Redaksia e lajmeve
News and press releases
Lajme dhe deklarata për shtyp nga veprimtaritë globale të OSBE-së
Prezenca e OSBE-së thekson nevojën për progres me reformën zgjedhore në Shqipëri, në takimin e posaçëm të Grupit Ndërkombëtar të Punës për Zgjedhjet
Publishing date: 7 dhjetor 2023
Në veprimtarinë e tij të fundit si Kryetar i Prezencës së OSBE-së në Shqipëri, më 7 dhjetor 2023, ambasadori Bruce Berton priti takimin e posaçëm të Grupit Ndërkombëtar të Punës për Zgjedhjet, ku morën pjesë drejtues të ambasadave të shteteve pjesëmarrëse të OSBE-së dhe të organizatave ndërkombëtare në Shqipëri. Takimi u fokusua te rekomandimet e OSBE/ODIHR-it pas zgjedhjeve vendore të 14 majit 2023 dhe vizitës pasuese në Tiranë. Po ashtu, u diskutua për përpjekjet më të fundit lidhur me reformën zgjedhore dhe për nevojën për përparim të vazhdueshëm në këtë drejtim. “Shpresoj që drejtuesit dhe përfaqësuesit e partive dhe grupimeve të ndryshme politike të ngrihen mbi ndasitë dhe interesat partiake e të ndërmarrin hapa konkretë drejt një reforme të njëmendtë”, tha ambasadori Berton. “Vendimi i Kuvendit për ngritjen e komisionit të posaçëm për reformën zgjedhore përcakton se rekomandimet e OSBE/ODIHR-it janë udhëzuesi kryesor për reformën zgjedhore. Rekomandimet i drejtohen një game të gjerë aktorësh, përfshirë ata politikë, Komisionin Qendror të Zgjedhjeve, autoritetet shtetërore, institucionet publike e të tjerë dhe secili duhet të bëjë pjesën e vet”. Duke theksuar se të gjitha rekomandimet janë të rëndësishme dhe meritojnë vëmendje, ambasadori Berton vuri në dukje tri fusha kryesore që kërkojnë vëmendje të shtuar: Hetimi i plotë dhe i shpejtë i akuzave për shkeljet e rënda zgjedhore si blerje votash, presion ndaj votuesve dhe abuzim me burimet shtetërore për përfitime elektorale, së bashku me ndërgjegjësimin për këto dukuri negative; Garantimi i fshehtësisë së votimit nëpërmjet masave mbrojtëse efektive procedurale të zbatueshme nga autoritetet përgjegjëse kur flitet për parandalimin e frikësimit të votuesve, votimit në grup, në emër të përfaqësuesit, etj.. Trajtimi i disa çështjeve që lidhen me rolin e medias në zgjedhje, në veçanti:- shmangia ose të paktën kufizimi i përdorimit në lajme të materialeve të prodhuara nga partitë/autoritetet shtetërore;- nxitja e një mjedisi mediatik të pavarur dhe vërtet të larmishëm, që është i lirë nga ndikimi politik/privat dhe që kufizon përqendrimin e pronësisë së medias. Grupi Ndërkombëtar i Punës për Zgjedhjet është një forum i krijuar me nismën e Prezencës së OSBE-së në Shqipëri, i cili mblidhet periodikisht për të shkëmbyer informacione dhe për të bashkërenduar qëndrimet dhe ndihmën për çështjet zgjedhore.
Prezenca e OSBE-së dhe Komisioni Qendror i Zgjedhjeve organizojnë konferencën kombëtare për votimin nga jashtë vendit
Publishing date: 19 tetor 2023
Komisioni Qendror i Zgjedhjeve, në bashkëpunim me Prezencën e OSBE-së në Shqipëri, organizuan konferencën kombëtare të nivelit të lartë “Votimi nga jashtë vendit – rruga përpara”, më 19 tetor 2023. Konferenca shërbeu si një platformë diskutimesh se si Kuvendi mund të adresojë boshllëqet ligjore në Kodin Zgjedhor të identifikuara nga Gjykata Kushtetuese, si edhe për elementë të tjerë thelbësorë të votimit nga jashtë vendit. Në të morën pjesë deputetë, partitë kryesore politike, institucionet shtetërore, përfaqësues të diasporës, aktivistë të shoqërisë civile dhe partnerë ndërkombëtarë. “Votimi nga jashtë vendit është një çështje si parimore, edhe praktike. Shqipëria e ka adresuar pjesën e parë të çështjes, duke rregulluar në parim të drejtën e qytetarëve të saj, që jetojnë jashtë, për të votuar. Ajo që mbetet sfidë është si të sigurohet ushtrimi i duhur dhe i efektshëm i kësaj të drejte në sensin praktik, gjë që ka rezultuar e ndërlikuar. Koha është tani për të adresuar çështjet specifike sa i përket zbatimit të dakordësisë politike të arritur në vitin 2020”, tha Kryetari i Prezencës së OSBE-së, ambasadori Bruce Berton, në hapje të konferencës. Ai shtoi se është thelbësore që çdo vendim – qoftë lidhur me boshllëqet ligjore apo rregullimet praktike – të dalë nga një konsensus me bazë të gjerë, mbështetur te një vlerësim i gjithanshëm dhe te konsultimet gjithëpërfshirëse me të gjithë aktorët, që nga ata politikë, te shoqëria civile dhe diaspora. Komisioneri Shtetëror i Zgjedhjeve, Ilirjan Celibashi, tha: “Amendimi i Kodit Zgjedhor është hapi i parë dhe sine qua non për të mundësuar votimin nga jashtë në zgjedhjet e përgjithshme për kuvendin e Shqipërisë të vitit 2025. Ndaj, për sa institucionalisht si KQZ e kemi të mundur dhe të lejuar, nxisim pozitën dhe opozitën të dakordësohen mbi ndryshimet e kërkuara të Kodit Zgjedhor, në lidhje me votimin nga jashtë. Është me rëndësi që rregullat mbi regjistrimin e votuesve nga jashtë, mbi mënyrën e votimit dhe mbi numërimin e votave, nxjerrjen e rezultatit dhe përllogaritjen e mandateve bazuar në këtë rezultat të miratohen sa më shpejt, mundësisht brenda këtij viti, ashtu sikurse Gjykata Kushtetuese ka vendosur”. Në hapje të veprimtarisë folën edhe ambasadorja e Zvicrës Ruth Huber, i ngarkuari me punë i Delegacionit të Bashkimit Evropian ambasadori Luigi Soreca dhe këshilltarja ekonomiko-politike e ambasadës së SHBA-së Allison Dyess. Ekspertë të sjellë nga Prezenca e OSBE-së dhe International IDEA i njohën pjesëmarrësit me standardet dhe modelet lidhur me regjistrimin e zgjedhësve që jetojnë jashtë, procesin e votimit dhe numërimit dhe përfaqësimin e zgjedhësve nga jashtë vendit. Konferenca ishte veprimtaria e parë e zhvilluar në kuadër të projektit “Mbështetje për reformën dhe procesin zgjedhor në Shqipëri”, i cili financohet nga qeveritë e Suedisë, Zvicrës dhe Polonisë. Prezenca e OSBE-së do të mbështesë Kuvendin, Komisionin Qendror të Zgjedhjeve, institucionet e tjera shtetërore dhe aktorët politikë për përgatitjen e kornizës ligjore dhe administrative për zbatimin e suksesshëm të votimit nga jashtë vendit në zgjedhjet parlamentare të vitit 2025.
Prezenca e OSBE-së nis projektin për të çuar më tej reformën dhe proceset zgjedhore në Shqipëri
Publishing date: 18 tetor 2023
Content type: News
Where we are: Prezenca e OSBE-së në Shqipëri
What we do: Demokratizimi, Zgjedhjet
Më 17 tetor 2023, Prezenca e OSBE-së në Shqipëri prezantoi një projekt mbi reformën dhe proceset zgjedhore, që synon të kontribuojë për një proces zgjedhor gjithëpërfshirës dhe pjesëmarrës në Shqipëri, në përputhje me angazhimet e OSBE-së dhe rekomandimet e OSBE/ODIHR. Projekti i OSBE-së “Mbështetje për reformën dhe proceset zgjedhore në Shqipëri” financohet nga qeveritë e Suedisë, Zvicrës dhe Polonisë. Ai do të zgjasë deri në nëntor 2026. Objektivat kryesore të projektit përfshijnë mbështetjen e autoriteteve me ekspertizë dhe asistencë për zbatimin e votimit nga jashtë vendit në zgjedhjet e ardhshme parlamentare; kontribut në përmirësimin dhe depolitizimin e administratës zgjedhore nëpërmjet një trajnimi zgjedhor sistematik dhe profesional; dhe fuqizimin e demokracisë së drejtpërdrejtë. Për më tepër, projekti do të ndihmojë autoritetet shqiptare për të përmirësuar kapacitetet logjistike zgjedhore, duke kontribuar në modernizimin e kapaciteteve të trajnimit dhe të informimit dhe në rritjen e infrastrukturës teknologjike për zbatimin e duhur të votimit nga jashtë vendit. “Ky projekt shënon një gur kilometrik të rëndësishëm në rrugëtimin tonë drejt forcimit të zgjedhjeve në Shqipëri dhe garantimit që zëri i qytetarëve të dëgjohet dhe të vlerësohet në procesin zgjedhor. Ai pasqyron përkushtimin tonë për të nxitur një proces zgjedhor që është transparent, gjithëpërfshirës dhe u përgjigjet nevojave dhe aspiratave të popullit shqiptar,” tha Kryetari i Prezencës së OSBE-së në Shqipëri, ambasadori Bruce Berton, gjatë prezantimit të projektit. Në veprimtari folën edhe ambasadori i Suedisë në Shqipëri Niklas Ström, ambasadorja e Zvicrës Ruth Huber dhe Shefi i Seksionit Politik dhe Ekonomik të Ambasadës së Polonisë Tomasz Frączkiewicz. “Kontributet bujare të qeverive tuaja e fuqizojnë më tej Prezencën për të ndihmuar partnerët tanë shqiptarë me një qasje më të thellë dhe më gjithëpërfshirëse në një sërë fushash. Ne e vlerësojmë thellësisht angazhimin tuaj vizionar dhe besimin e palëkundur në misionin tonë”, tha ambasadori Berton. Përfituesit kryesorë të projektit janë Komisioni Qendror i Zgjedhjeve, Kuvendi i Shqipërisë dhe qytetarët shqiptarë. Puna e projektit do të kryhet në bashkërendim me partnerë të tjerë kombëtarë dhe ndërkombëtarë dhe me OSBE/ODIHR-in. Nisma është pjesë e synimit të përgjithshëm të Prezencës për të promovuar demokratizimin, shtetin e së drejtës dhe të drejtat e njeriut, si dhe për të konsoliduar institucionet demokratike, në përputhje me parimet, standardet dhe angazhimet e OSBE-së.
Prezenca e OSBE-së organizon takim me ndërkombëtarë dhe Komisionerin Shtetëror të Zgjedhjeve, përpara zgjedhjeve vendore të 14 majit në Shqipëri
Publishing date: 15 mars 2023
Kur mbeten më pak se dy muaj nga zgjedhjet vendore të 14 majit, Kryetari i Prezencës së OSBE-së, ambasadori Guido De Sanctis, organizoi sot një takim me ambasadorët e shteteve pjesëmarrëse të OSBE-së dhe të organizatave ndërkombëtare në Shqipëri për të shkëmbyer informacion dhe për të bashkërenduar ndihmën dhe qëndrimet për zgjedhjet. I ftuar në takim, Komisioneri Shtetëror i Zgjedhjeve, Ilirjan Celibashi, i njohu pjesëmarrësit me përgatitjet e Komisionit Qendror të Zgjedhjeve dhe iu përgjigj pyetjeve të tyre. Ai falënderoi OSBE-në dhe partnerët e tjerë ndërkombëtarë për mbështetjen e vijueshme për KQZ-në. Ambasadori De Sanctis u ndal te gjetjet e raportit të Misionit të OSBE/ODIHR-it për Vlerësimin e Nevojave për zgjedhjet e 14 majit, si edhe risolli në kujtesë rekomandimet nga raportet e mëparshme që mbeten për t’u përmbushur. Duke e konsideruar KQZ-në si një ndër partnerët afatgjatë më të afërt e të besuar, ai siguroi se mbështetja për këtë institucion do të vijojë. Veprimtaria e sotme ishte një takim i veçantë i Grupit Ndërkombëtar të Punës për Zgjedhjet, krijuar me nismën e Prezencës së OSBE-së, i cili mblidhet periodikisht për të shkëmbyer informacion dhe për të bashkërenduar qëndrimet.
Prezenca e OSBE-së trajnon policinë për zgjedhjet vendore të 14 majit
Publishing date: 6 mars 2023
Content type: News
Where we are: Prezenca e OSBE-së në Shqipëri
What we do: Zgjedhjet, Policimi, Reforma dhe bashkëpunimi ushtarak
Prezenca e OSBE-së në Shqipëri, në bashkëpunim të ngushtë me Policinë e Shtetit dhe me mbështetjen e Komisionit Qendror të Zgjedhjeve dhe të Prokurorisë së Përgjithshme, filloi sot trajnimin e punonjësve të policisë, që do të jenë të ngarkuar me detyra në zgjedhjet vendore të 14 majit. Trajnimet, të cilat do të vijojnë deri në mesin e muajit prill, do të adresojnë rolin e policisë në proceset zgjedhore. Në ceremoninë e çeljes së trajnimeve, Kryetari i Prezencës, ambasadori Guido De Sanctis, tha: “Si kryetari i ri i Prezencës së OSBE-së jam i lumtur t’i jap një vrull të ri mbështetjes së vijueshme që Prezenca e OSBE-së u jep institucioneve shqiptare në organizimin dhe administrimin e zgjedhjeve në përputhje me praktikat e njohura ndërkombëtare dhe rekomandimet e OSBE/ODHIR-it. Këtë trajnim mbi administrimin zgjedhor ne e ofrojmë çdo vit zgjedhor, si pjesë e mbështetjes tonë për forcimin e kapaciteteve institucionale. Ju nxis që ta zbatoni sa më mirë në praktikë atë që do të mësoni dhe shkëmbeni me njëri-tjetrin këtu”. Drejtori i Përgjithshëm i Policisë së Shtetit, Muhamet Rrumbullaku, tha: “Falënderoj ambasadorin për mbështetjen e vijueshme që Prezenca e OSBE-së në Shqipëri i ka dhënë dhe po i jep Policisë, mbështetje e cila faktohet edhe sot, përmes këtij trajnimi të organizuar për punonjësit e Policisë së Shtetit. Gjithashtu, falënderoj Kryetarin e Komisionit Qendror të Zgjedhjeve z. Celibashi dhe Prokurorin e Përgjithshëm, z. Olsian Çela, për angazhimin e tyre në këtë trajnim të domosdoshëm. Siguroj qytetarët, subjektet politike, dhe partnerët tanë se Policia e Shtetit do të zbatojë ligjin dhe vetëm ligjin”. Edhe Komisioneri Shtetëror i Zgjedhjeve dhe Prokurori i Përgjithshëm iu drejtuan të pranishmëve, duke vënë në dukje rolin dhe rëndësinë e ruajtjes së standardeve për krijimin e një mjedisi të sigurt për qytetarët, në mënyrë që ata të votojnë të lirë. Nga data 6 deri më 8 mars 2023, do të trajnohen rreth 125 drejtues të nivelit të lartë dhe të mesëm, përfshirë zëvendësdrejtorin e përgjithshëm të policisë, drejtorët e departamenteve, drejtorët vendore të policisë dhe ata të kufirit, si edhe shefat e komisariateve dhe zëvendësdrejtorët e drejtorive vendore të policisë. Nga 13 deri më 20 mars, do të trajnohen rreth 170 trajnerë, të cilët do të trajnojnë, më pas, rreth 6 000 punonjësit e policisë që do të angazhohen me detyra zgjedhore. Po ashtu, Prezenca e OSBE-së planifikon të prodhojë disa fletëpalosje informuese, të cilat do të shpërndahen në disa pika të kalimit kufitar, për zgjedhësit shqiptarë me banim jashtë vendit që do të vijnë për të votuar në Shqipëri. Prezenca e OSBE-së i organizon këto trajnime që prej vitit 2005, duke i dhënë një rol gjithnjë e më të madh Policisë së Shtetit në zhvillimin e tyre.
Prezenca e OSBE-së në Shqipëri dhe KQZ-ja nënshkruajnë Memorandumin e Mirëkuptimit për forcimin e kapaciteteve të administratës zgjedhore, intensifikimin e bashkëpunimit
Publishing date: 17 tetor 2022
Content type: News
Më 17 tetor, Prezenca e OSBE-së në Shqipëri dhe Komisioni Qendror i Zgjedhjeve (KQZ) nënshkruan një Memorandum Mirëkuptimi rreth intensifikimit të bashkëpunimit për forcimin e kapaciteteve të KQZ-së me synim kryerjen e veprimtarisë së saj në përputhje me rekomandimet e OSBE/ODIHR-it dhe standardet më të mira ndërkombëtare. “Kjo marrëveshje simbolizon bashkëpunimin e fortë dhe të vazhdueshëm mes Prezencës së OSBE-së dhe KQZ-së. KQZ-ja ka qenë prej vitesh një nga partnerët kryesorë dhe më të besuar të Prezencës dhe për këtë arsye mbështetja ndaj Komisionit Qendror të Zgjedhjeve ka qenë ndër përparësitë tona gjatë gjithë mandatit tim. Tri shkronjat e shkurtimit të KQZ-së duhet të lexohen ndryshe si Qëndrueshmëri, Efikasitet dhe Besueshmëri [në anglisht CEC: Consistency, Efficiency and Credibility]”, tha Kryetari i Prezencës, ambasadori Vincenzo Del Monaco, në fjalën e mbajtur në këtë veprimtari. Ai shtoi se një administratë zgjedhore e paanshme, e mirëpërgatitur dhe e mirëpajisur është thelbësore për integritetin e proceseve zgjedhore. “Në këtë kontekst, Prezenca është e gatshme që ta ndihmojë KQZ-në për përballimin e sfidave të lidhura me përgatitjen dhe menaxhimin e zgjedhjeve vendore të vitit të ardhshëm”, tha ai. Në kuadër të reformës zgjedhore, Del Monaco theksoi se Prezenca e vlerëson rifillimin e veprimtarisë së Komisionit të Posaçëm për Reformën Zgjedhore dhe e nxiti atë të adresojë rekomandimet ende të patrajtuara të OSBE/ODIHR-it përmes një procesi të konsultuar gjerësisht. Ai tha se nga pikëpamja teknike dhe bazuar në praktikat më të mira ndërkombëtare, koha po shkurtohet gjithnjë e më shumë që ndryshimet thelbësore ligjore të zbatohen në zgjedhjet e ardhshme. Komisioneri Shtetëror i Zgjedhjeve, Ilirjan Celibashi, shprehu mirënjohjen për Prezencën e OSBE-së dhe e falënderoi ambasadorin Del Monaco për angazhimin e tij dhe vijueshmërinë e mbështetjes ndaj KQZ. “Jemi në fazë të rëndësishme të marrëdhënieve institucionale mes KQZ-së dhe OSBE-së dhe ky memorandum është konfirmimi i bashkëpunimit që KQZ-ja dhe Prezenca e OSBE-së kanë pasur deri tani. Besoj se do të kemi këtë nivel bashkëpunimi edhe në të ardhmen. Kemi akoma shumë për të bërë, zgjedhjet për organet e qeverisjes vendore janë shumë afër ndaj mbështetja e OSBE-së si një nga partnerët tanë të rëndësishëm do të ketë rolin e vet në miradministrimin e procesit zgjedhore”, tha Komisioneri Celibashi. Marrëveshja e nënshkruar sot përbën një themel të fortë për të ecur përpara me veprime dhe ndërhyrje të prekshme në një sërë fushash kyçe. Këto përfshijnë mbështetjen për KQZ-në për të adresuar rekomandimet e OSBE/ODIHR-it dhe ato që rrjedhin nga rezolutat e Kuvendit të Shqipërisë; fuqizimin e kapaciteteve të saj profesionale për administrimin e zgjedhjeve, duke përfshirë aftësitë e trajnimit dhe të kontakteve informuese me votues; si edhe bashkimin e forcave për një bashkërendim më të mirë të asistencës ndërkombëtare për çështjet zgjedhore. Në përputhje me mandatin e saj, Prezenca e OSBE-së në Shqipëri i ka ofruar mbështetje të vazhdueshme autoriteteve shqiptare, përgjatë viteve, me qëllim realizimin e proceseve të reformës zgjedhore në mënyrë të dakordësuar, gjithëpërfshirëse dhe në kohë, si dhe ofrimin e asistencës teknike për përmirësimin e administrimit të zgjedhjeve.
Prezenca e OSBE-së fuqizon gratë këshilltare në Shqipëri me anë të Programit të Ekselencës së Grave në Nivel Vendor
Publishing date: 10 tetor 2022
Content type: News
Where we are: Prezenca e OSBE-së në Shqipëri
What we do: Demokratizimi, Zgjedhjet, Barazia gjinore
Më 7 dhe 8 tetor 2022, Prezenca e OSBE-së në Shqipëri vlerësoi 20 këshilltare bashkiake të motivuara, të cilat përfunduan Programin e Ekselencës së Grave në Nivel Vendor (WoMEP) dhe organizoi gjithashtu modulin e dytë të trajnimit për 22 këshilltare të tjera, brezi i tretë i WoMEP-it. WoMEP-i i ndihmon gratë këshilltare të lidhin politikat dhe propozimet me ndjeshmëri gjinore me buxhetet e bashkive, si burim parësor për financimin e nismave që trajtojnë nevojat e komuniteteve në nivelin vendor. Ashtu si në dy edicionet e mëparshme, propozimet e zhvilluara nga brezi i tretë i këshilltareve pjesë e WoMEP-it do u prezantohen këshillave përkatës për qëllim financimi nga buxhetet bashkiake të vitit 2023. Gjatë tri viteve të fundit, Prezenca ka ndihmuar këshilltaret vendore aktive të zhvillojnë propozime konkrete për projekte, me synim zbatimin e tyre në bashki. Propozimet u përkasin fushave të ndryshme si: përkrahja e turizmit, ndihma për viktimat e tërmetit të vitit 2019, mbështetja për viktimat e dhunës me bazë gjinore. Deri më sot, WoMEP-i u ka mundësuar më shumë se 60 grave këshilltare bashkiake nga e gjithë Shqipëria të rrisin rolin e gruas në vendimmarrje në nivelin vendor. “Niveli vendor është ai që qëndron më afër qytetarëve dhe besimi tek institucionet ndërtohet pikërisht këtu. Nëse ia dilni të krijoni besimin te ju vetë dhe te puna e juaj, atëherë ia dilni edhe të krijoni besim në institucionet e Shqipërisë,” tha zëvendëskryetarja e Prezencës, Clarisse Pasztory, gjatë aktivitetit. Ajo shtoi se shpreson që shumë prej pjesëmarrëseve të WoMEP-it të garojnë përsëri në zgjedhjet vendore të vitit 2023 dhe të zgjidhen përsëri si këshilltare apo edhe si kryetare bashkie. Në veprimtari morën pjesë edhe anëtare të Aleancës së Grave Deputete – forum ky i krijuar me nismën e Prezencës së OSBE-së. Kryetarja e Aleancës Merita Bakiu dhe zëvendëskryetarja Etilda Gjonaj shprehën gatishmërinë e tyre të punojnë për fuqizimin e rrjetëzimit ndërmjet grave deputete dhe këshilltareve bashkiake për të çuar përpara nisma në nivelin vendor.