nevojave për ekipet e lëvizshme të dedikuara multidisiplinare për të identifikuar popullatat e cenuara, përfshirë viktimat e trafikimit. Me avancimin e aftësive dhe kapaciteteve të punonjësve social në vend, komunitetet do të jenë më të pajisura për të detektuar dhe parandaluar trafikimin e qenieve njerëzore në një fazë të hershme. Ministria e Politikës Sociale, Demografisë dhe Rinisë, me mbështetjen e Misionit, do të udhëheqë seanca për ndërtimin e kapaciteteve për profesionistët e punës sociale të angazhuar në përpjekjet për luftimin e trafikimit. Duke qenë se gratë dhe vajzat janë të prekura në mënyrë jo proporcionale nga trafikimi seksual dhe format e tjera të eksploatimit, trajnimi do të përfshijë raste studimore relevante. Trajnimi do të mbahet nga z. Nazif Avdi dhe znj. Irena Zdravkova, ekspertë të shquar në fushën e luftës kundër TQNj. 10 dhjetor: Punëtori mbi Praktikat më të mira rajonale për rrjetin e shoqatave të grave në polici (PPMShRrPG) Koha dhe vendi: 9:30-17:30, Hoteli Aleksandar Palace, Shkup (eveniment i mbyllur) Kjo punëtori do të sjellë në një vend 6 përfaqësues/e nga Ministria e Punëve të Brendshme dhe 12 përfaqësuese të Rrjetit të Shoqatave të Grave në Polici nga Prezencat e OSBE-së në Evropën Juglindore. Pjesëmarrësit do të shkëmbejnë përvoja dhe praktika më të mira si mbështetje ndaj përpjekjeve të MPB-së për të themeluar një Rrjet të Shoqatave të Grave në Polici që do jetë funksional dhe i qëndrueshëm i përshtatur peizazhit institucional të vendit gjatë periudhës 2–3 vjeçare, dhe që do të jetë në linjë me Strategjinë afatmesme të re të Misionit për periudhën 2025-2027. 11 dhjetor: Prezantimi i metodologjisë për themelimin e monitorimit të femicidit në Maqedoninë e Veriut Koha dhe vendi: 11:00-14:00, Hoteli Aleksandar Palace, Shkup Ky prezantim synon të pajisë organizatat e shoqërisë civile (OShC) që trajtojnë dhunën me bazë gjinore (DhBGj) dhe palët e interesuara kyçe – siç janë prokurorët publik, gjyqtarët, policia dhe qendrat e shërbimeve sociale – me një pasqyrë të detajuar të metodologjisë të propozuar për monitorimin e femicidit. Qëllimi është të themelohet një sistem i qëndrueshëm për ndjekjen e të dhënave lidhur me femicidin në Maqedoninë e Veriut dhe të kontribuohet në krijimin e një modeli të qëndrueshëm të ndjekjes në mbarë rajonin. Ministri i Punëve të Brendshme, Ministri i Politikës Sociale, Demografisë dhe Rinisë, Drejtorja Ekzekutive e Komitetit të Helsinkit për të Drejtat e Njeriut dhe Shefi i Misionit të OSBE-së do t’u drejtohen të pranishmëve. Takimi i 3të midis Task Forcës së Manastirit dhe përfaqësueseve të policisë dhe komunitetit rom për të diskutuar çështjen e prostitucionit Koha dhe vendi: 12:00-15:00, Hoteli Millenium Palace, Manastir (eveniment i mbyllur) Dy raste të profilit të lartë të përdorimit të forcës së tepruar policore ndaj individëve të përkatësisë rome në Manastir diku nga fundi i vitit 2020 sollën tensione midis komunitetit rom dhe ligjzbatuesve. Ndonëse këto tensione nuk ishin të dukshme gjatë tërë kohës dhe incidentet mbetën relativisht të rralla, komunikimi midis dy grupeve ishte i kufizuar kryesisht në konfrontime sporadike. Një mision fillestar faktmbledhës dhe një analizë e situatës hodhi themelet që Misioni ynë të shërbejë si nikoqir i evenimentit të dialogut të parë në mars të vitit 2024, që bashkoi përfaqësuesit e komunitetit rom dhe zyrtarët e policisë dhe nënvizoi nevojën dhe vullnetin për të ndërtuar mirëbesimin reciprok, si dhe identifikimin e një sërë të çështjeve kritike për diskutim. Pas një pauze gjatë zgjedhjeve parlamentare dhe presidenciale në pranverën e vitit 2024 – së bashku me ndryshimet shoqëruese në menaxhimin e policisë – procesi i dialogut rifilloi në tetor me një eveniment të dytë me fokus në përmirësimin e qasjes në dokumentet e identifikimit. Ky takim shënon vazhdimësinë e dialogut dhe do të trajtojë çështjen e prostitucionit, duke u përqendruar në ndikimin e tij mbi vajzat dhe gratë e përkatësisë rome.

SHKUP, 5 nëntor 2024- Krimi i organizuar parqet një kërcënim urgjent në Evropën Juglindore, ku trafikimi i paligjshëm i armëve të zjarrit dhe kontrabanda me emigrantët rrezikojnë sigurinë rajonale dhe globale. Për t’u kundërvënë këtyre çështjeve dhe për të nxitur aksion të koordinuar në mbarë rajonin, Misioni i OSBE-së në Shkup, në bashkëpunim me EU4FAST, organizon një Konferencë të nivelit të lartë të bashkëpunimit midis policisë dhe doganave që mbahet në Shkup nga 5 deri më 7 nëntor.

Në kontekstin e sfidave të përhershme të sigurisë në Evropën Juglindore, u arrit një moment i rëndësishëm në luftën kundër kërcënimeve transnacionale. Sot, Misioni i OSBE-së në Shkup hapi Qendrën rajonale moderne të certifikimit dhe trajnimit të K9 në Gjorçe Petrov, një hap qenësor në luftën kundër trafikimit të paligjshëm të armëve të zjarrit në rajon. Qendra do të shërbejë si vend për trajnim të vazhdueshëm dhe bashkëpunim rajonal. Kjo është më shumë se vetëm avancim – kjo qendër përfshinë hapësira të reja për K9 dhe përmirësim në kushtet e objekteve ekzistuese. Mobiliteti i ekipeve të K9 është rritur gjithashtu me donacionin e 14 makinave të specializuara dhe 3 rimorkio, duke mundësuar që policia të përgjigjet në mënyrë më të shpejtë dhe efikase në tërë rajonin.  Hapja solemne e Qendrës shënon fillimin e epokës së re të efikasitetit operativ dhe bashkëpunimit, me efekte afatgjate mbi sigurinë rajonale, aftësitë e zbatimit të ligjit dhe partneritetin. Mbi përpjekjet për të rritur kapacitetet e AVL-ve për detektim Rritja e kapaciteteve detektuese është pjesë e projektit jashtë-buxhetor të Misionit, "Ndihma autoriteteve kombëtare të Republikës së Maqedonisë së Veriut për uljen e rrezikut të përhapjes së armëve dhe të keqpërdorimit të armëve të vogla dhe të lehta (ALV)". I financuar nga Belgjika, BE, Franca, Gjermania, Norvegjia, Sllovakia dhe SHBA, projekti ka arritur progres të konsiderueshëm në rritjen e kapaciteteve të detektimit të Njësisë së qenve të policisë në vend. Mësoni më shumë rreth projektit të AVL-ve këtu.

I hapur për: studentët në studimet diplomike dhe post-diplomike të Universitetit Shën Kirili dhe Metodi në Shkup, Universitetit Goce Delçev në Shtip, Universitetit Shën Kliment Ohridski në Manastir dhe Universitetit të Evropës Jug-Lindore. Data e fundit për dorëzimin e eseve: 15 nëntor 2024 Shpërblime: tre esetë më të mira do të marrin vauçerë për pajisje të TI-së (teknologjisë informative). Projekti për “Përforcimin e sundimit të së drejtës dhe të drejtave të njeriut në Maqedoninë e Veriut III”, ka për qëllim që të zhvillojë sundimin e së drejtës duke zbatuar standardet ndërkombëtare si dhe zotimet e OSBE-së në fushën e gjyqësorit dhe të drejtave themelore, në të njëjtën linjë si dhe prioritetet strategjike të Maqedonisë së Veriut. Ky projekt synon të përballet me sfida të ndryshme të fushës së pavarësisë së gjyqësorit dhe paanshmërisë, të së drejtës penale, luftës kundër korrupsionit, luftës kundër diskriminimit, barazisë gjinore dhe të drejtave themelore në Maqedoninë e Veriut, ashtu si janë identifikuar në dokumentet e ndryshme politike të qeverisë dhe hulumtimet e ekspertëve ndërkombëtar. Pas përfundimit me sukses të ligjeratave për luftën kundër korrupsionit, të organizuar në bashkëpunim me katër Universitetet vendore (Universiteti Shën Kirili dhe Metodi në Shkup, Universiteti Goce Delçev në Shtip, Universiteti Shën Kliment Ohridski në Manastir dhe Universiteti të Evropës Jug-Lindore) nga entuziazmi i shprehur i studentëve si dhe për inkurajimin për angazhim të mëtutjeshëm të tyre në lufteë kundër korrupsionit, Misioni i OSBE-së në Shkup organizon një garë në shkrimin e eseve për studentët. Kjo garë rrjedh si rezultat i entuziazmit të studentëve të cilët morën pjesë në këtë aktivitet të ligjëratave (master klasëve) për luftën kundër korrupsionit, gjatë së cilave studentëve ju ofruan ligjerata frymëzuese nga profesionistë të spikatur në fushën e luftës kundër korrupsionit, si dhe akademikë, ashtu edhe aktivistë.        Autorët e tre eseve më të mira do të fitojnë vauçerë për blerjen e pajisjeve të TI-së (teknologji informative). Ky konkurs do të jetë i hapur deri më 15 nëntor 2024.    Esetë duhet të paraqesin një kuptim të plotë bazuar në kuptimin faktik të natyrës komplekse të korrupsionit dhe gjithashtu duhet të japin ide reale se si të zvogëlohet korrupsioni. Autorët duhet të japin një ose disa argumente në lidhje me temën e zgjedhur për analizë dhe duhet të shpjegohet dhe përforcohet me disa burime të literaturës së besueshme nga ana akademike, ligjore ose politike. Rrjedhimisht, autorët janë të inkurajuar që të paraqesin mendimin e tare por gjithashtu duhet të jenë të sigurte që ky mendim është i bazuar në dëshmi të besueshme dhe bindëse. Esetë duhet të shkruhen në mënyre që të jenë mirë të strukturuar, të qartë e me përdorimin e gjuhës së përshtatshme.    Esetë duhet të bazohen në një nga këto tema të përgjithshme: Korrupsioni dhe rinia Korrupsioni dhe zgjedhjet/financimi i partive politike Aspektet penale të korrupsionit Korrupsioni dhe gjinia Këto tema shërbejnë si një drejtim i përgjithshëm dhe autorët duhet të jenë të lirë të zhvillojnë esetë e tyre në mënyrë më specifike përderisa qëndrojnë në vijë me një nga katër temat e përgjithshme. Esetë do të vlerësohen nga ana e një komisioni të përbërë nga tre profesorë, të cilët do t’i vlerësojnë esetë në bazë të kritereve si në vijim: Tema e esesë dhe relevanca (maks. 25 pikë) Kreativiteti dhe origjinaliteti i argumenteve dhe zgjedhjeve të propozuara (maks.25 pikë) Argumentimi dhe përdorimi i dëshmive dhe burimeve (maks.25 pikë) Gjuha, struktura dhe qartësia (maks.25 pikë) Esetë duhet të shkruhen në gjuhën angleze, duke përdorur Times New Roman, në madhësinë e fontit 12 dhe zbrazëtirë brenda rreshtave prej 1.5 dhe duhet të jenë të gjatë rreth 1400 dhe 1600 fjalë (rreth 3 faqe). Esetë më të gjata nuk do të merren parasysh. Esetë duhet të jenë punë origjinale e autorëve. Çdo shenjë e plagjiaturës (përfshirë këtu edhe përdorimin e Chat GPT) do të sanksionohet me diskualifikim nga kjo garë. INFO SESION Për studentët e interesuar, Misioni i OSBE-së në Shkup, një javë para afatit të dorëzimit të eseve do të organizojë një sesion informativ, me udhëzime më të detajuara për të përgatitur një ese më të mirë. Për të marrë informata më të hollësishme në lidhje me orën dhe datën e saktë të këtij sesioni, si dhe zoom linkun, dërgoni në e-mail me të dhënat tuaja deri tek Diana.Zhupanoska@osce.org. Procesi i aplikimit Udhëzimet për konkursin e eseve janë të qasshme edhe në gjuhën angleze dhe gjuhën maqedonase.     Autorët duhet të dërgojnë esetë e tyre ne e-mail te Diana.Zhupanoska@osce.org deri më 15 nëntor 2024 si një dokument i bashkangjitur në PDF. Me qëllim të lehtësimit në procesin e vlerësimit anonim, autorët duhet të theksojnë emrin dhe mbiemrin e tyre të plotë në tekstin e e-mailit, por jo të vendosin emrin e tyre në dokumentin PDF.